IBhayibhili lathi ezinsukwini zokucina kuzakuba lemikhuhlane emibi eyayizahlupha abantu emhlabeni wonke. (ULukha 21:11) Abanye abantu bacabanga ukuthi imikhuhlane le luswazi oluvela kuNkulunkulu kodwa ayisikho okufundiswa liBhayibhili. UNkulunkulu uzasebenzisa uMbuso wakhe ukuthi aqede yonke imikhuhlane.

•  IBhayibhili lithini ngemikhuhlane?

•  UNkulunkulu wake wajezisa abantu esebenzisa imikhuhlane yini?

•  Imikhuhlane luswazi oluvela kuNkulunkulu yini?

•  Imikhuhlane izake iphele yini?

•  Amavesi aseBhayibhilini amayelana lemikhuhlane

 IBhayibhili kaliyiqambi ngamabizo imikhuhlane enjengeCOVID-19, i-AIDS leSpanish Flu, kodwa liyakhuluma ngemikhuhlane emibi langomkhuhlane obulalayo.” (ULukha 21:11; ISambulo 6:8) Imikhuhlane iyisibonakaliso ‘sensuku zokucina’ kumbe ‘isiphetho somumo wezinto.’—2 KuThimothi 3:1; UMathewu 24:3.

 Ye. Abanye wabajezisa ngobulephero. (AmaNani 12:1-16; 2 AmaKhosi 5:20-27; 2 ImiLando 26:16-21) Kodwa lesi kwakuyisijeziso esasiqondane lalabo ababengamlaleli uNkulunkulu. Yikho umkhuhlane lo abazange bawuthelele abanye.

 Abanye abantu bacabanga ukuthi imikhuhlane luswazi uNkulunkulu ajezisa ngalo abantu namuhla kodwa lokhu ayisikho okufundiswa liBhayibhili.

 Kulabantu ababekhonza uNkulunkulu bethembekile abake bahlaselwa yimikhuhlane. Ngokwesibonelo, iBhayibhili lithi uThimothi wayehlala egula. (1 KuThimothi 5:23) Kodwa lokho akutsho ukuthi uNkulunkulu wayemjezisa. Lanamuhla izinceku zikaNkulunkulu ziyake zigule kumbe zibanjwe yimikhuhlane ethelelwanayo. Izikhathi ezinengi lokhu kubangelwa yikuthi izinto ezinjalo zehlela abantu bengalindelanga.—UmTshumayeli 9:11.

 Isikhathi sokuthi uNkulunkulu ajezise abantu ababi asikafiki ngoba iBhayibhili lithi ‘leli lilanga lensindiso,’ okutsho ukuthi uNkulunkulu unike abantu ithuba lokuthi bafunde ngaye ukuze basindiswe. (2 KwabaseKhorinte 6:2) Yikho umsebenzi wokutshumayela ‘izindaba ezinhle zoMbuso’ usenziwa emhlabeni wonke.​—UMathewu 24:14.

 Ye. IBhayibhili likwenza kucace ukuthi uNkulunkulu uzasebenzisa uMbuso wakhe ukuze aqede konke ukugula futhi isikhathi leso sesiseduze kakhulu. (U-Isaya 33:24; 35:5, 6) Uzaqeda konke ukuhlupheka, ubuhlungu kanye lokufa. (ISambulo 21:4) Abantu abafileyo bazavuswa baphile emhlabeni ongelamikhuhlane sebethokoza kakhulu.—IHubo 37:29; ImiSebenzi 24:15.

 ISambulo 6:8: ‘Ngasengibona ibhiza eliliganu! Owayehlezi phezu kwalo wayebizwa ngokuthi nguKufa futhi iNgcwaba lalimlandela eduze. Baphiwa amandla okuthi babulale ngomkhuhlane obulalayo.’

 Okutshiwo yivesi le: Isiphrofetho sabagadi bamabhiza abane okukhulunywa ngabo kuSambulo sitshengisa ukuthi kwakuzakuba lemikhuhlane emibi ngesikhathi sethu.