Nduyo 119:1-176
-
Kuda soko ra Mwari
-
‘Majaha angaitisa kudini kuti gwanja ravo rienderere mberi rakacena?’ (9)
-
“Ndinodakarira maningi zviceukijo zvenyu” (24)
-
“Inini ndinodisisa mutemo wenyu!” (97)
-
“Ndinozwisisa kupinda vajijisi vangu vese” (99)
-
“Soko renyu icibani cinovhenekera soka jangu” (105)
-
‘Soko renyu rese icokwadi’ (160)
-
Vaya vanoda mutemo wa Mwari vano runyararo hukuru (165)
-
א [Arefi]
119 Vanodakara vaya vacina ndava mu gwanja ravo,Vaya vanofamba mukuzwirana no mutemo wa Jehovha.
2 Vanodakara vaya vanozwira zviceukijo zvake,Vaya vanomupsaka ngo mwoyo wese.
3 Ivona avaiti zvakashata;Vanofamba mu makwanja ake.
4 Imwimwi makativhunjaKuti tinase kuzwira mutemo yenyu.
5 Ndinoda maningi kugara ndakagondekaKuti ndizwire matongero enyu!
6 Ngo kudaro, inini andicaizonyowejekaPandaizorangarira ngo pamusoro po mupango yenyu yese.
7 Inini ndinozomusimba ngo mwoyo wakarungama,Pandinonga ndecijija matongero enyu akarurama.
8 Ndinozozwira matongero enyu
Mucandisiya ndiri ndega.
ב [Bheti]
9 Mujaha angaitisa kudini kuti gwanja rake rienderere mberi rakacena?
Iyena anodikana kuva akarinda no kuita zviro zvinozwirana no soko renyu.
10 Inini ndinomupsaka ngo mwoyo wangu wese.
Mucatendera kuti nditame kuzwira mupango yenyu.
11 Ndinoviga masoko enyu mu mwoyo mwanguKuti nditame kumushaishira.
12 Jehovha Mwari wangu, imwimwi munofanera kusimbhwa;Ndijijisenyi matongero enyu.
13 Ndinozivisa ngo muromo wanguMatongero enyu ese amakananga.
14 Ndinodakarira zviceukijo zvenyu zveseKupinda zviro zvimweni zvese zvinosisira.
15 Ndinozorangarijijisa* ngo pamusoro po mutemo yenyuNdozoita kuti majiso angu aenderere mberi akasota makwanja enyu.
16 Ndinodakarira maningi mutemo yenyu.
Andizokanganwi soko renyu.
ג [Gimeri]
17 Itiranyi zvakanaka mushandiri wenyu,Kuti inini ndipone no kuzwira soko renyu.
18 Fununguranyi majiso angu kuti inini ndinase kuvonaZviro zvinoshamaisa zviri mu mutemo wenyu.
19 Inini ndiri munyikanja mu nyika ino.
Mucandifisira mupango yenyu.
20 Njiku jese ndinonesekaNgo kuda kwandinoita matongero enyu.
21 Imwimwi munopangira vandhu vanojikuja,Vaya vakatukwa ngo ndava yo kutama kuzwira mupango yenyu.
22 Vhisanyi kwandiri kutukwa no kushohwa,Ngokuti ndinozwira zviceukijo zvenyu.
23 Pikija vatongi vakaungana vese pamwepo vecibhuya zviro zvakashata ngo pamusoro pangu,Mushandiri wenyu anorangarijisisa* ngo pamusoro po matongero enyu.
24 Ndinodakarira maningi zviceukijo zvenyu;Izvona zvinondipa mazano.
ד [Dhareti]
25 Inini ndagwadama pa bukuta.
Ndiponesenyi mukuzwirana no soko renyu.
26 Inini ndakamuzivisa makwanja angu, imwimwi makandidavira;Ndijijisenyi matongero enyu.
27 Itanyi kuti ndizwisise mutemo yenyu,Kuti inini ndirangarijisise* ngo pamusoro po zviito zvenyu zvinoshamaisa.
28 Andikwanisi kuvata ngokuti ndakacamwa maningi.
Ndivangisenyi mukuzwirana no soko renyu.
29 Ndapota, ndibesenyi kuti nditame kuva mundhu anonyepa,Ndiitirenyivo unyasha no kundijijisa mutemo wenyu.
30 Ndakasana kuva ndakagondeka kwamuri.
Ndinoziva kuti matongero enyu akarungama.
31 Ndinobatisisa zviceukijo zvenyu.
Jehovha Mwari wangu, mucandisiya ndecipserujwa.
32 Ndinozozwira matongero enyu ngo mwoyo wangu weseNgokuti imwimwi munoengejera kuzwisisa kwangu.
ה [He]
33 Jehovha Mwari wangu, ndijijisenyi kuti ndifambe mukuzwirana no matongero enyu,Inini ndinozomazwira mu upenyu hwangu hwese.
34 Itanyi kuti ndizwisise,Kuti ndizwire mutemo wenyuNo kuungwarira ngo mwoyo wangu wese.
35 Nditungamirirenyi kuti ndizwire mupango yenyu.Ngokuti ndinoidakarira.
36 Itanyi kuti mwoyo wangu ude zviceukijo zvenyu,No kuita kuti ndirambe kuemura.
37 Reesanyi majiso angu kuti atame kuvona zviro zvabiresi;Itanyi kuti ndifambe mu makwanja enyu kuti ndienderere mberi ndecipona.
38 Itiranyi mushandiri wenyu zvamakagondesa,Kuti vandhu vamuthye.
39 Vhisanyi zviro zvinopseruja zvandiri kuthya,Ngokuti matongero enyu akanaka.
40 Vonanyi kuda kwandinoita mutemo yenyu.
Ndiponesenyi mukuzwirana no ururami hwenyu.
ו [Wawi]
41 Jehovha Mwari wangu, ndikhombijirenyi rudo hwenyu hucikacinji,Ndiponesenyi mukuzwirana no zvamakagondesa;
42 Ngo kudaro, ndinozokwanisa kudavira wiya anondishora,Ngokuti ndinothemba soko renyu.
43 Mucavhisa masoko ocokwadi pamuromo pangu,Ngokuti ndiri kuvetera matongero enyu.
44 Ndinozoenderera mberi ndecingwarira mutemo wenyu,Mbhera narini, kwenda no kwenda.
45 Ndinozofamba mu ndau yakangwaririka,Ngokuti ndinojija mutemo yenyu kuti ndiizwire.
46 Ndinozobhuya ngo pamusoro po zviceukijo zvenyu pamberi po majimambo,Inini andizopseruki.
47 Ndinodakarira maningi mupango yenyu,Hina, inini ndinoida.
48 Inini ndinomusa nyara jangu kwamuri pandinoita mukumbiro, ngokuti ndinoda maningi mupango yenyu,Inini ndinozorangarijisisa* ngo pamusoro po matongero enyu.
ז [Zayini]
49 Ceukijanyi zvamakagondesa mushandiri wenyu,Ngokuti ndizvona zvinondipa vetero.
50 Zvamakagondesa ndizvona zvinondinyaraja pandinosongana no matambujiko,Ngokuti zvamakananga ndizvona zvinondiita kuti ndienderere mberi ndecipona.
51 Vandhu vanozvikuja vanondishora maningi,Asi inini andisii mutemo wenyu.
52 Jehovha Mwari wangu, ndinoceukija matongero enyu o mukuvo wo kare,Iwona anondinyaraja.
53 Ndakanyangajwa maningi ngo ndava yo vandhu vanoita zviro zvakashata,Vaya vanosiya mutemo wenyu.
54 Matongero enyu indumbo kwandiriKuri kwese kwandinogara.*
55 Jehovha Mwari wangu, cousiku ndinoceukija zina renyu,Kuti ndingwarire mutemo wenyu.
56 Ici ciri kuva cirovejeso canguNgokuti ndinozwira mutemo yenyu.
ח [Heti]
57 Jehovha imwimwi muri ndhaka yangu;Ndakagondesa kuzwira masoko enyu.
58 Ndinoviya kwamuri ngo mwoyo wangu wese;Ndiitirenyi unyasha mukuzwirana no zvandakagondesa.
59 Ndiri kupopora makwanja angu,Kuti ndihwirire no kuzwira zviceukijo zvenyu.
60 Inini andinonokiNdinokasika kungwarira mupango yenyu.
61 Mapote o vandhu vanoita zvakashata akanditendeneja,Asi inini andikanganwi mutemo wenyu.
62 Ndinomuka kuti ndimubonge pakati po usikuNgo ndava yo matongero enyu akarurama.
63 Ndiri shamwari yo vandhu vese vanomuthyaNo yo vandhu vese vanozwira mutemo yenyu.
64 Jehovha Mwari wangu, rudo hwenyu hucikacinji hunovoneka pa nyika yese;Ndijijisenyi matongero enyu.
ט [Teti]
65 Jehovha Mwari wangu, makataja ushoni mushandiri wenyu,Mukuzwirana no soko renyu.
66 Ndijijisenyi kuti ndive mundhu ano hwiru no uzivi,Ngokuti ndinothemba mupango yenyu.
67 Ndicito ndasongana no matambujiko, inini ndaishaisha ndicikazvidi,Asi wari ndinozwira zvamunonanga.
68 Imwimwi makanaka, mabasa enyu akanakavo.
Ndijijisenyi matongero enyu.
69 Vandhu vanozvikuja vanondinyepera zviro zvakawanda,Asi inini ndinozwira mutemo jenyu ngo mwoyo wangu wese.
70 Mwoyo yavo yakavoma,Asi inini ndinodakarira maningi mutemo wenyu.
71 Matambujiko andakasongana nawo akandibesa,Kuti inini ndikwanise kujija matongero enyu.
72 Mutemo wamakazivisa wakanaka maningi kwandiri,Kupinda goridhi no sirivha yakawanda maningi.
י [Yodhi]
73 Nyara jenyu jakandiita no kundiumba,
Itanyi kuti ndizwisise,Kuti ndijijire mupango yenyu.
74 Vaya vanomuthya vanodakara pavanondivona,Ngokuti soko renyu ndirona vetero yangu.
75 Jehovha Mwari wangu, ndinozviziva kuti matongero enyu akaruramaNdinozivazve kuti imwimwi makandipangira ngokuti imwimwi makagondeka.
76 Ndapota, rudo hwenyu hucikacinji ngahundinyaraje,Mukuzwirana no zvamakagondesa mushandiri wenyu.
77 Ndikhombijirenyi usizi kuti ndienderere mberi ndecipona,Ngokuti ndinodakarira maningi mutemo wenyu.
78 Vandhu vanozvikuja ngavanyowejwe,Ngokuti vanondinesa pacina thangwe
Asi inini ndinozorangarijisisa* mutemo yenyu.
79 Itanyi kuti vaya vanomuthya vabatanezve na inini,Vese vaya vanoziva zviceukijo zvenyu.
80 Mwoyo wangu ngauve ucina ndava pakuzwira matongero enyu,Kuti inini nditame kunyowejwa.
כ [Kafi]
81 Inini ndinoda ruponeso hwenyu,Ngokuti soko renyu ndirona vetero yangu
82 Majiso angu anoda soko renyuPandinonga ndecinanga kudari: “Munozondinyaraja rini?”
83 Ngokuti ndaita inga botiri* ravomeswa ngo usi.Asi andikanganwi matongero enyu.
84 Mushandiri wenyu anodikana kuvetera njiku ngana?
Munozoviisa rini rutongeso ku vandhu vese vaya vanonditambuja?
85 Vandhu vanozvikuja vacikazwiri mutemo wenyu,Vanoca rindi kuti inini ndiwiremo.
86 Mupango jenyu jese jinothembeka.
Vandhu vanonditambuja pacina thangwe, ndibesenyivo!
87 Ivona vakadondiuraya pa nyika,Asi inini andizivi kusiya mutemo yenyu.
88 Ndingwarirenyi kuti ndienderere mberi ndecipona ngo ndava yo rudo hwenyu hucikacinji,Kuti inini ndizwire zviceukijo zvamakananga.
ל [Ramedhi]
89 Jehovha Mwari wangu,Soko renyu rinozoenderera mberi riri kumatenga mbhera narini.
90 Kugondeka kwenyu kunogara kuripo ku mubarihwana yese.
Imwimwi makavangisa nyika, kuti iyona ienderere mberi iripo.
91 Mukuzwirana no mutemo yenyu, zviro zvese zvamakasika zviripo mbhera na nyamasi,Ngokuti zviro zvese zvinomushandira.
92 Kudari nondicikazivi kudakarira mutemo yenyu,Ndaizodari ndafa ngo ndava yo matambujiko angu.
93 Andizokanganwi mutemo yenyu,Ngokuti ndiyona yamakashandisa kuti mundiponese.
94 Inini ndiri wenyu, ndiponesenyi,Ngokuti ndinozwira mutemo yenyu.
95 Vandhu vanoita zvakashata, vari kuvetera kuti vandiuraye,Asi inini ndinozwira zviceukijo zvenyu,
96 Ndakavona kuti zviro zvese zvakanaka zvino pazvinogumira,Asi mupango wenyu auna magumo.
מ [Memi]
97 Inini ndinodisisa mutemo wenyu!
Ndinourangarijisisa* njiku jese.
98 Mupango wenyu unoita kuti ndive muzivi kupinda vavengi vangu,Ngokuti ndinawo mukuvo wese.
99 Ndinozwisisa kupinda vajijisi vangu vese,Ngokuti ndinorangarijisisa* zviceukijo zvenyu.
100 Inini ndinoita zviro ngo uzivi kupinda madhodha,Ngokuti ndinozwira mutemo yenyu.
101 Inini ndinoramba kufamba mu gwanja rakashata,Kuti ndizwire soko renyu.
102 Andisii matongero enyu,Ngokuti makandijijisa.
103 Masoko enyu anotapira maningi pa rurumi hwangu,Anotapira maningi mukanwa mwangu kupinda uci!
104 Inini ndinoita zviro ngo uzivi ngo ndava yo mutemo jenyu.
Ngo ndava yazvo, inini ndinonyenya makwanja ese akashata.
נ [Nuni]
105 Soko renyu icibani cinovhenekera soka jangu,Iruvheneko wo gwanja rangu.
106 Ndakaita mbhiko, inini ndinozoikwanirisa,Ndinozozwira matongero enyu akarurama.
107 Ndakatambujika maningi.
Jehovha Mwari wangu, ndingwarirenyi kuti ndienderere mberi ndecipona mukuzwirana no soko renyu.
108 Ndapota Jehovha, tenderanyi mupiro yangu yokumusimba,*Ndijijisenyi matongero enyu.
109 Upenyu hwangu huri pa ngozi mukuvo wese,Asi inini andikanganwi mutemo wenyu.
110 Vandhu vanoita zvakashata vanonditeera murau,Asi inini andisii mutemo yenyu.
111 Ndinoita kuti zviceukijo zvenyu zvive ndhaka yangu yo kwenda no kwenda,Ngokuti zvinodakajisa mwoyo wangu.
112 Inini ndasunga kuzwira matongero enyuMu mukuvo wese, mbhera kumagumo.
ס [Sameki]
113 Ndinonyenya vandhu vaya vacizivi* kugondeka kwamuri,Asi inini ndinoda mutemo yenyu.
114 Imwimwi muri citiziro cangu no muvhiko wangu,Ngokuti soko ndirona vetero yangu.
115 Imwimwi munoitaro zviro zvakashata, garanyi ndhambo na inini,Kuti inini ndizwire mupango ja Mwari wangu.
116 Mwari wangu, ndibesenyi inga zvamakapika,Kuti ndienderere mberi ndecipona;Mucatendera kuti vetero yangu indipseruje.
117 Ndibesenyi kuti inini ndipone;Ngo kudaro, inini ndinozorangarira ngo pamusoro po matongero enyu.
118 Imwimwi munoramba vese vaya vanosiya matongero enyu,Ngokuti ivona vanonyepa no kucengeja.
119 Imwimwi munosveja inga svina vandhu vese vanoita zvakashata pa nyika.
Ngo ndava yazvo, inini ndinoda zviceukijo zvenyu.
120 Kuthya kwandinomuita kunoita kuti muviri wangu utetemere;Inini ndinothya matongero enyu.
ע [Ayini]
121 Ndinoita zvakarurama no zvakarungama.
Mucandisiya mu nyara ja vaya vanondibzinyirira.
122 Vangisanyi mushandiri wenyu kuti agare ushoni;Mucatendera kuti vandhu vanozvikuja vandibzinyirire.
123 Majiso angu aremba ecivetera ruponeso hwenyuNo kukwanirisika ko cigondiso cenyu cakarurama.
124 Khombijiranyi rudo hwenyu hucikacinji mushandiri wenyu,Ndijijisenyi matongero enyu.
125 Ndiri mushandiri wenyu; ndipenyi uzivi,Kuti ndizwisise zviceukijo zvenyu.
126 Yaguma nguva yokuti Jehovha aite zviri zvese,Ngokuti ivona avazivi kuzwira mutemo wenyu.
127 Ngo kudaro, inini ndinoda mupango yenyuNdinoida kupinda goridhi, hina, kupinda goridhi rakanaka.
128 Ngo kudaro, ndhungamiriro jese jinovha kwamuri jakanaka kwandiri;Inini ndinonyenya makwanja ese akashata.
פ [Pe]
129 Zviceukijo zvenyu zvinoshamaisa.
Ngo ndava yazvo, inini ndinozvizwira.
130 Kusananguhwa ko masoko enyu kunoviisa ruvheneko,No kuita kuti vandhu vacina uzivi vazwisise.
131 Ndinofunungura muromo wangu ndofemeruka,Ngokuti ndinoda maningi mupango yenyu.
132 Hwiriranyi kwandiri, ndikhombijirenyi unyasha,Mukuzwirana no matongero enyu ku vaya vanoda zina renyu.
133 Nditungamirirenyi mukuzwirana na zviya zvamunonanga, kuti ndifambe ndakangwaririka;Mucatendera kuti ndinyiswe ngo zwiro zvakashata.
134 Ndiponesenyi mu nyara jo vandhu vanondibzinyirira,Inini ndinozozwira mutemo yenyu.
135 Itanyi kuti kumeso kwenyu kumonikire pamberi po mushandiri wenyu,Ndijijisenyi matongero enyu.
136 Musoji jiri kubuda mu majiso anguNgokuti vandhu avaripi kuzwira mutemo wenyu.
צ [Tsadhe]
137 Jehovha Mwari wangu, imwimwi makarurama,Matongero enyu akanaka.
138 Zviceukijo zvamunopa zvakaruramaIzvona zvinothembeka.
139 Kuvangisira kwandinoita kwakadari inga muriro uri kubwaka mu mwoyo mwangu,Ngokuti vavengi vangu vakakanganwa masoko enyu.
140 Masoko enyu akacena,Mushandiri wenyu anomada.
141 Ndiri mundhu acikasisiri no anoshohwa;Asi pikija zvakadaro, andikanganwi mutemo yenyu.
142 Ururami wenyu, iururami unogara kwenda no kwenda,Mutemo wenyu icokwadi.
143 Pikija ndisongane no matambujiko no kuneseka,Inini ndinoenderera mberi ndecidakarira mupango yenyu.
144 Ururami wo zviceukijo zvenyu ngo wo kwenda no kwenda.
Ndipenyi uzivi kuti ndienderere mberi ndecipona.
ק [Kofi]
145 Jehovha Mwari wangu, ndinomudaninja ngo mwoyo wangu wese. Ndidavirenyivo.
Ndinozozwira matongero enyu ese.
146 Ndinomudaninja, ndiponesenyi!
Ndinozozwira zviceukijo zvenyu.
147 Ndinomuka kunja kucito kwaeja kuti ndideketere kwamuri ndecikumbira besero,Ngokuti masoko enyu ndiwona anondipa vetero.
148 Kucito kukaeja inini ndinonga ndanasiririka kuti ndimuke,Kuti ndirangarijisise* masoko enyu.
149 Izwanyi izwi rangu ngo ndava yo rudo hwenyu hucikacinji.
Jehovha Mwari wangu, itanyi kuti ndienderere mberi ndecipona mukuzwirana no ururami hwenyu.
150 Vaya vano mufambiro unopseruja vaguma phedo na inini;Ivona vakaramba mutemo wenyu.
151 Jehovha Mwari wangu, imwimwi muri phedo,Mupango jenyu jese icokwadi.
152 Kuvhira kare, inini ndakajija ngo pamusoro po zviceukijo zvenyu,Zvamakadira kuti zvigare kwenda no kwenda.
ר [Reshi]
153 Sotanyi muvone kutambujika kwandiri kuita, mundibese.Ngokuti andikanganwi mutemo wenyu.
154 Ndijivirirenyi no kundiponesa;Itanyi kuti ndienderere mberi ndecipona mukuzwirana no zvamakagondesa.
155 Ruponeso uri ndhambo no vandhu vakashata,Ngokuti ivona avazwiri matongero enyu.
156 Jehovha Mwari wangu, usizi hwenyu hwakakura.
Ndingwarirenyi kuti ndienderere mberi ndecipona mukuzwirana no ururami hwenyu.
157 Vandhu vanonditeverera no vavengi vangu, vakawanda maningi;Asi inini andisii zviceukijo zvenyu.
158 Ndinonyangajwa maningi pandinovona vandhu vanocengeja,Ngokuti ivona avazwiri masoko enyu.
159 Vonanyi manera andinoda mutemo yenyu!
Jehovha Mwari wangu, ndingwarirenyi kuti ndienderere mberi ndecipona ngo ndava yo rudo hwenyu hucikacinji.
160 Soko renyu rese icokwadi,Matongero enyu ese akarurama anogara mbhera narini.
ש [Sini] kana [Shini]
161 Vatongi vanonditeverera pacina thangwe,Asi mwoyo wangu unoreremeja masoko enyu.
162 Ndinodakara ngo ndava yo masoko enyuInga mundhu wawana zviro zvakawanda maningi.
163 Ndinonyenya maningi manyepo.Inini ndinoda mutemo wenyu.
164 Inini ndinomusimba kanomwe pa njikuNgo ndava yo matongero enyu akarurama.
165 Vaya vanoda mutemo wenyu vano runyararo hukuru;Apana cinovakhugunya.*
166 Jehovha Mwari wangu, ndinovetera zviito zvenyu zvo ruponeso,Ndinozwira mupango jenyu.
167 Ndinozwira zviceukijo zvenyu,Inini ndinozvida ngo mwoyo wangu wese.
168 Ndinozwira mutemo yenyu no zviceukijo zvenyu,Ngokuti imwimwi munoziva zvese zvandinoita.
ת [Tawi]
169 Jehovha Mwari wangu, kucema kwangu ndecida besero ngakugume kwamuri.
Itanyi kuti ndizwisise mukuzwirana no soko renyu.
170 Kukumbira kwangu kuti mundiitire unyasha ngakugume kwamuri.
Ndiponesenyi, mukuzwirana no zvamakagondesa.
171 Ndinozomusimba mukuvo wese,Ngokuti imwimwi munondijijisa matongero enyu.
172 Ndinozoimba mumbo jinobhuya ngo pamusoro po masoko enyu,Ngokuti mupango jenyu jese jakarurama.
173 Nyara yenyu ngaive yakanasiririka kuti indibese,Ngokuti ndakasana kuzwira mutemo yenyu.
174 Jehovha Mwari wangu, ndinoda maningi ruponeso hwenyu,Ndinodakarira maningi mutemo wenyu.
175 Ndisiyenyi ndecipona kuti inini ndikwanise kumusimba;Matongero enyu ngaandibesere.
176 Ndakapauka inga vhuta rakasvejeka. Psakanyi mushandiri wenyu,Ngokuti andizivi kukanganwa mupango yenyu.
Masoko o Pasi
^ Kana: “Ndinozojija.”
^ Kana: “anojija.”
^ Kana: “ndijije.”
^ Kana: “ndinozojija.”
^ Kana: “Pa nyumba yandinogara inga munyikanja.”
^ Kana: “ndinozojija.”
^ Kana: “botiri rakaizwa ngo dovo ro cinyama.”
^ Kana: “Ndinoujija.”
^ Kana: “ndinojija.”
^ Gama ngo Gama: “mupiro yo kuzwipira ngo muromo wangu.”
^ Kana: “vano mwoyo muviri.”
^ Kana: “ndijije.”
^ Kana: “Kwavari apana buwe rinovakhugunya.”
