TiiTlaixpantijkauan Jehová techpaktia timotlapouiskej inmiuan akinmej kipiaj okse religión, pero amo inmiuan tikueyichiuaj toTajtsin Dios. Biblia kijtoua san sekan matiyetokan akinmej melauak tikchiuaj ken Cristo ikinon miak ipati san se tlamantli matitlaneltokakan (Efesios 4:16; 1 Corintios 1:10; Filipenses 2:2). Amo san moneki titetlasojtlaskej, titeiknomatiskej uan titetlapojpoluiskej. Noijki nochi tlen tikneltokaj kisa itech Biblia, tlamo amitlaj ipati titlaneltokaj (Romanos 10:2, 3).

 Biblia kijtoua tla akin kichiua ken Cristo kineki kiueyichiuas toTajtsin Dios iuan ikaj tlen okse tlamantli kineltoka, kijtosneki amo kintlakamati itlanauatiluan toTajtsin Dios (2 Corintios 6:14-17). Noijki ayakmo kuali mouikas iuan toTajtsin Dios porque amo san se tlamantli tlaneltokaj. Ikinon Jesús okinmilui imachtijkauan amo mamouikakan iuan ikaj tlen okse tlamantli tlaneltoka (Mateo 12:30; Juan 14:6). Noijki tlanauatil tlen toTajtsin Dios okimakak Moisés, okijtouaya israelitas amo uelis kiueyichiuaskiaj toTajtsin Dios iuan akinmej amo okatkaj israelitas (Éxodo 34:11-14). Satepan israelitas amo okinekej makinpaleuikan akinmej amo okatkaj israelitas porque tla ijkon kichiuaskiaj kijtosneki mouikaskiaj inmiuan akinmej okse tlamantli otlaneltokayaj (Ezequiel 4:1-3).

 Kema, timochijchikauaj timotlapouiskej iuan akinmej kipiaj okse religión. Itech 2023 otitetlapouijkej 1,791,490,713 horas. Tiknekij tikmatiskej ken mokuayejyekouaj uan tlen kineltokaj oksekimej ijkon ken okichi apóstol Pablo (1 Corintios 9:19-22). Ijkuak inmiuan timotlapouiaj, tiktlakaitaj tlen kineltokaj ijkon ken kijtoua Biblia (1 Pedro 3:15).