1, 2. Pekejanyi muezaniso yo vandhu vainga shamwari jo phedo ja Jehovha?

MUSHOVONYI wo mundhu wamaizosana inga shamwari? Zvinoita inga imwimwi maizodakarira mundhu wiyani ano mavonero akatojana no enyu, kana kuti zvaanodakarira, pomwe no zvaanopekeja mutengo. Zve imwimwi maizoda kuita ushamwari no mundhu ano mugariro wakanaka, wakadari inga kugondeka zve kunaka mwoyo.

² Mu mativi ese o zvakaitika kare, Mwari wakasana vandhu vamweni kuti vave shamwari jake jo phedo. Muezaniso, Jehovha wakadanija Abhirahama kuti shamwari yangu. (Verenganyi Isaia 41:8; Jakobo 2:23.) Mwari wakanangira Dhavhidhi inga “wo ndinodakajihwa ndiyena” ngo ndava yokuti iyena wainga mundhu waidiwa ndi Jehovha. (Maitiro o Vapostori 13:22) Zve Jehovha wakavona muphorofeti Dhanyeri inga “mundhu unodikisisa.”—Danieli 9:23.

3. Ngenyi Jehovha anosana vandhu vamweni kuti vave shamwari jake?

³ Ngenyi Jehovha wakavona Abhirahama, Dhavhidhi, zve Dhanyeri kuva shamwari jake? Hina, iyena wakabvunja Abhirahama kuti: “wakandipurukira.” (Genesi 22:18) Ngo kudaro  Jehovha wakabatisisa ngo phedo vayani vanoita zvaanokumbira mukuzvidodokesa. Iyena wakabvunja valziraeri kuti: “Izwanyi izwi rangu, neni ndinozoita Mwari wenyu, nemwi munozoita vandhu vangu.” (Jeremia 7:23) Kudari mukapurukira Jehovha, munozovavo shamwari yake!

4, 5. Jehovha anokhombijisa kudini simba rake kuti abesere vandhu vake?

⁴ Amborangariranyi zvinoreva kuva shamwari ya Mwari! Bhaibheri rinonanga kuti Jehovha ari kupsaka mukana wo “kuti avangise vaya vanomugonda ngo mwoyo yavo yese.” (2 Kronike 16:9) Jehovha anokhombijisa kudini simba rake kuti amubesere? Njira imwe, inowanika pana Nduyo 32:8, patinoverenga kuti: “Ndinozokujijisa, ndecitatija gwanja ro kutevera ndinozokuringisa no kukupangira.”

⁵ Kubaya mwoyo kwakadini ko matajire a Jehovha! Iyena anozomupekeja ndhungamiro inodika zve inozomungwarira pamunonga meciishandisa. Mwari anoda kumubesera kuti mucungirire muejo jenyu. (Verenganyi Nduyo 55:23.) Kaveta, kudari mecishandira Jehovha no mwoyo wese, mungathemba cigondiso cakadari inga co mutari wo nduyo wakananga kuti: “Ndinodira [Jehovha] Mwari pambeji pangu mukuvo wese, Yena ana inini: Anobata mukono wangu wo muho, wondivangisa.” (Nduyo 16:8; 63:9) Hina, Jehovha anomubesera kuti murarame mu njira yo kuti mumudakajise. Asi inga zvamunoziva, kuno muvengi wa Mwari anoda kumurambisa kuita zvondhozvo.

6. Sathana wakapumbhenyi ku vandhu?

⁶ Cipauko 11 co bhuku rino cakadurujira maphikizire akaita Sathana Dhiabhu ukuru-kuru hwa Mwari. Sathana wakapumbha Mwari kuti anonyepa zve wonanga kuti Jehovha wakashaisha ngo kutama kutendera kuti Adhamu na Evha vazvitemere vega civaringo co zvakanaka no zvakashata. Pasure po kushaisha ka Adhamu na Evha zve pasi pano ko painga pecizara ngo vana vavo, Sathana wakaphikiza thangwe ro zvido  zvo vandhu. Sathana wakapumbhisa kudari: ‘Vandhu avashandiri Mwari ngo kuti vano rudo naye. Ndipekejenyi mukana, zve maizovona kuti ari wese angamupandukira.’ Zviitiko ngo pamusoro po mwanarume waizwi Jobe zvinovonesa kuti izvi ndizvona zvinodavira Sathana. Jobe wainga ani? Zve wakabatanijiswa kudini mu kuphikiza ka Sathana?

7, 8. (a) Cicinyi cinoitisa kuti Jobe ave akasiana pakati po vandhu mu nguva iyi? (b) Sathana wakaphikizisa kudini zvido zva Jobe?

⁷ Jobe wakararama ko makore anokhwedera 3.600 akapera. Iyena wainga mundhu wakanaka, ngo kuti Jehovha wakati: “Akuna umweni wakaezana naye: mundhu wakaperera no kururama, anothya Mwari, woramba bzakaxata.” (Jobe 1:8) Jobe waidakajisa Mwari.

⁸ Sathana wakaphikiza thangwe ra Jobe ro kushandira Mwari. Dhiabhu wakabvunja Jehovha kuti: “Amuzivi kumutendeneja ngo mufimbiji kuti imungwarire, yena, nyumba yake no bziro bzake bzese? Makakomborera basa ro nyara jake, muxambi yake inofukija nyika yese! Tambanujanyi nyara yenyu, bvisanyi bziro bzake bzese. Munozovona kuti anozomutuka!”—Jobe 1:10, 11.

9. Jehovha wakaitisa kudini pa kuphikiza ka Sathana, zve ngenyi?

⁹ Sathana wakashora Jobe kuti waishandira Mwari ngo ndava yo zvaanopuwa ndiyena. Dhiabhu wakanangavo kuti kudari Jobe akaejwa, waizopandukira Mwari. Jehovha wakaitisa kudini pa kuphikiza ka Sathana? Zvecivoneka kuti shwiro yakona yaibatanija thangwe ro zvido zva Jobe, Jehovha wakatendera kuti Sathana aeje Jobe. Mu njira iyi kuda Mwari ka Jobe—kana kuti kutama kumuda—kwaizokhombijwa pambhene.

10. Muejo japi jakawira Jobe, zve iyena wakaitisa kudini?

¹⁰ Tevere, Sathana wakaeja Jobe mu njira jakasiana-siana. Zvifuyo zvimweni zva Jobe zvakapera kubiwa, zvimweni zvakafa. Vashandi vake vazinji vakapera kufa. Izvi zvakaviisa dambujiko. Ngozi imweni yakamuwira, ngo yokufa ko gumi ro vana va Jobe ngo dutu. Pikija no zviitiko zvakadari, “Jobe aazivi kuxaixa , nokuti kumukira Mwari.”—Jobe 1:22.

11. (a) Ngo kwapi kupumbha ko cipiri kwakaita Sathana ngo pamusoro pa Jobe? (b) Jobe wakaitisa kudini ku ndhendha yake yaihwaja?

 ¹¹ Sathana aazivi kuramwa. Iyena wakarangarira kuti pikija Jobe wakwanisa kucungirira muejo wo kuruza zvese zvaainga nazvo, vashandiri no vana iyena waizopandukira Mwari kudari Jobe akahwaja. Jehovha wakatendera Sathana kuti atake Jobe ngo ndhendha yaisembhusa, zve yaihwaja maningi. Asi Jobe aazivi kuruza gonda kuna Mwari ngo ndava ya izvi. Zvokadi, iyena wakati no kucunga kwese: “Ndinotokotesa uceni hwangu mbhera kufa.”—Jobe 27:5.

12. Maitiro a Jobe akakhombijisa kudini kuti kuphikiza ka Dhiabhu ngo ko kunyepa?

¹² Jobe wainga acikazvizivi kuti Sathana ndiyena waiitisa matambujiko. Acikazivi zvizinji, kuphikiza ka Sathana ukuru-kuru hwa Jehovha, Jobe waitothyira kuti dangani zvineso zvake zvaibva kuna Mwari. (Jobe 6:4; 16:11-14) Pikija zvakadaro, iyena wakaramba akagondeka kuna Jehovha. Jobe kuramba kwake akagondeka, kwakakhombija kuti zvakavereketa Sathana kuti Jobe anoshandira Mwari ngo thangwe ro umbau, zvainga zvo kunyepa!

13. Cicinyi cakaitika Jobe ngo kuramba akagondeka?

¹³ Kugondeka ka Jobe kwakaita kuti Jehovha apingure ngo simba kuphikiza ka Sathana. Jobe waingadi kamare shamwari ya Jehovha, zve Mwari wakamupfupa ngo ndava yo kugondeka kwake.—Jobe 42:12-17.

14, 15. Ngenyi tingananga kuti kuphikiza ka Sathana kwaibatanija Jobe kunoshandavo kuno vandhu vese?

¹⁴ Shwiro yo kugondeka kuna Mwari yakamuswari ndi Sathana aicaiendepi kuna Jobe ega. Imwimwivo munobatanijwavo. Izvi zvinokhombijwa pambhene pana Mazwi Akangwara 27:11, Soko ra Jehovha parinoti: “Itai wakangwara, mwana wangu, dakajisai mwoyo wangu; ndinozokwanisa kupingura vaya vanondituka.” Masoko aya akatahwa mu makore mazinji pasure po kufa ka Jobe, anovonesa kuti Sathana aciri kundotuka Mwari zve ecipumbha vashandiri Vake. Patinorarama mu njira inodakajisa Jehovha, zvokadi kamare  tiri kubesera kupingura kupumbha ka Sathana ko kunyepa. Munozwa kudini ngo pamusoro pazvo? Azvidakajisi here kuva no divi mukupingura kupumbha ko kunyepa ka Dhiabhu, pikija zvecireva kuita cinjo yakatikuti mu upenyu hwenyu?

¹⁵ Vonanyi kuti Sathana wakananga kuti: “Mundhu anopa bzese bzaanabzo kuti ajiponese.” (Jobe 2:4) Ngo kunanga kuti “mundhu,” Sathana wakajekesa kuti kupumbha kwake akucaiendepi kuna Jobe basi, asi ku vandhu vese. Iri ifundo rinosisira maningi. Sathana aathembi kugondeka kwenyu kuna Mwari. Dhiabhu anodakarira kumuvona mecishaishira Mwari zve mopanduka mu gwanja renyu rakarungama panomuka zvineso. Sathana anoeja kuzviitisa kudini?

16. (a) Sathana anoeja kupausa vandhu va Mwari ngo njira japi? (b) Dhiabhu angashandisavo kudini njira iji kuna imwimwi?

¹⁶ Inga zvatakabhuya mu Cipauko 10, Sathana anoshandisa njira jakasiana-siana kuti aeje kupausa vandhu va Mwari. Iyena anorhwa “inga mbhondoro inofamba-famba yecibhoonga, yecipsanga mundhu kuti imuhe.” (1 Pedru 5:8) Ngo kudaro, kushanda ka Sathana kungavoneka pamunoshohwa ngo shamwari, vopaukama, kana vandhu vamweni ngo kuvangisira kwenyu kujija Bhaibheri no kushandisa zvamunojija. * (Johani 15:19, 20) Ngo divi rimweni, Sathana “anophindukavo kuita ndhumwa yo ubenengeri.” (2 VaKorinto 11:14) Dhiabhu anokwanisa kushandisa njira jicikanasi kuvoneka kuti amupause zve amukwevere kunja ko mararamiro anodiwa ndi Mwari. Iyena angashandisavo kuvora mwoyo kangaije zvomuitisa kuti muzwe inga mucina camunaco kuti mudakajise Mwari. (Mazwi Akangwara 24:10) Pikija Sathana eciita inga “mbhondoro inofamba-famba yecibhoonga,” kana kunyepejera kuva inga “ndhumwa yo ubenengeri,”  kuphikiza kwake akucinji: Iyena anonanga kuti pamunosongana no muejo, munozosia kushandira Mwari. Mungapingurisavo kudini kuphikiza ka Sathana zve mo khombija kugondeka kwenyu kuna Mwari, inga zvakaita Jobe?

17. Ngo rapi thangwe guru rinotiitisa kuti titeveje mupango ja Jehovha?

¹⁷ Mungapingura kuphikiza ka Sathana ngo kurarama mu njira inodakajisa Mwari. Izvi zvinobatanijenyi? Bhaibheri rinopingura kuti: “Unozoda [Jehovha] Mwari wako ngo mwoyo wako wese, ngo mwiha wako wese, ngo simba rako rese.” (Deuteronòmio 6:5) Panonga pecikura rudo hwenyu kuna Mwari, munozozajwa ngo cido co kuita zvaanoda kwamuri. Mupostori Johani wakatara kuti: “Ngokuti, kudisa Mwari ndikona kuteveja mupango yake.” Kudari mecida Jehovha no mwoyo wenyu wese, munozovona kuti “Mupango yake airemi.”—1 Johani 5:3.

18, 19. (a) Ngo japi mupango jimweni ja Jehovha? (Vonanyi bhokiso rinoti: “ Mucaita Zvinonyenywa ndi Jehovha.”) (b) Tinozvizivisa kudini kuti Mwari aatikumbiri zvaticikakwanisi?

¹⁸ Ngo japi mupango ja Jehovha? Jimweni jakona jinobatanija mufambiro jatinodikana kungwarira. Inga muezaniso, vonanyi bhokiso, rinoti “ Mucaita Zvinonyenywa ndi Jehovha.” Munozowanemo munda-nda-nda wo mufambiro inorambiswa ngo Bhaibheri. Pakutanga pamunorasira meso, zviito zvimweni zvakandandaniswa pondhopo zvinoita inga zvicizivi kunyanya kushata. Asi mukapera kurangarijisisa matahwa ari pondhopo, kangaije mungazovona uzivi hwo mutemo ja Jehovha. Kucinja mufambiro wenyu kangaije ringava riri dambujiko guru ramucikazivi kumbovonazve. Hina, kurarama mu njira inodakajisa Mwari kunoviisa mudakaro mukuru. (Isaia 48:17, 18) Izvi i zviro zvamungatokwanisa kuita. Tinozvizivisa kudini?

¹⁹ Jehovha aazombotikumbiri zvizinji zvaticikakwanisi kuita. (Verenganyi Deuteronòmio 30:11-14.) Iyena anonasa kuziva ushoni simba redu no patinogumira kupinda mazivire  atinozviita tega. (Nduyo 103:14) Kunja ka izvi, Jehovha anotipekeja simba ro kuti timupurutane. Mupostori Pauro wakatara kuti: “Mwari ndi mugondeki. Yena aatendi kuti muejwe kupinda simba renyu. Pakuejavo, yena anozomupsangira gwanja ro kubuda mu kuejwa uku, no simba ro kunyisa maejo.” (1 VaKorinto 10:13) Kuti amubesere ku cungirira, Jehovha angatomupa “simba rakakura.” (2 VaKorinto 4:7) Pauro naapera kucungirira muejo mu zinji, iyena wakapa zano iri: “Ndinokwanisa bzese ndiyena anondivangisa weya.”—VaFilipi 4:13.

20. Undhu hwa Mwari hwapi hwamunodikana kuva naho, zve ngenyi hunosisira?

²⁰ Zvokadi, panozvizinji zvinobatanijwa pa kudakajisa Jehovha kunja ko kutama kuita zvinonyenywa ndi Jehovha basi. Tinodikana kuva no rudo no zvaanoda. (VaRoma 12:9) Amuzwi mecida kuva phedo no vano mavonero akatojana no enyu, zvaanodakarira, zvaanopekeja mutengo here? Jehovha anozwavo zvondhozvo. Ngo kudaro, jijanyi kuda zvinodiwa ndi Jehovha. Zvimweni zvinonangwa pana (Verenganyi Nduyo 15: 1-5.) Patinoverenga ngo pamusoro po vaanovona inga shamwari jake. Shamwari ja Jehovha jinokhombija zvinodaninjwa ngo Bhaibheri inga “[“zvibereko,” NM] zvo Mujimu.” Izvi zvinobatanija undhu hwakadari inga “rudo, mudakaro, rugarisiko, kukova, kuthiva mwoyo, kupfava mwoyo, kudavirana, kutendana no kuziva kujibata.”—VaGalàsia 5:22, 23.

21. Cicinyi cinozomubesera kuti muve no undhu hunodika ndi Mwari?

²¹ Kuverenga no kujija Bhaibheri nguva jese, zvinozomubesera kuti muve no undhu hunodiwa na Jehovha. Zve kujija zvinoda Mwari, kunozomubesera kuti murangariro wenyu uzwirane no murangariro wa Mwari. (Isaia 30:20, 21) Pamunovangisa maningi rudo hwenyu kuna Jehovha, cido cenyu co kurarama mu njira inodakajisa Mwari cinozokuravo maningi.

22. Munonga makwanisa cinyi kudari mukararama mu njira inodakajisa Mwari?

²² Panodikana simba kuti murarame mu njira inodakajisa Jehovha. Bhaibheri rinoezanisira cinjo yo upenyu hwenyu inga kubvisa undhu hwenyu hwo kare zve mosimira hupsa. (VaKolosi 3:9, 10) Asi ngo pamusoro po mupango wa Jehovha, mu imbi wo nduyo wakatara kuti: “Kumateveja kunobesa.” (Nduyo 19:12) Imwimwivo munozovona kuti kurarama mu njira inodakajisa Mwari zvino mupfupo mukuru kamare. Ngo kuita kudaro, munozopa mupinguro wo kushora ka Sathana zve moita kuti mwoyo wa Jehovha udakare!