“Ngisesengumntwana ubhudi wami wayehlala engitshela amazwi abuhlungu futhi engitshaya nsuku zonke. Sengitshadile umamazala laye wayengiphatha kubi. Yena lobabazala babengiphatha njengesigqili. Ngasengihlala ngicabanga ukuzibulala.”—UMadhu, a India.

 Inhlanganiso okuthiwa yi-World Health Organization ibika ukuthi “ukuhlukuluzwa kwabesifazana sekwandile emhlabeni wonke.” Ithi kukhanya owesifazana oyedwa kwabathathu uyatshaywa kumbe ahlukuluzwe emacansini.

 Nxa lokhu kwake kwenzakala kuwe, ungabe ungakhululekanga loba ngaphi lapho okhona usesaba ukuthi omunye umuntu angakutshela amazwi abuhlungu kumbe akuphathe kubi loba akuhlukuluze emacansini. Mhlawumbe usubona angani abesifazana abaqakathekanga ngenxa yokuthi abantu abanengi bahlala bebaphatha kubi. Kodwa uNkulunkulu uyabaqakathekisa yini abesifazana?

 IBhayibhili lithi: “[UNkulunkulu] wadala owesilisa lowesifazana.”—UGenesisi 1:27.

 Okutshiwo yivesi le: UNkulunkulu wadala owesilisa lowesifazana. Bobabili uyabaqakathekisa futhi ufuna bahlonitshwe. Kanti njalo ukhangelele ukuthi indoda ‘ithande inkosikazi yayo ngendlela ezithanda ngayo.’ Ingabi lesihluku kumkayo ngamazwi kumbe ngezenzo. (Kwabase-Efesu 5:33; KwabaseKholose 3:19) Kuyacaca ukuthi uNkulunkulu uyabaqakathekisa abesifazana.

 “Ngisesengumntwana ngahlukuluzwa emacansini yizihlobo zami. Sengileminyaka engu-17, umqatshi wami wayefuna ngilale laye esithi ngingayekela uyangixotsha umsebenzi. Sengikhulile umkami, abazali kanye labomakhelwane babengikhangelela phansi. Kodwa ngacina ngifunde ngoJehova b uMdali wethu. Ngafunda ukuthi uyabaqakathekisa abesifazana futhi ufuna bahlonitshwe. Lokhu kwangiqinisekisa ukuthi uyangithanda lokuthi ngiligugu kuye.”—UMaria, Argentina.

 IBhayibhili lithi: “Ukhona umngane oba qotho kuwe ukwedlula umfowenu.”—IZaga 18:24.

 Okutshiwo yivesi le: Umngane weqiniso angakunceda. Nxa kuvuma, xoxa lomuntu omthembayo umthululele isifuba sakho.

 “Okweminyaka engu-20 angizange ngitshele muntu ukuthi ngake ngabanjwa iganyavu. Lokhu kwabangela ukuthi ngingathokozi, ngikhathazeke njalo ngihlale ngihlulukelwe. Kodwa ngathi sengixoxele omunye owayezimisele ukungilalela ngezwa angani ngethulwe umthwalo osindayo.”—U-Elif, Türkiye.

 IBhayibhili lithi: “Liphosele [kuNkulunkulu] konke okulikhathazayo ngoba yena ulendaba lani.”—1 UPhetro 5:7.

 Okutshiwo yivesi le: UNkulunkulu uyayilalela imithandazo yethu. (IHubo 55:22; 65:2) Ulendaba lawe yikho uyakuncedisa ubone ukuthi uligugu kuye.

 “Ukufunda ngoJehova kwenza ubuhlungu engangilabo enhliziyweni baba ngcono. Khathesi ngiyathandaza kuNkulunkulu ngimtshele loba yini. Ungumngane ozwisisa indlela engizizwa ngayo.”—U-Ana, Belize.

 IBhayibhili lithi: ‘UJehova uzakwahlulela kuhle izintandane lalabo abaphathwa kubi, ukuze abantu bangaphindi babethusele.’—IHubo 10:​17, 18.

 Okutshiwo yivesi le: Sekuseduze ukuthi uNkulunkulu aqede konke ukuphathwa kubi okugoqela ukuhlukuluzwa kwabesifazana.

 “Kuyangiduduza ukwazi ukuthi sekuseduze ukuthi uJehova aqede konke ukuphathwa kubi kwabesifazana lamantombazana. Kungenza ngihlaliseke, ngibe lokuthula kwengqondo.”—URoberta, Mexico.

 Ukuze uthole okunengi ngokuthi iBhayibhili lisinika njani ithemba, ukuthi kungani singakuthemba lokho elikutshoyo lokuthi oFakazi bakaJehova bangakuncedisa njani besebenzisa iBhayibhili, cela akuvakatshele ukuze azofunda lawe iBhayibhili.

 Dawuniloda isihloko lesi.