Biblia amo kijtoua san itech se altepetl mochiuas Armagedón. Kijtoua nin guerra mochiuas itech nochi tlaltikpak, kichiuas toTajtsin Dios inuan tekiuajkej.

•   “Ejekamej kintitlanij nonmej espíritus uan ipan nochi tlaltikpak tekiuajkej kinkakij nonmej espíritus. Espíritus [...] kinnechikoskej tekiuajkej ijkuak mochiuas guerra itech iueyi tonal toTajtsin Dios tlen kipia nochi chikaualistli [...]. Noijki okinnechikojkej tekiuajkej kanin ika hebreo itoka Armagedón” (Apocalipsis 16:14, 16).

 Tlajtoli “Armagedón” kajki ika hebreo Har Meghiddóhn tlen kijtosneki “tepetl Meguidó”. Meguidó okatka se altepetl tlen okatka Israel. Ikinon sekimej kineltoka Armagedón mochiuas ompa Israel. Pero nion Meguidó nion okse altepetl tlen kajki oeste de Asia noso Oriente Próximo sapanoua ueyi para ompa moteuiskej nochtin tekiuajkej tlen katej tlaltikpak uan insoldados.

 Akin okijkuilo amochtli Apocalipsis san okinextilijkej seki tlamantli uan san itlaj kineskayotia (Apocalipsis 1:1). Ikinon Armagedón amo kijtosneki san moteuiskej itech se altepetl, ijkuak tekiuajkej mosetiliskej uan kixnamikiskej itech nochi tlaltikpak iTekiuajkayo toTajtsin Dios (Apocalipsis 19:11-16, 19-21).