Itech Oloch Taojtokaltianij pouij sekin akin kichiuaj kemej Cristo, akin kipiaj se takuaujtamatilis chikauak uan kinixyekanaj itaixpantijkauan Jiova akin moajsij noyampa taltikpak. Yejuan kichiuaj ome tekit:

•   Kiitaj tamachtilis tein mokixtia itech Biblia tein kisa itech toamaixuan uan tein motemakas itech nechikolmej uan itech tataman escuelas tein kipiaj itaixpantijkauan Jiova (Lucas 12:42).

•   Kiixyekanaj tekit tein kichiuaj itaixpantijkauan Jiova noyampa taltikpak. Nejin kijtosneki ke kiixyekanaj tanojnotsalis uan kiitaj keniuj mokui tomin tein kitemakaj taltikpakneminij ika nochi ininyolo.

 Oloch Taojtokaltianij kichiuaj ijkon kemej kichiujkej “tatitanilme de Cristo uan inuan [...] ueuentsitsin” akin moajsiaj ompa Jerusalén itech yekinika siglo. Yejuan kiixnextijkej nochi nechikol kampa kichiuaj kemej Cristo keman kiixejekojkej tein semi monekia (Hechos 15:2). Akin pouij itech Oloch Taojtokaltianij amo senkis yejuan kiixyekanaj tonechikol, ijkon kemej amo kichiujkej ne uejkauj nejon takamej akin amo kikaujkej Dios. Yejuan nochipa kitemouaj taixyekanalis itech Biblia uan kiajsikamatij ke Jiova kiixtalij Jesucristo maj kiixyekana nechikol (1 Corintios 11:3; Efesios 5:​23).

 Axkan akin tapaleuiaj kemej Oloch Taojtokaltianij moajsij Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane uan Jeffrey Winder. Nochin tekitij itech ueyi kali kampa kinixyekanaj itaixpantijkauan Jiova ompa Warwick (Nueva York).

 Oloch Taojtokaltianij kiixtalianij chikuasen oloch oso comités tein kiitaj tataman tekit tein mochiua. Sejse tokniuj akin poui itech Oloch Taojtokaltianij tekiti itech se oso okachi comités tein kiixtalijkej.

•   Oloch Tokniuan Taixyekananij. Kiitaj nochi tein mouika iniuan tekiuanij uan kichiua tein moneki keman panoua se tetsauit, mochiua se ijsiujkayot tein kinijtakoua itaixpantijkauan Jiova uan keman kinekij kintatsakuiltiskej maj kiueyichiuakan Jiova.

•   Oloch Tokniuan akin Kinitaj Tekitinij itech Kalmej Betel. Kiitaj nochi tein mouika iniuan akin tekitij Betel tein kijtosneki, akin tekitij ompa itech sucursales kampa kiixyekanaj tekit tein kichiuaj itaixpantijkauan Jiova.

•   Oloch Tokniuan akin Kiixyekanaj tein Mouika ika Amaixmej. Kiitaj tekit tein mochiua kampa mokixtiaj amaixmej uan kititanij nechikolmej, no kiitaj maj mochijchiuakan kalmej kampa timosentiliaj, kalmej kampa kitajtolkepaj amaixmej uan sucursales.

•   Oloch Tokniuan akin Kiitaj tein Mouika ika Tanojnotsalis. Kiitaj tanojnotsalis ika “kuali tanauatilmej ika tekiuajyot” (Mateo 24:14, TNM).

•   Oloch Tokniuan akin Kiixyekanaj Tamachtilis tein Motemaka: Kiitaj tamachtilis tein motemaka itech nechikolmej, tataman tamachtilismej tein kiseliaj itaixpantijkauan Jiova uan tamachtilis tein mokixtia ika audio uan video.

•   Oloch Tokniuan akin Kiixyekanaj tein Moijkuiloua: Kiitaj tein moijkuilos itech toamaixuan tein mokixtia itech Biblia uan tein mokixtia itech Internet kampa timoteixmatiltiaj uan kiitaj tekit tein kichiuaj akin kitajtolkepaj amaixmej.

 Uan no tokniuan akin pouij itech Oloch Taojtokaltianij, mosentiliaj chijchikueyitika uan kiitaj toni moneki mochiuas itech inechikol Jiova. Itech nejin nechikolmej tein kipiaj, kiitaj tein kijtoua Biblia uan kikauaj maj kinixyekana iespíritu Dios. Nochipa kitemouaj kisenixejekoskej teisa (Hechos 15:25).

 Sejse comité kipia inintapaleuijkauan, nejin tokniuan akin amo kikauaj Dios uelij uan kimatij keniuj kichiuaskej tekit tein kiita sejse comité kampa yejuan kinixtalijkej maj tekitikan (1 Corintios 4:2). Nejin tapaleuianij mosentiliaj chijchikueyitika itech nechikol tein kipia comité kampa pouij. Maski yejuan amo kiixtaliaj tein mochiuas, kemaj kijtouaj keniuj ueliskia mochiuas se taman uan kitematiltiaj tein uelis tapaleuis itech tein kiitstokej, kichiuaj tein comité kiixtalij uan kiitstiyouij keniuj tapaleuia tein moixtalij. Oloch Taojtokaltianij no uelis kiniluis maj kinkalpanotij okseki itaixpantijkauan Jiova akin okseko kayomej oso maj tapaleuikan itech uejueyi nechikolmej kemej tein mochiua xijxiujtika oso itech nechikol tein mochiua keman tami tamachtilis tein kiseliaj tokniuan akin youij Galaad.