“Fundisa umntwana indlela okumele ahambe ngayo, lanxa esekhulile kasoze asuke kuyo.”—IZaga 22:6, INguqulo Yomhlaba Omutsha.

 “Khulisa umntwana ukuba ahambe ngendlela elungileyo; lapho esekhulile kayikuphambuka kuyo.”—IZaga 22:6, The Holy Bible in Ndebele.

 Abazali abafundisa abantwababo ukuthanda uNkulunkulu lokulalela imithetho yakhe bangaba leqiniso lokuthi ukwenza njalo kuzabanceda okwempilo yabo yonke.

 “Fundisa umntwana indlela okumele ahambe ngayo.” Amazwi lawa angahunyutshwa langokuthi “umfundise esesemncane umntwana indlela eqondileyo.” Ebhukwini leZaga kulamavesi amanengi akhuthaza abazali ukuthi babafundise abantwababo besesebancane izinto eziqondileyo okumele bazenze lalezo okumele bazixwaye. (IZaga 19:18; 22:15; 29:15) Lanxa kunjalo abazali bayananzelela ukuthi abantwana labo balenkululeko yokuzikhethela indlela abafuna ukuphila ngayo. Yikho abababambi ngamandla ukuthi benze lokhu abakufunayo kodwa bayabonisana labo njalo babancedise ukuthi benelise ukuzenzela izinqumo ezinhle nxa sebekhulile.—UDutheronomi 6:6, 7; KwabaseKholose 3:21.

 Ezinye ingcitshi ezichasisa iBhayibhili zithi umutsho othi “fundisa umntwana indlela okumele ahambe ngayo” utsho ukuthi “fundisa umntwana kusiya ngalokho ayikho khona,” kumbe kusiya ngalokho ayenelisa ukukwenza. Ingcazelo le ingazwakala ilengqondo kodwa ayisikho okutshiwo ngumutsho wesiHebheru ohunyutshwe ngokuthi “indlela okumele ahambe ngayo.” Umutsho lo utsho indlela eqondileyo futhi elungileyo. Ibhuku leZaga likhuluma ngendlela ezimbili umuntu angahamba kuzo. Eyinye ibizwa ngokuthi ‘yindlela yabalungileyo,’ ‘indlela yokuthembeka’ kumbe ‘indlela eyiyo.’ (IZaga 2:20; 4:11; 23:19) Ikanti eyinye ibizwa ngokuthi ‘yindlela yabaxhwalileyo,’ ‘indlela yesiphukuphuku’ kumbe ‘indlela engayisiyo.’ (IZaga 4:14; 12:15; 16:29) Yikho indlela umntwana “okumele ahambe ngayo” itsho ‘indlela eyiyo,’ eya ekuphileni okungapheliyo esitshelwa ngakho eLizwini likaNkulunkulu iBhayibhili.—IHubo 119:105.

 “Lanxa esekhulile kasoze asuke kuyo.” Izikhathi ezinengi nxa abazali bangafundisa umntwana indlela kaNkulunkulu eqondileyo uyayilandela okwempilo yakhe yonke. Kodwa lokhu akutsho ukuthi umntwana ofundiswe kuhle kasoze “asuke” endleleni eqondileyo kumbe angalaleli imithetho kaNkulunkulu. Ngokwesibonelo, nxa umuntu angatshona labantu abenza okubi angacina etshiya “izindlela eziqondileyo” abesesenza okubi. (IZaga 2:12-16; 1 KwabaseKhorinte 15:33) Kodwa nxa abazali bangafundisa abantwababo ukulandela imithetho kaNkulunkulu bayabe bebanceda ukuthi baphile impilo engcono kakhulu.—IZaga 2:1, 11.

 Isahluko 22 sikaZaga simumethe amazwi asinceda sibone ubuhle bokusebenzisa ukuhlakanipha okuvela kuNkulunkulu ezimeni ezitshiyeneyo. Amazwi lawo agcizelela ukuqakatheka kokuba lebizo elihle kuJehova, a esikuthola ngokuba ngabantu abathobekileyo, abaphanayo futhi abakhutheleyo. (IZaga 22:1, 4, 9, 29) Amanye amavesi asesahlukweni lesi wona atshengisa ukuthi labo abangalaleli imithetho kaNkulunkulu labacindezela abayanga kuzabahambela kubi.—IZaga 22:8, 16, 22-27.

 Lanxa amavesi amanengi akuZaga isahluko 22 engakhulumi ngokufundisa umntwana, asikhuthaza ukuthi siphile ngendlela ethokozisa uJehova futhi esinika intokozo yeqiniso. (IZaga 22:17-19) Nxa abazali bangafundisa abantwababo ukuthi baphile belandela leyondlela bayabe betshengisa ukuthi babafunela okuhle kakhulu.—Kwabase-Efesu 6:1-3.

 Bukela ividiyo le emfitshane ukuze ubone okumunyethwe libhuku leZaga.