MU VHANGERI ra Mateu tinoverenga kudari: “Jesu wakanghwina mu Nyumba ya Mwari, wogogomera vese vaitengesa no vaitenga, wowisa matarimba o vatenganisi vo mare no matafura a vaya vaitengesa njiva; ecivabvunja kuti: ‘Bzakatahwa: Nyumba yangu inozodanwa nyumba yo mukumbiro; kaveta imwimwi munoiita bambha ro mbava’.”—Mateu 21:12, 13.

Ndhorovondho inokhombija kuti vaitengesera mutemberi, vaitira vantengi zvicizivi kururama ngo kucaja mare yakawanda. Inga muezaniso, njiva ajicaidhura, murombo waikwanisavo kujitenga kuti aite mupiro. Asi, zvakatahwa zvokare zo ciJudha zvinonanga kuti muzana rokutanga ro makore, pakava no mukuvo wokuti mundhu waidikana kubudisa dhenari rimwe ro goridhe kuitira kutenga njiva mbiri. Mushandi waidikana kushanda 25 o njiku kuitira kuwana mare ii. Njiva jakazodhura maningi zvokuti murombo acaikwanisazve kujitenga. (VaLevi 1:14; 5:7; 12:6-8) Rabhi Simeon ben Gamaliel wakanyangajwa maningi ngo zviitiko izvi, woguma pakuthuruja mupiro jaidikanwa kuitwa ngo vaJudha. Ngokukasika, mutengo wo njiva mbiri wakaguma pa kuthuruka maningi.

Inga zvotinovona, vaitengesari mutemberi vainga no makaro zve vaibira vo vaitengesera. Ngo iyo ndava, zvaifanera kuti Jesu avadanije kuti “mbava.”