Romanos 14:1-23
14 Kuali xikselikan akin amo kipia chikauak itlaneltokilis, pero amo xikinteneuakan* akinmej okse tlamantli mokuayejyekouaj.*
2 Akin kipia chikauak itlaneltokilis kikua nochi tlakuali, pero akin amo kipia chikauak itlaneltokilis kikua san kilitl.
3 Akin kikua nochi tlakuali amo makitlauelita akin kikua san kilitl. Noijki akin kikua san kilitl amo makiteneua* akin kikua nochi tlakuali porque toTajtsin Dios nochtin kuali yokinseli.
4 ¿Akin te para tikteneuas* itlakeual okse tlakatl? San iteko uelis kijtos kox kuali noso amo kuali tlen kichiua. Jehová kipaleuis nochi kuali makichiua.
5 Se tlakatl kita se tonal okachi ipati uan amo ken okseki tonalmej. Pero okse tlakatl kita san se tlamantli nochi tonalmej. Sejse kuali makimati tleka ijkon mokuayejyekoua.*
6 Akin kita se tonal okachi ipati, ijkon kichiua porque kineki kiyolpaktis Jehová. Akin kikua nochi tlakuali, ijkon kichiua para kiyolpaktis Jehová porque kitlasojkamatilia okimakak non tlakuali. Noijki akin kikua san kilitl, ijkon kichiua porque kineki kiyolpaktis Jehová uan kitlasojkamatilia.
7 Amikaj yoltok porque ineuian kineki yoltos. Noijki amikaj ixpoliui porque ineuian kineki ixpoliuis.
8 Tla tiyoltokej, tiyoltokej para Jehová. Tla timikiskej, timikiskej para Jehová. Porque tejuan tiiaxkauan Jehová maski tiyoltokej noso timikiskej.
9 Cristo oixpoliuik uan oksepa okiyolitijkej para yetos inTeko akinmej yoltokej uan akinmej yoixpolikej.
10 Pero te ¿tleka tikteneua* mokni? ¿Noso tleka tiktlauelita mokni? Tinochtin tiyetoskej ixpan toTajtsin Dios uan ye techixkomakas.
11 Porque ijkuilitok: “Jehová kijtoua: ‘Ne melauak niyoltok ikinon nochtin noixpan motlankuaketsaskej uan nochtin kimatiskej ne niDios’”.
12 Tinochtin tikijtoskej tlen otikchijkej ijkuak toTajtsin Dios techixkomakas.
13 Ikinon ayakmo matimoteneuakan.* Amitlaj xikchiuakan tlen kikxitlanuis se tokni noso kichiuas ayakmo matlaneltoka.
14 Ne nikchiua ken toTeko Jesús uan nikmati nochi tlen tikkuaj amo sokio. Pero tla ikaj mokuayejyekoua* se tlakuali sokio, non tlakuali amo chipauak para ye.
15 Tla tlakuali tlen tikkua kikuejsoua mokni kijtosneki amo tiktlasojtla. Tlakuali tlen tikkua amo makichiua ayakmo matlaneltoka mokni porque Cristo ipatka oixpoliuik.
16 Nochi tlen kuali nankichiuaj, amo xiktekauilikan makijtokan amo kuali tlen nankichiuaj.
17 Tlen kikua se tlakatl uan tlen koni amo kipaleuis makalaki itech iTekiuajkayo toTajt Dios. Espíritu santo kipaleuia mayeto yolkuali, kuali mamouika inuan oksekimej uan mapaki.
18 Akin ijkon kichiua uan kitekichiuilia Cristo ken se tlakeuali, kiyolpaktia toTajtsin Dios uan oksekimej kitlakaitaj.
19 Ximochijchikauakan kuali ximouikakan uan ximosepanyolchikauakan.
20 Tlakuali tlen tikkuaj amo makijtlako tlen toTajtsin Dios kichiua. Uelis tikkuaskej nochi tlakuali pero amo kuali tla tikkuaskej itlaj tlen kichiuas okse ayakmo matlaneltoka.
21 Amo matikkuakan nakatl, amo matikonikan vino nion amo matikchiuakan okseki tlamantli tlen kichiuas mamokxitlanui se tokni.
22 Tlen tikneltoka, san te xikmato iuan toTajtsin Dios. Tipakis ijkuak tikmachilis amo titlajtlakolchiua porque tikchiua tlen timokuayejyekoua* kuali.
23 Tla ikaj amo kimati kox kikuas se tlakuali uan kikua, amo kuali tlen kichiua porque amo tlaneltoka. Porque se tlajtlakoli akin itlaj kichiua uan amo tlaneltoka.
Notas
^ Noso “xikinmijtokan”, “xikinpojpouakan”.
^ Noso “monejneuiliaj”.
^ Noso “makijto”, “makipojpoua”.
^ Noso “tikijtos”, “tikpojpouas”.
^ Noso “monejneuilia”.
^ Noso “tikijtoua”, “tikpojpoua”.
^ Noso “matimoijtokan”, “matimopojpouakan”.
^ Noso “monejneuilia”.
^ Noso “timonejneuilia”.
