“Notajtsi nomechmakas nochi tlan nonkitlajtlaniliskeh ika Notoka” (Juan 16:23).

Tlen Jesús okijto techititia san Jehová moneki tiktlatlaujtiskej uan amo kineki ma tiktlatlaujtikan ika teotsitsintin, ika ángeles uan tofamiliares tlen yoixpolikej. Ye kineki ma tiktlatlaujtikan Jehová ika itoka Jesús. Ijkuak ijkon tikchiuaj, tikititiaj toTajtsin Dios tikneltokaj ye techkaki porque Jesús topatka omikik. Jesús okijto: “Sanwel akin nechtlakita weletis [motokis iuan] Notajtsi” (Juan 14:6).

“Xikiluikan tlen nankipiaj itech namoyolo” (Salmo 62:8).

Ijkuak tiktlatlaujtiaj Jehová ma tiktlapouikan ken yetoskia se konetl kitlapouia itajtsin. Amo moneki tiktekitiltiskej se amochtli kanin ijkuilitok ken timotlatlaujtiskej noso san se tlamantli ma tikijtojtokan. Moneki tikiluiskej tlen onka itech toyolo uan tiktlakaitaskej.

“Ye techkaki tla itla tiktlajtlaniliah non Ye kipaktia” (1 Juan 5:14).

Biblia kijtoua tlen kichiuas toTajtsin Dios para kuali ma tiyetokan uan noijki tlen kineki ma tikchiuakan. Ik non, techkakis tla “tiktlajtlaniliah non Ye kipaktia”. Para tikmatiskej tlen ye kipaktia moneki timomachtiskej Biblia uan ijkon tikixmatiskej. Ijkon ye kinekis techkakis.

Ma tikiluikan ma techmaka tlen ika timopanoltiskej. Uelis tikiluiskej toTajtsin Dios ma techmaka tlen tikkuaskej, tlen tikmokentiskej noso kanin tichantiskej. Noijki uelis tikiluiskej ma techpaleui kuali ma tikpejpenakan tlen tikchiuaskej uan ma techpaleui ma titlaxikokan ijkuak titlajyouiaj. Noijki uelis tiktlatlaujtiskej ma techtlapojpolui, ma techpaleui okachi itech ma titlaneltokakan uan ma techmalui (Lucas 11:3, 4, 13; Santiago 1:5, 17).

Ma tiktlatlaujtikan ma kinpaleui oksekimej. Tetajmej kinpaktia inkoneuan ma motlasojtlakan. Noijki ijkon Jehová toTajtsin, ik non, ye kineki tinochtin ma timotlasojtlakan. Ma tiktlatlaujtikan ma kipaleui tonamik, tokoneuan, tofamiliares uan akinmej inmiuan timouikaj. Se imachtijka Jesús tlen omotokayotiaya Santiago okijto: “Ximosepantiotsajtsilikah” (Santiago 5:16).

Ma tiktlasojkamatilikan. ToTajtsin Dios otechchijchi uan Biblia kijtoua: “Ye Akin techaltitlanilia n kiawitl iwa kichiwa kuali matlatlaki, noiwa techmaka tlan techpoloa para matikpiakah tlan tikkuaskeh iwa matiyetokah ika pakílistli” (Hechos 14:17). Tla timokuayejyekouaj toTajtsin Dios yotechmakak miak tlamantli, san niman tiktlasojkamatiliskej. Noijki uelis tikititiskej tiktlasojkamatiliaj ijkuak tiktlakamatij (Colosenses 3:15).

Ualeua xamo timoyolkokouaj porque toTajtsin Dios amo san niman technankilia ijkuak tiktlatlaujtiaj ika nochi toyolo. ¿Kijtosneki amo kineki techpaleuis? Amo. Tlen okinpanok oksekimej techititia ualeua moneki okachi timotlatlaujtiskej.

Oksepa ma tikitakan tlen okipanok Steve. Ye okijto: “Tla amo nimotlatlaujtiskia ayakmo keman niyolpakiskia”. ¿Tlen okipaleui? Opejki momachtia Biblia uan ompa okitak moneki nochipa motlatlaujtis. Steve okijto: “Niktlasojkamatilia toTajtsin Dios porque akinmej inmiuan nimouika nechtlasojtlaj uan nechpaleuiaj. Axkan okachi niyolpaki”.

¿Uan tlen okipanok Jenny akin okijto amo okinamikiaya ma kitlapojpolui toTajtsin Dios? Ye okijto: “Ijkuak amo kuali onimomachiliaya, oniktlatlaujtiaya toTajtsin Dios ma nechpaleui ma nikajsikamati tleka sapanoua onimoyolkokouaya”. ¿Ken okipaleui ijkuak omotlatlaujti? Ye okijto: “Ijkuak onimotlatlaujti onechpaleui ma nimokuayejyeko ken toTajtsin Dios. Ijkuak onikilnamikiaya amo kuali tlen onikchi, noijki onikilnamikiaya toTajtsin Dios yonechtlapojpolui. Uan onechpaleui ayakmo ma nimoyolkoko”. ¿Tlen opanok satepan? Ye okijto: “Nochipa nimotlatlaujtia, ik non, nikita Jehová melauak kajki, notajtsin uan iuan nimouika. Nikmati nochipa nouan yetos uan nochipa nechpaleuis tla nikchiua tlen ye kineki”.

Axkan ma tikitakan tlen okipanok Isabel. Ijkuak ayamo onesiaya ikone, tepajtijkej okiluijkej ikone yetoskia kokoxki. Ijkuakon sapanoua omoyolkoko. Sekimej okiluijkej ma kimayaui ikone. Ye okijto: “Onimokuayejyeko nimikiskia”. Pero ¿tlen okichi? Ye okijto: “Miak uelta oniktlatlaujti toTajtsin Dios ma nechpaleui”. Satepan oneski ikone uan okatka kokoxki. ¿Okipaleui toTajtsin Dios Isabel? ¡Kema! ¿Ken okipaleui? Isabel okijto: “Nokone itoka Gerard uan yikipia catorce xiuitI. Niyolpaki ijkuak nikita nokone noijki yolpaki maski mokokoua. Ijkon nikita Jehová nechpaleuia”.

Tlen okijto Isabel techilnamiktia tlen Biblia kijtoua: “Porke Toteko Dios kintlajtlatok n yolchipawakeh, iwa kinkakilia intiotsajtsilis, pero kinmixnamiki akimeh kichiwah tlan amokuali” (1 Pedro 3:12). Ik non, moneki nochipa tiktlatlaujtiskej toTajtsin Dios.

Itech Biblia ijkuilitok tlen okijto Jesús ijkuak omotlatlaujtiaya. Xamo tinochtin tikmatij tlen okijto ijkuak okinmititi imachtijkauan ken omonekiaya motlatlaujtiskej. ¿Tlen techititia tlen ompa okijto?