Amo keman tikchiuanij nejon. Ta, tikpatanij tein tikneltokaj keman tikitaj ke amo senkis mouika ika tein Biblia tamachtia.

 Nochi tein tikneltokaj tikixtiaj itech iTajtol Dios. Maski itech xiuit 1950 peuak tikixtiaj Traducción del Nuevo Mundo de las Santas Escrituras, achto tiktekitiltiayaj tataman Biblias tein onkayaj tein ika timomachtiayaj Biblia ika nejmachkayot. Maj tikitakan seki taman tein tikneltokayaj achto ke tikpiaskiaj Traducción del Nuevo Mundo. Xikonita tejuatsin ox mouikaj ika tein kijtoua Biblia.

1.   Tein tikneltokaj: Dios amo se Trinidad. Amaix Zion’s Watch Tower julio xiuit 1882 (axkan itech náhuatl Tanejmachtijkej) kijtoj: “Akin kiixtajtoltiaj nejin amaix kimattokej ke maski tikneltokaj Jiova Dios, Jesús uan yektikatsin espíritu, senkis tikixtopeuaj keman motamachtia ke nochin eyin mochiuaj sayoj se Dios, porin nejin tamachtilis amo mokixtia itech Biblia”.

     Tein kijtoua Biblia: “Jiova toDios sayoj se Jiova” (Deuteronomio 6:4). “Ongak sayo setsin ten yek melau Dios, uan Yejuatsin Totajtsin Dios. Porin Totajtsin kichijchiuak nochi ten ongak. Uan Dios no techchijchiuak para ma tiktekitilijtinemikan Yejuatsin. Uan no tikmatij ke ongak sayo setsin san ten melau Totekotsin, uan nijin Yejuatsin ya Jesucristo.” (1 Corintios 8:6.) Jesús kijtoj: “Notajtsin Dios Yejuatsin ya ne kachi ueyi chiuke uan ke Nejuatsin” (Juan 14:28).

2.   Tein tikneltokaj: akin amo yolkualmej amo tajyouijtokej miktan. Amaix Zion’s Watch Tower junio xiuit 1882 kipiaya se tamachtilis tein motokaytiaya “Tajtakol techualkuilia mikilis”. Ika nejin tajtolmej, tein mokixtijkej itech Romanos 6:23, tamachtilis kijtouaya: “¡Amo ouij se kiajsikamatis nejin tajtolmej! Amo ueli se kineltoka maj miakej akin kijtouaj ke Biblia yejua iTajtol Dios kiixnamikikan nejon tajtolmej; kineltokaj uan senkis kijtouaj ke Biblia tamachtia ke kemej titajtakouanij titajyouitiuij nochipaya itech miktan”.

     Tein kijtoua Biblia: “Akin tajtakoua... yejua momikilis” (Ezequiel 18:​4, 20). Tatsakuiltilis tein kiseliskej akin kiixnamikij Dios amo tajyouilis itech miktan, ta ijkon kemej kijtoua Traducción del Nuevo Mundo itech 2 Tesalonicenses 1:9 “ixpoliuilis nochipaya”.

3.   Tein tikneltokaj: iTekiuajyo Dios se taixyekanalis, amo teisa tein tikuikaj itech toyolo. Keman Amaix Zion’s Watch Tower diciembre xiuit 1881 ika tajtoj iTekiuajyo Dios, kijtoj: “Keman moixtalis nejin tekiuajyot, ixpoliuiskej nochi taltikpaktekiuajyomej”.

     Tein kijtoua Biblia: “Itech inintonaluan nejon tekiuanij, Dios akin nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas nochipaya” (Daniel 2:​44).

 Amo; itaixpantijkauan Jiova tiksentokaj tiktekitiltiaj okseki Biblias uan ijkon tikteixmatiltiaj tein tikneltokaj. Semi melauak ke ijkuak aksa tikyoleuaj maj kiseli se nemachtil ika Biblia tein amo moixtaua no tikmakaj se Traducción del Nuevo Mundo. Sayoj ke, amo onkak kuejmol komo aksa kineki momachtis ika okse Biblia.