•   ¿Tikualani ijkuak oksekimej kijtouaj tlen amo kuali?

  •  Amo, porque yonimomatki nikkaki ijkon tlajtouaj.

  •  Amitlaj ueli nikchiua maski nechkualania.

  •  Sapanoua nechkualania ayakmo nikxikoua.

•   ¿Ualeua tikijtoua tlen amo kuali?

  •  Amo.

  •  Ualeua ijkon nechpanoua.

  •  Kema.

•   ¿Tlajtlakoli tla ijkon nechpanoua?

  •  Amo, porque ualeua okachi nechpanoua tlen amo kuali.

  •  Kema tlajtlakoli.

 ¿Tikneltoka tlajtlakoli tikijtoskej tlen amo kuali? “Xamo timokuayejyekos amo tlajtlakoli ijkon tikchiuaskej porque ualeua onka okseki tlamantli tlen okachi amo kuali. Noijki miakej ijkon tlajtouaj”. Pero ¿melauak ijkon panoua?

 Miakej mochijchikauaj amo kijtoskej tlen amo kuali. Noijki kichiuaj tlen miakej amo kipatioitaj. Matikitakan seki tlamantli:

•  Tlen amo kuali tikijtouaj kiteititia miak tlamantli. Tlen tikijtouaj kiteititia tlen tikpiaj toyolipan. Ijkuak amo kuali titlajtouaj, kiteititia amo techtekipachoua tlen kimachiliaj oksekimej. Ximokuayejyeko: ¿Melauak mitspaktia ijkon tikchiuas?

   Biblia kijtoua: “Tlan kisa ijtik ikamak se tlakatl, kisa ijtik iyolo” (Mateo 15:18).

•  Ayakmo kuali mitsitaskej oksekimej tla tikijtoua tlen amo kuali. Amochtli Cuss Control kijtoua: “Ken titlajtoua kiteititis akinmej yetoskej moyolikniuan, kox mitstlakaitaskej akinmej inmiuan tichanti uan akinmej inmiuan titekipanoua. Noijki kiteititis ken timouikas inmiuan oksekimej, kox tikajsis kanin titekipanos uan ken mitsitaskej akinmej amo mitsixmatij”. Non amochtli noijki kijtoua: “¿Okachi kuali timouikas inmiuan moyolikniuan tla ayakmo tikijtos tlen amo kuali?”.

   Biblia kijtoua: “Ayakmó ximotsatsajtsikah, nion ximowijwikaltikah” (Efesios 4:31).

•  Tla tikijtoua tlen amo kuali, amo mitspaleuis okachi xiyeto tiyolkuali noso okachi mamitsixmatikan. Itech amochtli ¡Qué maleducado!, tlapajti Alex Packer okijto miakej mosotlauaj ijkuak oksekimej san nochipa tlauijuikaltiaj. Noijki ijkuak kijtouaj tlen amo kuali “kiteititiaj amo ixtlamatkej uan amo teajsikamatij”. Noijki kijtoua: “Tla amo tikmati tlen tikijtos noso amo kuali titlajtoua, kijtosneki noijki amo kuali timokuayejyekoua”.

   Biblia kijtoua: “Amo xikimijtokah tlájtolteh pitsotikeh” (Efesios 4:29).

•  Ximokuayejyeko tlen tikchiuas. Ximochijchikaua amo tikijtos tlen amo kuali se metstli. Xikijkuilo itech se calendario tlen yotikchi. Pero moneki tikchiuas okseki tlamantli para uelis tikchiuas tlen yotikijto. Matikitakan seki tlamantli:

•  Kuali xikpejpena tlen ika timoyolpaktia. Biblia kijtoua: “Amo ximokajkayauakan, tla nannentinemiskej iuan akinmej amo yolkualmej, namechijtlakoskej” (1 Corintios 15:33, TNM). Itech nin versículo tlajtoli nannentinemiskej noijki kijtosneki películas tlen tikinmitaj, videojuegos uan tlakuikalmej tlen tikinkakij. Kenneth akin kipia 17 xiuitl, okijto: “Ualeua titlakuikaj se tlakuikali tlen techpaktia pero amo kuali tikkakij tlen ompa kijtoua amo kuali. San tikkakij ken mokaki tlatsotsonali”.

•  Xikteititi kuali timokuayejyekoua. Sekimej kijtouaj tlen amo kuali para momachiliskej ken yiuejueyij. Pero akinmej yiuejueyij “ya kuali kimatih kiyejyekoliah tlan kuali iwa tlan amokuali” (Hebreos 5:14). Amo kichiuaj tlen amo kuali para kintlajtlachialtiskej oksekimej.

 Tlajtoli tlen amo kuali, kichiua amo kuali matimokuayejyekokan. Pero itech nin tlaltikpak yionka miak tlamantli tlen amo kuali. Ik non, amochtli Cuss Control kijtoua: “Amo xikchiua tlen kichiuaj oksekimej. Xikinpaleui para ayakmo makijtokan tlen amo kuali. Tiyolpakis tla ijkon tikchiuas uan oksekimej noijki yolpakiskej”.