Nxa ulomngane olomkhuhlane ohlasela ingqondo, ungacabanga ukuthi akulandlela ongamncedisa ngayo. Kodwa ungatshengisa ukuthi uyamthanda umngane wakho ngokumncedisa ngohlupho alalo. Ungakwenza njani lokhu?

‘Phangisa ukulalela.’—UJAKHOBE 1:19.

Eyinye indlela engcono kakhulu ongamncedisa ngayo umngane wakho yikumlalela. Kodwa ungacabangi ukuthi sokumele ube lempendulo yayo yonke into ayikhulumayo. Vuma nxa ekhuluma njalo utshengise ukuthi ulendaba laye. Zama ukuzwisisa indlela angabe ezizwa ngayo futhi ungamahluleli. Khumbula ukuthi kwezinye izikhathi angatsho izinto ayabe engahlosanga ukuzitsho abesezisola ngazo.—UJobe 6:2, 3.

‘Umduduze.’—1 KWABASETHESALONIKA 5:14.

Umngane wakho engabe ekhathazekile ezizwa engumuntu ongelancedo. Lanxa ungabe ungakwazi ukuthi uthini kuye, ungamduduza njalo umkhuthaze ngokumtshela ukuthi ulendaba laye.

“Umngane oqotho ulothando ngazo zonke izikhathi.”—IZAGA 17:17.

Cela ukumncedisa. Ungazitsheli ukuthi uyakwazi ukuthi ufuna ukuncedwa njani, mbuze ukuthi kuyini ongamenzela khona. Nxa kunzima ukuthi akutshele ukuthi ufuna ukuncediswa njani, mcele ukuthi lenze ezinye izinto ndawonye, njengokuhambahamba nje litshaywa ngumoya. Ungacela ukuyamthengela izinto angabe ezifuna, ukumklinela kumbe ukumenzela eminye imisebenzi.—KwabaseGalathiya 6:2.

 ‘Bekezela.’—1 KWABASETHESALONIKA 5:14.

Kulezikhathi lapho umngane wakho angabe engafuni ukukhuluma khona. Mqinisekise ukuthi uzamlalela nxa esekhululekile ukuxoxa. Kwesinye isikhathi angakhuluma loba enze into ezakuzwisa ubuhlungu. Angacaphuka masinyane kumbe azwe kungasatsho ukuthi lenze lokhu ebelihlele ukukwenza. Mbekezelele njalo uzame ukumzwisisa.—IZaga 18:24.

“Ngiba leqiniso lokuthi ngingumngane oseduze, angamthemba. Lanxa ngiyabe ngingelandlela yokulungisa uhlupho alalo, ngiyalalelisisa nxa ekhuluma. Kwesinye isikhathi uyabe efuna ukulalelwa nje ukuze azizwe ngcono.”—UFarrah, a olomngane olohlupho lokungadli kuhle, olokukhathazeka lolokuhlulukelwa.

“Omunye umngane wami ulomusa futhi uhlala engikhuthaza. Wake wanginxusa ngakibo safika sadla ukudla okumnandi. Ngazibonela sibili ukuthi uyangithanda okwenza kwaba lula ukuthi ngimtshele indlela engizizwa ngayo. Ngasuka lapho ngiduduzekile!”—UHa-eun, ohlutshwa yikuhlulukelwa.

“Ukubekezela kuqakathekile. Nxa umkami engangicaphula, ngihle ngizitshele ukuthi kubangelwa yikugula, yena kanjalo vele. Lokhu kuyanginceda ukuthi ngimzwisise futhi ngingavuki ngolaka.”—UJacob, olomkakhe ohlutshwa yikuhlulukelwa.

“Umkami uhlala engincedisa kakhulu njalo engisekela. Nxa ukukhathazeka sokungikhulela, kangibambi ngamandla ukuthi ngenze into engingafuni ukuyenza. Ngezinye izikhathi lokhu kuyabe sokusitsho ukuthi ayekele ukwenza into ayithandayo. Lokhu kwenza ngimthande kakhulu ngoba ulomusa njalo uyabekezela.”—U-Enrico, olohlupho lokukhathazeka.