INGXENYE 8
Ungenzani Nxa Kungaba lezinhlupho?
“Liyathokoza kakhulu ngalokhu lanxa like lahlupheka okwesikhatshana ngezinsizi zezinhlobo zonke zezilingo.”—1 UPhetro 1:6
Lanxa ungabopha ziqine ukuze imuli yakho ithokoze, zizakuba khona izinto ezizakwenza kube nzima ukuthi lihlale lithokoza. (UmTshumayeli 9:11) UNkulunkulu uyasithanda yikho ezimisele ukusincedisa nxa silezinhlupho. Wena lemuli yakho lizenelisa ukulwisana laloba yisiphi isimo esinzima nxa lingasebenzisa izimiso eziseBhayibhilini.
1 THEMBELA KUJEHOVA
OKUTSHIWO LIBHAYIBHILI: “Yethulani kuye konke ukukhathazeka kwenu ngoba yena uyalikhathalela.” (1 UPhetro 5:7) Ungakhohlwa ukuthi uNkulunkulu kayisuye obangela izinhlupho olazo. (UJakhobe 1:13) Nxa ungasondela kuye, yena uzimisele ukukuncedisa. (U-Isaya 41:10) “Likhuphe konke okusezinhliziyweni zenu kuye.”—IHubo 62:8.
Nxa ungabala iBhayibhili nsuku zonke uzathola induduzo. Lokhu kuzakwenza ubone ukuthi uJehova ‘uyasiduduza kuzo zonke izinhlupheko zethu.’ (2 KwabaseKhorinte 1:3, 4; KwabaseRoma 15:4) UNkulunkulu uthembisa ukukunika ‘ukuthula okudlula ukuqedisisa konke.’—KwabaseFiliphi 4:6, 7, 13.
ONGAKWENZA:
-
Thandaza ukuze uJehova akuncedise ungenzi izinto ngamawala kodwa ucabangisise kuhle
-
Cabangisisa ngalokho ongakwenza ubusukhetha indlela engcono kulazo zonke
2 ZINAKEKELE WENA LEMULI YAKHO
OKUTSHIWO LIBHAYIBHILI: “Inhliziyo yabaqedisisayo izuza ulwazi; izindlebe zabahlakaniphileyo ziyakudinga.” (IZaga 18:15) Zama ukuzwisisa ukuthi ilungu linye ngalinye lemuli yakho lizizwa njani. Khuluma labo futhi ubalalelisise.—IZaga 20:5.
Kuyini ongakwenza nxa ungafelwa? Ungesabi ukuveza imizwa yakho. Khumbula ukuthi uJesu laye “wakhala.” (UJohane 11:35; UmTshumayeli 3:4) Kuqakathekile ukuthola isikhathi esaneleyo sokulala lesokuphumula. (UmTshumayeli 4:6) Lokhu kuzakwenza wenelise ukubekezelela isimo esinzima kakhulu.
ONGAKWENZA:
-
Kwenze zikhathi zonke ukukhuluma lamalunga emuli yakho, ungaze walindela kuze kube lohlupho. Kuzakuba lula ukuthi bakhulume lawe nxa kungaba lezinhlupho
-
Khuluma labanye abake baba lohlupho olunjengolwakho
3 CELA ABANYE BAKUNCEDISE
OKUTSHIWO LIBHAYIBHILI: “Umngane ulothando ngezikhathi zonke, lomzalwane uzalelwa izikhathi zenhlupheko.” (IZaga 17:17) Abangane bakho bayafuna ukukusiza kodwa bangabe bengakwazi ukuthi bakwenze njani lokhu. Batshele ukuthi ufuna bakuncedise njani. (IZaga 12:25) Cela abalolwazi lweBhayibhili bakuncedise. Isiqondiso esiseBhayibhilini abazakunika sona sizakunceda.—UJakhobe 5:14.
Ukuzihlanganisa labantu abalokholo kuNkulunkulu lasezithembisweni zakhe kuzakunceda kakhulu. Ukuncedisa labo abadinga isikhuthazo kuzakududuza. Tshela abanye ngezithembiso zikaJehova kanye lalokho okukholwayo. Hlala ukhuthaza abanye njalo ungazehlukanisi labantu abakuthandayo.—IZaga 18:1, The Holy Bible in Ndebele; 1 KwabaseKhorinte 15:58.
ONGAKWENZA:
-
Xoxa lomngane omthandayo njalo uvume ukuthi akuncedise
-
Phumela egcekeni ngalokho ofuna akuncedise ngakho