Kungabanzima ukuthi lithokoze emulini yenu nxa lihlala licabangelana okungayisikho futhi lingathembani. Pho ungenzani ukuze ungabi lobukhwele obudlulisa amalawulo?

Okusesihlokweni lesi

•  Kuyini ubukhwele?

•  Kuyini okwenza umuntu abe lobukhwele obungaqondanga?

•  Ungakubalekela njani ukuba lobukhwele?

•  Nxa omunye wakho elobukhwele

•  Ongacabanga ngakho

 Kuyini ubukhwele?

 Ibala elithi “ubukhwele” libanzi. Esihlokweni lesi lisetshenziswe ukuchasisa indlela ozwa ngayo nxa ucabanga ukuthi kulomuntu ohawukela umkakho kumbe ucabanga ukuthi umkakho usezidlisa satshanyana komunye umuntu. Ungabe usubona angani umtshado wakho ususengozini. Nxa kuyikuthi okucabangelayo kuliqiniso kuyabe kuqondile sibili ukuthi ube lobukhwele. Phela umtshado ngowababili kuphela, yikho abatshadileyo kumele benze konke okusemandleni abo ukuze bazivikele kuloba yini engabaphambanisa.

 Isimiso esiseBhayibhilini: “Kabasebabili kodwa sebenyamanye. . . . Lokho uNkulunkulu asekuhlanganisile akungabi lomuntu okwehlukanisayo.”—UMathewu 19:6.

 “Ubukhwele singabufanisa lento esixwayisayo nxa sekulomlilo. Yikho nxa kulento esifuna ukuphambanisa umtshado wenu kumele lithathe inyathelo masinyane.”—UBenjamin.

 Ubukhwele obungaqondanga bona bubangelwa yikwesaba umnyama ongelampisi lokuhlala ucabangela omunye wakho kungelalutho olwenzakalayo. Kodwa nxa silothando lweqiniso asisoze sibe lobukhwele obudlulisa amalawulo. (1 KwabaseKhorinte 13:4, 7) Esinye isikhwicamfundo okuthiwa nguRobert L. Leahy sathi: “Okucina kusenziwa [ngumuntu olobukhwele obungaqondanga] kungalimaza ubudlelwano ayabe esithi uzama ukubuvikela.” a

 Kuyini okwenza umuntu abe lobukhwele obungaqondanga?

 Okungenza ube lobukhwele yikuthi ungabe wake watshada lomuntu owacina umtshiya ngenxa yokungathembeki kwakhe. Kumbe kungenzakala ukuthi abazali bakho behlukana ngenxa yokungathembeki komunye wabo. Lokhu kungenza wesabe ukuthi lawe ungehlelwa yinto efananayo.

 “Ubaba wehlukana lomama ngisesemncane yikho lami kunzima ukuthi ngithembe abanye abantu. Lokhu kwangilimaza kakhulu okokuthi lakhathesi kunzima ukuthi ngithembe umkami.”—UMelissa.

 Okunye okungabangela ukuthi ucine usulobukhwele obungaqondanga yikuhlala ucabangela ukuthi abanye abantu bafuna ukudiliza umtshado wakho. Ungazitshela lokuthi nxa umkakho ubengathola ithuba angakutshiya ayezihlalela lomunye umuntu.

 “Umkami wacelwa ngumngane wakhe ukuthi amkhaphe emtshadweni wakhe. Lokhu kwakusitsho ukuthi ngezinye izikhathi kwakuzamele agide lomunye owesifazana ayekhaphe laye. Akuzange kungiphathe lokhu yikho wacina engasakhaphanga.”—UNaomi.

 Izinto ezenziwa emitshadweni ziyatshiyana, yikho amaKhristu kumele aqondiswe yizimiso eziseBhayibhilini. Kambe uNaomi kwakumele akhathazeke kangako yini esimeni lesi? Nxa esecabanga ngakho uyakubona ukuthi wayekhulelwa yibukhwele lokuthi kwakungamelanga akhathazeke. Uthi: “Ngangiphongukhulelwa yibukhwele nje, ngangicabanga ukuthi umkami ungiqathanisa labanye abesifazana kodwa yena wayenganjalo.”

 Kungelani lokuthi kwenzakalani, ubukhwele bungenza ucabangele omunye wakho okungayisikho. Ukungathembi umkakho kungaphambanisa umtshado wenu kulimaze lempilakahle yakho.

 Isimiso esiseBhayibhilini: “Umhawu unjengemvukuzane.”—IZaga 14:30, Easy-to-Read Version.

 Ungakubalekela njani ukuba lobukhwele?

 Thembanani. Kulokuthi ukhangele izinto ezikwenza ucabange ukuthi omunye wakho kathembekanga cabanga ngalokho akwenzayo okwenza umthembe.

 “Ngihlala ngicabanga ngobuntu obuhle umkami alabo. Nxa elalelisisa omunye umuntu akhuluma laye kungenxa yokuthi ulendaba labanye hatshi ukuthi kukhona okukhona. Kumele ngihlale ngizikhumbuza ukuthi ukungaphumeleli komtshado wabazali bami akutsho ukuthi lowami uzaba njalo.”—UMelissa.

 Zibuze ukuthi okucabangelayo yikho yini. Isikhwicamfundo uLeahy esike sakhuluma ngaso sabhala sathi: “Ngezinye izikhathi sisuke sikholwe ukuthi esikucabangayo yikho sibili. Khonokho nje kuhle kube yibufakazi bokuthi siqinisile. Kodwa ukuzitshela ukuthi into ethile iliqiniso ngoba uyikholwa akuyenzi ibe liqiniso.” b

 “Ukukhangela okwenzakalayo besesicabangela ukuthi kukhona okutshaya amanzi kungasidalela uhlupho olungadingakaliyo.”—UNadine.

 Khuluma okukukhathazayo. Kungelani lokuthi kuyini okubangela ukuthi ube lobukhwele, tshela umkakho indlela ozwa ngayo. Ngemva kwalokho xoxani ngokuthi kuyini elingakwenza ukuze omunye angaphatheki kubi.

 “Nxa lixoxa indaba ezinje hlala ukhumbula ukuthi omunye wakho kahlosanga ukukuzwisa ubuhlungu lokuthi laye uyafisa ukuthi umtshado wenu ungaphambaniseki. Kungenzakala ukuthi wena nguwe ocatshulwa yizinto ezincane kumbe ukhangelele okunengi komunye wakho. Mhlawumbe omunye wakho kakunanzeleli ukuthi kakuphathi ngendlela okhangelele ngayo.”—UCiara.

 Isimiso esiseBhayibhilini: “Umuntu ngamunye kangazifuneli okunceda yena kodwa kaqhubeke esenza okunceda abanye.”—1 KwabaseKhorinte 10:24.