“Akulasilingo esilehleleyo ngaphandle kwalezo ezijayelekileyo ebantwini. Lanxa kunjalo, uNkulunkulu uthembekile futhi kasoze avume ukuthi lilingwe ngalokho elingeke lenelise ukukubekezelela. Kodwa nxa selilingwa uzakwenza ukuthi kube lendlela yokuphunyuka ukuze lenelise ukuqinisela.”—1 KwabaseKhorinte 10:13, INguqulo Yomhlaba Omutsha.

 “Kalifikelwanga yikulingwa okungejayelekanga ebantwini. UNkulunkulu uthembekile, kayikuvuma ukuba lilingwe ngokungaphezu kwamandla enu; kodwa nxa ukulingwa kufika, uzakulinika indlela yokuphepha, ukuze libe lamandla okukuthwala.”—1 KwabaseKhorinte 10:13, The Holy Bible in Ndebele.

 Ivesi le ikhuluma ngokuthembeka kukaNkulunkulu okuyikho okwenza abantu bamthande. Labo abakhonza uNkulunkulu bethembekile abathandabuzi ukuthi uzabancedisa ikakhulu nxa behlangana lobunzima kumbe belingwa.

 “Akulasilingo esilehleleyo ngaphandle kwalezo ezijayelekileyo ebantwini.” Izinceku zikaNkulunkulu zingalingeka ukuthi zenze izinto ezingamthokozisiyo. Lanxa izilingo lezo zinzima, zijayelekile ngoba abanye abantu sebake bahlangana lazo. a Yikho abakhonza uNkulunkulu bangaba leqiniso lokuthi labo bangenelisa ukuqinisela nxa behlangana lezilingo lezo.

 “UNkulunkulu uthembekile.” UJehova b uNkulunkulu uthembekile futhi uqotho. Uhlala esigcina isithembiso sakhe sokuthi kasoze abatshiye abantu abamthandayo, abamlalelayo futhi abathembele kuye. (UDutheronomi 7:9; IHubo 9:10; 37:28) Yikho labo abamkhonzayo bangamthemba ukuthi uzazigcwalisa izithembiso ezimbili ezisevesini le.

 “Kasoze avume ukuthi lilingwe ngalokho elingeke lenelise ukukubekezelela.” UNkulunkulu utshengisa ukuthi uthembekile ngokungavumeli ukuthi izilingo zisikhulele size sehluleke ukuqinisela. Uyakwazi lokho ngamunye wethu angenelisa ukukuthwala.—IHubo 94:14.

 “Nxa selilingwa uzakwenza ukuthi kube lendlela yokuphunyuka ukuze lenelise ukuqinisela.” Kwesinye isikhathi uNkulunkulu angasikhipha isilingo kumbe anike umuntu osebunzimeni lokho akudingayo ukuze enelise ukuqinisela. Ngokwesibonelo, angamnika umoya wakhe ongcwele ukuze enelise ukwenza izinqumo ezinhle, amduduze ngamazwi aseBhayibhilini kumbe asebenzise abazalwane ukuthi bamncedise.—UJohane 14:26; 2 KwabaseKhorinte 1:3, 4; KwabaseKholose 4:11.

 Ivesi le itholakala encwadini umphostoli uPhawuli ayibhalela amaKhristu ayesebandleni leKhorinte. Esahlukweni lesi uPhawuli wakhuluma ngembali yabako-Israyeli ukuze axwayise abaseKhorinte. (1 KwabaseKhorinte 10:11) Uqamba izilingo ezitshiyeneyo abako-Israyeli abahlangana lazo ezigoqela ukukhonza izithombe lokuziphatha kubi. (1 KwabaseKhorinte 10:6-10) Abanye babo bawela ezilingweni lezi. Yikho uPhawuli wasebenzisa isibonelo sabako-Israyeli ukuze akhumbuze amaKhristu ukuthi akungamelanga azithembe kakhulu ngokuzitshela ukuthi ngeke awele ezilingweni. (1 KwabaseKhorinte 10:12) Kodwa ku-1 Khorinte 10:13 wabatshela amazwi akhuthazayo. Wathi labo abakhonza uNkulunkulu bethembekile bangenelisa ukumelana laloba yisiphi isilingo.

 Bukela ividiyo le emfitshane ukuze ubone okumunyethwe libhuku lokuqala labaseKhorinte.