¿Tlen moneki nikchiuas para nimochiuas iTlaixpantijka Jehová?

MA MOKAKI IKA

Itech Mateo 28:19, 20, TNM Jesús okijto tlen moneki tikchiuas tla tikneki timochiuas iTlaixpantijka Jehová. Ninmej textos kijtouaj tla tiknekij timochiuaskej idiscípulos Jesús moneki tikintlapouiskej oksekimej makixmatikan Jehová.

Se tlamantli tlen moneki tikchiuas: Ximomachti tlen kijtoua Biblia. Jesús okintitlanki imachtijkauan makinchiuakan idiscípulos uan matlamachtitij tlen okinmachti (Mateo 28:19, 20, TNM). Itech Biblia moajsi tlen otlamachti Jesús. Nin mitspaleuis xiyolpaki (2 Timoteo 3:16, 17). Ika nochi toyolo tiknekij xikmati ¿Ken tikchiuaj se tlamachtil ika Biblia? (Mateo 10:7, 8; 1 Tesalonicenses 2:13).

Ome tlamantli tlen moneki tikchiuas: Xikchiua tlen timomachtia. Jesús okinmilui imachtijkauan amo san omonekiaya momachtiskej. Noijki omonekiaya kinmachtiskej oksekimej (Mateo 28:20). Nin amo kijtosneki san tikmatiskej tlen kijtoua Biblia. Xamo moneki tikpatlas seki tlamantli tlen timokuayejyekoua uan seki tlamantli tlen tikchiua (Hechos 10:42; Efesios 4:22-29; Hebreos 10:24, 25). Akinmej kitlakamatij tlen otlanauati Jesús, kichiuaj ken ye uan motemakaj ixpan Jehová (Mateo 16:24, TNM).

Eyi tlamantli tlen moneki tikchiuas: Ximoapolakti (Mateo 28:19, TNM). Biblia kijtoua ijkuak timoapolaktiaj yetoskia ken itlaj tiktokaj (noijki xikita Romanos 6:2-4, TNM). Ijkuak yotimoapolaktijkej ayakmo tikchiuaj tlen achto otikchiuayaj. Ikinon ijkuak timoapolaktis kijtosneki yitikchijtok tlen Jesús okijto uan noijki tikneki toTajtsin Dios mamitspaleui para tikpias chipauak motlalnamikilis (Hebreos 9:14, TNM; 1 Pedro 3:21).

¿Ken nikmatis kox yiuelis nimoapolaktis?

Xikinmilui tlayekankej. Yejuan mouan motlapouiskej uan kitaskej kox tikajsikamati tlen tlamachtia Biblia. Noijki kitaskej kox tikchiua tlen timomachtijtok uan kox ika nochi moyolo otimotemakak ixpan Jehová (Hechos 20:28; 1 Pedro 5:1-3).

¿Nochi nin tlamantli kichiuaj inkoneuan iTlaixpantijkauan Jehová?

Kema. Tejuan tikinmachtiaj tokoneuan “ika tlanonotsálistli iwa ika itlajtol n Toteko” Dios (Efesios 6:4). Pero ijkuak moskaltiskej, yejuan kipejpenaskej kox kinekij momachtiskej, kox kiseliskej uan kox kitlakamatiskej tlen kijtoua Biblia uan ijkon uelis motemakaskej ixpan Jehová (Romanos 12:2). Tisejse moneki tikpejpenaskej kox tiknekij tikueyichiuaskej Jehová (Romanos 14:12; Gálatas 6:5).