Mateu 6:1-34
6 “Ngwariranyi kuti mutame kukhombija ururami hwenyu pamberi po vandhu kuti muvoniwe ndivona; mukaita kudaro, amuzopfupwi ndi Baba wenyu vari kumatenga.
2 Paunopa murombo cipo, ucarija mbhayapaya, inga zvinoitwaya ngo vacengejeri mu masinagoga no muzvitaka, kuti vapuwe nduma ngo vandhu. Zvokadi inini ndinomuvhunja kuti, ivona vapera kuashira mupfupo wavo.
3 Paunopa mundhu ciri cese, mukono boshwe wako ucadoziva zviri kuitwa ngo mukono muho,
4 kuti cipo cako cive co cifise-fise. Baba wako, vaya vanovona zvinoitwa mu cifise-fise, vanozokukomborera.
5 “Pamunoita mukumbiro, mucaita inga vacengejeri, ngokuti ivona vanodakarira kuita mukumbiro vakaima mu masinagoga no mu mbhararano jo zvitaka, kuti vavoniwe ngo vandhu. Zvokadi inini ndinomuvhunja kuti, ivona vapera kuashira mupfupo wavo.
6 Asi paunoita mukumbiro, nghwinai mumba, wofunga musuvo kuti uite mukumbiro kuna Baba wako vari pakafisika. Baba wako, vaya vanovona zvinoitwa mu cifise-fise, vanozokukomborera.
7 Paunoita mukumbiro, ucandophinda-phinda magama ondhowo inga zvavanoita vandhu vo majinja, ngokuti vanorangarira kuti vanozozika ngo kushandisa magama akawanda.
8 Mucadoita inga ndivona, ngokuti Baba wenyu vanoziva zvamunoda mucito mavakumbira.
9 “Munodikana kukumbira kudari:
“‘Baba wedu muri kumatenga, zina renyu ngariceneswe.
10 Umambo hwenyu ngahuviye. Kuda kwenyu ngakuitwe pasi pano, inga kumatenga.
11 Tipenyi zvokuha zvedu zva nyamasi;
12 tiregererenyi zvishaishi zvedu, inga zvatinoregereravo vanotishaishira.
13 Mucatisiya teciwira mu muejo, asi tiponesenyi mu nyara jo wakashata.’
14 “Kudari mukaregerera zvishaishi zvo vandhu, Baba wenyu vari kumatenga vanozomuregereravo;
15 kudari mukatama kuregerera zvishaishi zvo vamweni, Baba wenyu avazomuregererivo.
16 “Pamunozira, mucadocamwa inga vacengejeri, ngokuti vanosunga cisununu kuti vavoneke ngo vandhu kuti vari kuzira. Zvokadi inini ndinomuvhunja kuti, ivona vapera kuashira mupfupo wavo.
17 Asi iwewe paunozira, zojai mafuta musoro wako no kusamba mumeso mwako,
18 kuti vandhu vacakuvona kuti uri kuzira, asi uvoneke ndi Baba wako basi vari pakafisika. Baba wako, vaya vanovona zvinoitwa mu cifise-fise, vanozokukomborera.
19 “Mucadojiunganijira upfumi pasi pano; ngokuti hunopera kufundhwa ngo zvifundho pomwe no furujhu; pasi pano, pano mbavha jinophwanya nyumba, jeciba.
20 Asi unganijanyi upfumi hwenyu kumatenga; kucina zvifundho no furujhu; kucina mbavha jinophwanya nyumba jeciba.
21 Ngokuti, pano upfumi hwako, ndipona pano mwoyo wako.
22 “Ruvheneko hwo muviri, ijiso. Kudari jiso rako rakanaka,* muviri wako wese unozovhenekehwa.
23 Asi kudari jiso rako rakashata, muviri wako wese unozova mu cidima. Kudari ruvheneko huri mouri hukava cidima, cidima cako cinozokura maningi.
24 “Apana anokwanisa kushandira vandhu vaviri. Ngokuti anozonyenya umwe woda umweni, kana kuti anozoshandira umwe, wonyenya umweni. Amukwanisi kushandira Mwari pamwepo no Upfumi.
25 “Ngo ndava yazvo, ndinomuvhunja kuti: Mucathimwa-thimwa ngo pamusoro po upenyu hwenyu; kuti munozohenyi kana munozomwenyi. Nee amudikani kuthimwa-thimwa ngo pamusoro po muviri wenyu, kuti munozosimirenyi. Upenyu ahusisiri maningi kunyisa cokuha, no muviri kunyisa nguvo?
26 Ringisanyi shiri; ijona ajisimi mbeu, ajikotori, ajivigi ciro mu nyumbu, asi Baba wenyu vo kumatenga vanojihisa. Imwimwi amusisiri kupinda ijona kani?
27 Ndiyani wenyu anokwanisa kuengejera upenyu hwake ngo kuthimwa-thimwa?
28 Munothimwa-thimwa ngenyi ngo zvokusimira? Jijanyi ngo makurire anoita maruva, aabati basa nee aasoni;
29 asi ndinomuvhunja kuti pikija Soromona no nduma yaaingaya nayo, aazivi kusimira zvaiezana na rimwe rawo.
30 Imwimwi vandhu vo kutenda padoko, kudari Mwari ecisimija kudaro maushwa, anomera nyamasi mangwana okhandihwa pa muriro, iyena aazomusimijivo maningi?
31 Mucathimwa-thimwa meciti: ‘Tinozohenyi? Tinozomwenyi? Tinozosimirenyi?’
32 Ngokuti zviro izvi ndizvona zvinopsakwa maningi ngo vomajinja. Baba wenyu vo kumatenga vanoziva kuti munozvida zvese izvi.
33 “Endereranyi mberi mecitanga kupsaka Umambo no ururami hwa Mwari. Zviro zvese izvi munozozviengejehwa.
34 Ngo kudaro, mucathimwa-thimwa ngo zvamangwana, ngokuti njiku yamangwana inozova no kuthimwa-thimwa kwayo. Njiku imwe nga imwe ino zvineso zvayo.
Masoko o Pasi
^ Kana: “recivona.”
