UNicolas loCéline bona bahlangana lobunye ubunzima. Igatsha laseFrance labacela ukuthi bathuthele kwelinye ibandla. Bathi: “Saqalisa sithabile sibili, kodwa ngemva kwesikhathi sasesikhanuka abangane bethu. Sasingakabajayeli kangako abafowethu ebandleni elitsha.” a Lanxa kulobunzima, ungenzani ukuze uthokoze futhi ulijayele ibandla elitsha? Abanye bangakuncedisa njani? Ungenzani ukuze ukhuthaze abanye ebandleni osungena kulo futhi labo bangakukhuthaza njani?

IZINTO EZINE EZINGAKUNCEDA

1. Thembela kuJehova. (Hubo. 37:5) Udadewethu okuthiwa nguKazumi ohlala eJapan wasuka ebandleni ayesengene lalo okweminyaka engu-20 ngenxa yokuthi umkakhe wayesesiyasebenzela kwenye indawo. Wenzani ukuze ‘avumele uJehova amqondise’? Uthi: “Ngangihlala ngithandaza kuJehova ngimtshela okusenhliziyweni yami, engangikwesaba, okwakungikhathaza kanye lesizungu engangilaso. Ngangisithi ngingenza njalo anginike amandla.”

Ungenzani ukuze umthembe kakhulu uJehova? Akuphonguzenzakalela nje ukuthi ukholo lwethu luqine. Ukholo lufanana lesilimo. Isilimo sifuna amanzi lomhlabathi ovundileyo ukuze sikhule kuhle. UNicolas esike saxoxa ngaye wancedwa yikucabangisisa ngalokho okwenziwa ngu-Abrahama, loJesu loPhawuli. Amadoda la ayezinikele ukwenza intando kaNkulunkulu. Lokhu kwamnceda waqiniseka ukuthi uJehova wayezahlala emsekela. Ukubala iBhayibhili nsuku zonke kuzakunceda ukuthi ulwisane lobunzima ongahlangana labo. Kanti njalo uzathola lamagugu ongawatshela abanye ebandleni elitsha ozabe usungena kulo.

 2. Ungaqathanisi ibandla owawukulo lalelo osukulo. (Umtshu. 7:10) Omunye umzalwane okuthiwa nguJules wathi esuka eBenin esiya e-United States wathola ukuthi indlela abenza ngayo izinto itshiyene kakhulu lalokho ayekujayele. Uthi, “Ngangisizwa angani kwakumele ngitshele wonke umuntu engangiqalisa ukuhlangana laye konke okumayelana lami.” Waqalisa ukuzehlukanisa labafowethu labodadewethu ngoba wayengakujayelanga lokho. Wathi esebajayele abafowethu labodadewethu waqalisa ukubona izinto ngenye indlela. Uthi: “Khathesi sengikholwa ukuthi loba ngaphi lapho esingabe sikhona abantu bayafanana nje. Indlela abakhuluma ngayo lezenzo zabo yikho kuphela okutshiyeneyo. Okuqakathekileyo yikubamukela benjengoba benjalo.” Ngakho ungaqathanisi ibandla osukulo lalelo owawukulo. Omunye udadewethu oliphayona okuthiwa ngu-Anne-Lise wathi, “Angithuthelanga ukuthi ngiqhubeke ngicabanga ngezinto engizitshiye emuva, kodwa ngathuthela ukuthi ngifunde izinto ezintsha.”

Abadala labo akumelanga baqathanise ibandla ababekulo lalelo asebekulo khathesi. Nxa abazalwane besenza izinto ngendlela etshiyene laleyo ezazisenziwa ngayo ebandleni owawukulo, akutsho ukuthi bayaphambanisa. Kuqakathekile ukuthi uqale uzwisise ukuthi kungani izinto zisenziwa ngendlela ethile ebandleni lelo ungakalethi imibono yakho. (Umtshu. 3:​1, 7b) Okungcono yikuvumela abazalwane bafunde ngokukhangela lokho wena okwenzayo kulokuthi ubabambe ngamandla ukuthi balandele imibono yakho.—2 Khor. 1:24.

3. Yenza okunengi ebandleni elitsha. (Flp. 1:27) Lanxa ukuthutha kudinga isikhathi esinengi lamandla, kuqakathekile ukuthi ufika nje endaweni entsha uhle uqalise ukungena imihlangano labanye. Phela kungaba nzima ukuthi abazalwane bakuncedise nxa bengakwazi kumbe bengajayelanga ukukubona emihlanganweni. Omunye udadewethu okuthiwa nguLucinda wathuthela kwelinye idolobho elikhulu eSouth Africa lamadodakazi akhe amabili. Uthi: “Abangane bami bangikhuthaza ukuthi ngijayelane labanye ebandleni engasengikulo, ngitshumayele labo futhi ngiphendule lasemihlanganweni. Savuma lokuthi kwenzelwe umhlangano wokuya ekutshumayeleni endlini yethu.”

‘Ukusebenza ndawonye’ labafowenu labodadewenu ebandleni lakho elitsha lisenza imisebenzi yenkonzo kuzaqinisa ukholo lwenu. U-Anne-Lise esike saxoxa ngaye wakhuthazwa ngabadala ukuthi azame ukutshumayela lomuntu wonke ebandleni. Kwamnceda ngani lokho? Uthi: “Ngananzelela ukuthi ukwenza njalo kwakunginceda ukuthi ngijayelane labanye ebandleni.” Nxa ungazinikela ukuncedisa ekuklineni lasekulungisiseni iWolu yoMbuso, abazalwane ebandleni lakho elitsha bazabona sibili ukuthi usungomunye wabo. Nxa ungenza okunengi ebandleni, bazaphangisa ukukujayela futhi lawe uzabona sebeyimuli yakho sibili.

4. Dinga abangane abatsha. (2 Khor. 6:​11-13) Ukutshengisa ukuthi ulendaba labanye yindlela  engcono engakunceda ukuthi ube labangane. Ngakho zinike isikhathi sokuxoxa labazalwane imihlangano ingakaqalisi lalapho isiphelile. Zama ukwazi amabizo abo. Ukukhumbula amabizo abantu lokuba lomusa kuzakwenza ukuthi bakuthande ubususiba labangane.

Kulokuthi uzame ukuzitshintsha usenzela ukuthi abantu bakuthande, yekela abangane bakho abatsha bakufunde ukuthi vele ungumuntu onjani. Ungenza lokho okwenziwa nguLucinda, uthi: “Khathesi sesilabangane abanengi ngoba kasizange sithikaze ukunxusa abanye emzini wethu.”

“YAMUKELANANI”

Abanye kungabethusa ukuya eWolu yoMbuso egcwele abantu abangabaziyo. Manje singenzani ukuze abantu ababuya eWolu yethu bakhululeke? Umphostoli uPhawuli wathi: “Yamukelanani njengoba nje loKhristu walamukela.” (Rom. 15:7) Nxa abadala bangalingisela uKhristu bangenza ukuthi abantu abayabe bebuye ebandleni labo bakhululeke. (Khangela ibhokisi elithi “ Okuzakunceda Nxa Uthuthele Ebandleni Elitsha.”) Lanxa kunjalo, bonke nje ebandleni kugoqele labantwana bangaba lobungane labasanda kufika ebandleni.

Lanxa ukwamukela abanye kugoqela ukubanxusa emizini yethu, kumele sibancedise langezinye izinto abangabe bezidinga. Omunye udade wazinika isikhathi sokubhoda lodade owayesanda kufika ebandleni labo emtshengisa idolobho kanye lendawo okugadelwa kuzo. Lokhu kwamthokozisa udade lo owayemutsha futhi kwamnceda ukuthi ajayele indawo.

ITHUBA LOKUTHUTHUKA

Nxa intethe ikhula iyahluba isikhumba sayo kanengi ingakenelisi ukuphapha. Lathi nxa singathuthela kwelinye ibandla kungadingeka ukuthi sihlube loba yini engasivimbela ukuthi siphaphe ukuze sithuthuke. UNicolas loCéline bathi, “Ukuthutha kuyakufundisa izinto ezinengi. Kwasekumele sibe lobunye ubuntu esasingelabo ngenxa yokuthi sasesisebantwini esingabajayelanga lasendaweni  esingayijayelanga.” UJean-Charles esikhulume ngaye ekuqaliseni uyasitshela ukuthi imuli yakhe kuyincede njani ukuthutha. Uthi: “Ebandleni esesikulo abantwabethu bayathuthuka. Ngemva kwezinyanga ezilutshwana nje, indodakazi yethu yaqalisa ukwenza izinkulumo emihlanganweni yaphakathi kweviki njalo indodana yethu yaba ngummemezeli ongabhabhathizwanga.”

Ungenzani nxa kuyikuthi izimo zakho azikuvumeli ukuthi uthuthe, mhlawumbe usiya lapho okulabamemezeli abalutshwana khona? Ungazama ukusebenzisa okunye esixoxe ngakho lapha ukuze ukholise ebandleni oyabe ukulo. Thembela kuJehova futhi wenze imisebenzi eminengi ebandleni. Ngokwesibonelo ungahlela ukutshumayela labanye kumbe ukudinga abangane abatsha loba ukuvuselela olabo. Okunye ongakwenza yikuncedisa abatsha ababuya ebandleni kumbe abaswelayo. Njengoba amaKhristu kumele aziwe ngokuba lothando, ukwenza izinto lezi kuzakunceda ukuthi uthuthuke. (Joh. 13:35) Qiniseka ukuthi “imihlatshelo enjalo iyamthokozisa kakhulu uNkulunkulu.”—Heb. 13:16.

AmaKhristu amanengi abunqobile ubunzima obubakhona nxa umuntu ethuthela kwelinye ibandla njalo lawe ungabunqoba. U-Anne-Lise uthi: “Ukutshintsha amabandla kwanginceda ukuthi ngijayelane labantu abanengi.” UKazumi kasathandabuzi ukuthi nxa ungathuthela kwelinye ibandla “ungabona indlela ezitshiyeneyo uJehova ayabe ekusekela ngazo.” UJules yena uthi: “Abangane esengilabo bangenza ngizizwe ngikhululekile. Ngiyakholisa kakhulu ebandleni esengikulo okokuthi kungaba nzima lokuthi ngisuke.”