Jesu wakati: “Majinja no majinja anozomukirana; umambo no umambo hunozomukirana. Kunozova no kuzungunyika kukuru ko nyika; mu ndau zinji munozova no njara no ndhwaji.” (Luka 21:10, 11) Kudari zviitiko izvi zvikaitika pamukuvo wondhowo zvaizokhombija kuti “Umambo hwa Mwari hwaa phedo.” Kureva kuti zviro izvi zviri kuitika pamukuvo wondhowo kana mu nyika yese here? Ngatende tivone.

1. HONDO

Mu gore ro 1914 kwakatanga hondo imweni yakasiyana maningi no hondo jimweni jakamboitika. Vazivi vo zviitiko vanoanja kunanga kuti, gore ro 1914 rakava gore rakacinja upenyu hwo vandhu, ngokuti ndirona gore rakatanga Hondo yo Kutanga yo Nyika Yese. Kwainga kucito kwakakhandihwa mabhomba akawanda, magajhi no vhuti jimweni jinoshandiswa pa hondo inga zvakaitika pa hondo iyi. Perapo kwakaitika Hondo yocipiri yo Nyika Yese, iyo yakashandisa mabhomba atomika. Kuvhira mu gore ro 1914, hondo jiri kuitika mu ndau jakawanda zve jiri kuuraya mamiriyau o vandhu.

2. KUZUNGUNYIKA KO NYIKA

Bhuku rimweni ro Bhiritaniya rakananga kuti makore ese kunoitika kuzungunyika ko nyika kunokwana zana, kuzungunyika uku kunoparaja zviro zvakawanda. Vandhu vanoita basa ro kupsakisisa ku Estadhus Unidhos vakati: “Kutangira mu gore ro 1900 mbhera nyamasi, gore ngo gore kuri kuitika kuzungunyika ko nyika kunothyisa kunokwana gumi na tandhatu.” Pikija vamweni vanonanga kuti kangaije kuzungunyika ko nyika kuri kuvoneka maningi ngokuti mucini javanopsakisisaro ndijona jiri kuwanda, asi cokwadi ngo cokuti, vandhu vazinji vari kutambujika no kufa ngo ndava yo kuzungunyika ko nyika uku.

 3. NJARA

Kutamika ko zvokuha kazinji kunowanika ngo ndava yo hondo, kubzinyirirana, cineso co mare, kutama kudakarira basa ro kurima no kutama kunasirira kudari pakaitika ngozi jinoitika jega. Mu gore ro 2018, Ripoti Inobhuya ngo Zvokuha mu Nyika Yese yakati: “Mu nyika yese vandhu vanokwana 821.000.000, vari kutambujika ngo njara, 124.000.000, yo vandhu vondhovo avana zvokuha zvinokwana zvinovangisa uhomi.” Kutama zvokuha zvinokwana kuri kuita kuti vana vanodarika mamiriyau matatu vafe gore ngo gore. Mu gore ro 2011, ngo kutama zvokuha zvinokwana zvakaita kuti vana vazinji vafe mu nyika yese.

4. NDHENDHA NO MUTUNGU

Bhuku ro Organização Mundial da Saùde (Sangano ro Nyika Yese Rinovonerera ngo zvo Uhomi) rakati: “Kutangira mu gore ro 2001 ndhendha jiri kuengejeka. Ndhendha jo kare jinozwi korera, peste, febre amarela javiyazve, ndhendha imbza jinozwi SARS (ndhendha inobara kuneseka kukuru ko kufema), magiripi mazinji, MERS (ndhendha inobara kuneseka kukuru ko kufema yakabuda ku Orienti Medhiyo), Ebhora no Zika.” Pikija no zviri kuithwa ngo masientista no mamedhiko, mutombo jo ndhendha iji ajiripi kuwanika.

5. BASA RO KUCUMAERA MU NYIKA YESE

Jesu wakabhuyazve ngo citatijo cimweni. Iyena wakati: “Vangeri iri ro Umambo rinozotokoteswa pasi pese, kuita ufakazi ku vandhu vese. Pondhopo kunozovia kupejwa ko bzese.” (Mateu 24:14) Zvineso pazvinonga zveciengejeka mu nyika, vandhu vanopindirija 8.000.000, vari kucumaera masoko akanaka o Umambo hwa Mwari mu nyika jinopindirija 240, mu ndumi jinopindirija ciuru cimwe. Izvi azvizivi kumboitikazve kuvhira kareko.

Zvese zvakanangwa ndi Jesu zviri kuitika nyamasi uno. Ngenyi zvinosisira kuziva izvi? Ngokuti Jesu wakati: “Mukabzivona ibzi, garanyi meciziva kuti umambo hwa Mwari hwaa phedo.”—Luka 21:31.

Kukwanirisika ko zvakanangwa ndi Jesu no zvinonangwa mu mativi amweni o Bhaibheri, zvinokhombija kuti Umambo uu wakatanga kutonga mu gore ro 1914. * Mu gore iri, Jesu Kristu wakava Mambo wo Umambo hwa Mwari. (Nduyo 2:2, 4, 6-9) Sambiri pano Umambo hwa Mwari unozotonga pasi pano, no kuparaja utongi hwese hwo vandhu zve no kucinja nyika ino kuti ive paradhiso, umo munozogara vandhu mbhera na rini.

Masoko akananga Jesu pa mukumbiro wake wokuezanisira anozokwanirisika, okuti: “Umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mateu 6:10) Asi ngo zvapi zviri kuitwa ngo Umambo hwa Mwari kuvhira mu gore ro 1914? Umambo uu unozoitenyi paunozotanga kutonga pa nyika?