VaGaratiya 5:1-26
5 Kristu wakatisujunura kuti tiite vakasujunuka. Ngo kudaro batisisanyi rusujunuko hwenyu, mucatenderazve kudihwa kanga yo uranda.
2 Ngwariranyi! Inini Pauro ndinomuvhunja kuti mukatenda kusokwa,* Kristu apana caari kubesera komuri.
3 Ndinophindazve kuvhunja mundhu wese anosokwa* kuti, iyena anodikana kuteveja Mutemo wese.
4 Imwimwi munopsanga kudanwa varurami ngo pamusoro po Mutemo, maparajana na Kristu, mowira kunja ko unyasha hwake hucikaezaniswi.
5 Ngo divi redu, tinovetera ururami hunovha ku rutendo hwedu ngo mujimu.
6 Ngokuti, mukubatana na Kristu Jesu, kusokwa nokuti kutama kusokwa azvina mutengo, asi rutendo hunoshanda ngo rudo ndihwona uno mutengo.
7 Maigogoma zvakanaka. Ndiyani wakamuphinga kuti mutame kuzwira cokwadi?
8 Mushovo wo jijiso yakadaro auvhi ka Wiya anomudanija.
9 Zvimbijo zvidoko zvinokukumusa upfu hwese.
10 Ndinothemba kuti imwimwi makabatanari na Mambo amuzorangariri ngo njira imweni; asi wiya anomukhugunya, azvinenyi kuti ndiyani hake, anozotongwa inga zvaanofanera.
11 Kwandiri hama, kudari ndiri kucumaera ngo pamusoro po kusokwa,* ngenyi ndiciri kuteverehwa? Ngo kudaro, buwe rinokhugunya ro pa mutanda wokutambujikira* ravhiswa.
12 Inini ndaida kuti vandhu vanomuvhunjaro kuti sokwanyi,* ngavathenwe ivona kamare.*
13 Imwimwi hama makadanijihwa ku rusujunuko; asi mucashandisa rusujunuko uhu inga mukana wokupsaka zvido zvo nyama, mukusiyana, shandirananyi ngo cenyu ngo rudo.
14 Mutemo wese unogurisihwa ngo magama okuti: “Idai mudoni wako inga zvaunojiita.”
15 Kudari imwimwi mukaramba mecirumana no kuhana ngocenyu, ngwariranyi kuti mucapejana.
16 Ndinomuvhunja kuti: Rambanyi mecifamba mu mujimu, mukadaro amuzoiti zvido zvo nyama.
17 Ngokuti zvido zvo nyama zvinohwisana no mujimu, mujimu unohwisana no nyama; zvozviviri zvinozondana ngocazvo, zvomuita kuti mutame kuita zvamunoda.
18 Asi kudari mecitungamirihwa ngo mujimu, amuripi pasi po mutemo.
19 Mabasa o nyama anozivika pa mbhene: Uhure,* kutama kucena, mufambiro unopseruja,
20 kunamata cithombi, zvo mujimu, kuzondana, kuvereketesana, ushanje, ushungu, kutama kuzwana, kuparajana, kutevera jijiso jo vandhu,
21 cishatihwa, kumwa maningi doro, mabuso akanyanyisa, no zviro zvakadari. Ndiri kutanga ndamungwaja ngo pamusoro po zviro izvi, inga zvandakamungwaja kare kuti vaya vanoita zviro izvi avazogari utaka hwo Umambo hwa Mwari.
22 Ngo divi rimweni, mucero yo mujimu nga iyi: rudo, mudakaro, runyararo, kusengerera, kunaka mwoyo,* kukova,* rutendo,
23 kupfava, kujibata. Apana mutemo unorambisa kuita zviro izvi.
24 Ngokuti, vandhu va Kristu Jesu vakakohomera nyama pa mutanda no mazwiro ayo akavanga pamwepo no zvido zvayo.
25 Kudari tecipona ngo simba ra Mwari, ngatirambevo tecifamba mukuzwirana no simba ra Mwari.
26 Ngatiregere kuzvikuja, toregera kuphikizana ngocedu, tosiya cishatihwa.
Masoko o Pasi
^ Kana: “kucekwa suna.”
^ Kana: “anocekwa suna.”
^ Kana: “kucekwa suna.”
^ Vonanyi Kudurujihwa ko Magama.
^ Kana: “cekwanyi suna.”
^ Gama ngo Gama: “ngavajiite ngomwa,” ngo njira iyi, vanonga vacikasisirizve kukwanirisa mutemo wavanonyanyaro kubatisisa.
^ Vonanyi Kudurujihwa ko Magama.
^ Gama ro Cigiriki rinonangira mundhu anodakarira kugara ushoni ko vamweni.
^ Gama iri rinovha ku Cigiriki, rinoreva kuti “zvakanaka,” inga kunaka mwoyo. Mugariro wakanaka unokhombijwa ngo zviito zvo kubesera vamweni.
