Ijkuak tikaki kijtoaj: “Ayakmo miak poliui uan tlamis nochi”, ¿tlen timokuayejyekoa? ¿Timokuayejyekoa itlaj ualuetsis itech iluikak uan tlamis nochi? Ijkuak kitaj nochi nin tlamantli miakej momojtiaj, oksekimej amo kintekipachoa uan oksekimej uetskaj.

Pero Biblia techiluia: “Tlamis n tlaltíkpaktli” noso tlen amo kuali (Mateo 24:14). Biblia kitokayotia “Armagedón” noso tonal ijkuak toTajtsin Dios tlaixkomakas (Apocalipsis 16:14, 16). Pero tlaneltokalismej tlatlamantli kineltokaj itech non tonal, uan miakej kineltokaj miak tlamantli amo kuali. Pero Biblia kuali techyekiluia tlen kijtosneki non tonal uan tlen amo kijtosneki. Biblia techpaleuia ma tikajsikamatikan ayakmo miak poliui pampa ma tlami nochi. Noijki techmachtia ken uelis timomakixtiskej. Achto ma timomachtikan pampa uelis tikmatiskej kuali tlen kijtosneki tlamis nochi. Ijkon ken kijtoa Biblia, ¿tlen kijtosneki tlamis nochi?

1. TLALTIKPAK AMO TLATLAS

   Biblia kijtoa: “[ToTajtsin Dios] okitlali Tlaltikpak kanin kajki; uan amo keman ikaj kolinis, sepa amo keman” (Salmo 104:5). Nin tlaxelol uan okseki techiluiaj Jehová amo keman kipojpoliuis Tlaltikpak uan amo kikauas oksekimej ma kipojpolokan (Eclesiastés 1:4; Isaías 45:18).

2. MOMATI KEMAN TLAMIS NOCHI

   Biblia techiluia Jehová yokitlali tlen tonal uan tlen hora tlamis nochi. Biblia kijtoa: “N tonati iwa n ora ijkuak ijkó tlamochiwas, amaka kimati, nion ángelteh non kateh ilwikak, nion Ikone n Totajtsi Dios. Sanwel Totajtsi kimati. Yika nomejwah xiijsatokah, xiyektlachixtokah iwa ximotiotsajtsilijtokah, porke mach nonkimatih kemania kalakiki non tonati” (Marcos 13:32, 33). ToTajtsin Dios yokitlali keman tlamis nochi.

3. NION TLALTIKPAKTLAKAMEJ NION SE METEORITO KIPOJPOLOSKEJ NOCHI

   ¿Ken peuas tlamis nochi? Apocalipsis 19:11 kijtoa: “Onikitak n ilwikak otlapotoka, iwa owalmonexti se kabayo istak. Iwa non otlejkotiaya ipan non kabayo, omonotsaya Milajkatlakatl iwa Kichiwa Tlan Kijtoa [...]. Ijkuakó onikitak n yolkatl temojti, iwa n tlanawatijkeh akimeh otlanawatijtokah ipan nin tlaltíkpaktli iwa insoldadojwah. Omoololojkah para motekilmakaskeh iwa Akin otlejkotiwalaya ipan ikabayo istak iwa isoldadojwah” (Apocalipsis 19:11-21). Nochi tlen nikan kijtoa san itlaj kineskayotia, pero nin techmachtia Jehová kinualtitlanis sekimej ángeles pampa ma kinmiktikan nochtin akinmej amo kinekij Jehová.

1. AYAKMO TLANAUATISKEJ TLALTIKPAKTLAKAMEJ

   Biblia kijtoa: “ToTajtsin Dios tlen kajki iluikak kitlalis se tekiuajkayotl tlen amo keman kitlajtlamiskej.  Uan nin tekiuajkayotl amo kiuikaskej itech okse altepetl. Kintlajtlamis uan kinmachiuas nochi ninmej tekiuajkayomej, uan ye nochipa yetos” (Daniel 2:44). Ken otikitakej, toTajtsin Dios kintlajtlamis “n tlanawatijkeh akimeh otlanawatijtokah ipan nin tlaltíkpaktli” uan akinmej ‘mololoskej para motekilmakaskeh iwa Akin otlejkotiwalaya ipan ikabayo istak iwa isoldadojwah’ (Apocalipsis 19:19).

2. TLAMIS GUERRAS, NETEUILISTLI UAN NOCHI TLEN AMO KUALI

   “[ToTajtsin Dios] kitlajtlamia guerras itech nochi Tlaltikpak.” (Salmo 46:9.) Biblia kijtoa itech Tlaltikpak mokauaskej akinmej kichiuaj tlen kuali, uan noijki “akinmej amo yolkualmej, kintlajtlamiskej ipan tlaltikpak; uan tlen amo yolmelajkej, kinmixpoloskej” (Proverbios 2:21, 22). Uan Apocalipsis 21:4 uan 5 kijtoa: “Xikita, ne [toTajtsin Dios] nochi nikyankuilis”.

3. KINTLAJTLAMISKEJ TLANELTOKALISMEJ TLEN AMO KIYOLPAKTIAJ TOTAJTSIN DIOS UAN TLALTIKPAKTLAKAMEJ

   Biblia techiluia itech tlaneltokalismej tlen tlakajkayauaj: “Teotlajtojkej san tlakajkayauaj, uan teopixkej tlamachtiaj san tlen yejuan kinekij. [...] Pero ¿tlen kichiuaskej ijkuak tlamis nochi?” (Jeremías 5:31). “Itech neká tonati, miakeh nechiliskeh: ‘¡Noteko, Noteko!, tejwah otitetlapowijkeh ika Motoka iwa ika Motoka otikinkixtijkeh espíritus amokualteh, noiwa ika Motoka otikinchijkeh miakeh milagros’. Ijkuakó Ne nikinmilis: ‘¡Ayik onomechixma! ¡Ik nepa xiwiah, tlajtlakolchijkeh!’” (Mateo 7:21-23).

4. KINMIXPOLOSKEJ AKINMEJ KICHIUAJ TLEN AMO KUALI UAN AMO YOLMELAJKEJ

   Jesús okijto: “Akimeh amo kineltokah Dios, kintlajtlakoltis. Porke ijkuak owala n Tláwili itech nin tlaltíkpaktli, okachi okiwilitakeh n tleyuálistli iwa amo n tláwili. Yika okichiwayah tlan amokuali” (Juan 3:19). Itech Biblia techiluia yiuejkika okinmixpolo tlaltikpaktlakamej, ijkuak okatka yolmelauak Noé. Biblia kijtoa: “Ika atl [...], n tlaltíkpaktli opojpoliwik itech tonatijmeh de Noé. Pero n ilwikak iwa n tlaltíkpaktli, Dios kinkajtok para kimpojpolos ika tletl itech neká tonati ijkuak Ye kintlajtlakoltis nochteh, iwa kimpojpolos akimeh kichiwah tlan amokuali” (2 Pedro 3:5-7).

Ijkon ken okinmixpolojkej tlaltikpaktlakamej ijkuak okatka Noé, noijki mochiuas ijkuak tlamis nochi tlen amo kuali. ¿Kipojpoloskej Tlaltikpak? Amo, Tlaltikpak amo kipojpoloskej; yiuejkika Jehová san okinmixpolo tlaltikpaktlakamej akinmej amo yolkualmej. Ijkon panos satepan, san kinmixpoloskej tlaltikpaktlakamej akinmej amo kinekij toTajtsin Dios uan kichiuaj tlen amo kuali. Pero iyolikniuan Jehová momakixtiskej, ijkon ken okimakixti Noé iuan ikalchanejkauan (Mateo 24:37-42).

Ximokuayejyeko ken kualtsin yetos nochi ijkuak Jehová kinmiktis nochtin akinmej kichiuaj tlen amo kuali. Se kuali tlajtoli pampa tlaltikpaktlakamej, ijkuak Biblia kijtoa tlamis nochi. Pero uelis tejuatsin tikneki tikmatis kox poliui miak pampa ma tlami tlen amo kuali uan ken uelis timomakixtis. Ma tikitakan tlen kijtoa Biblia.