Judas 1:1-25
1 Nejua Judas, niitakeual Jesucristo uan Santiago nokniuj. Nejua namechtajkuilouilia namejuan akin toTajtsin Dios namechnotsak, namechtasojtak uan namechyekpiak para xietokan iuan Jesucristo:
2 Maj Dios okachi namechikneli, maj namechpaleui okachi kuali iuan ximouikakan uan maj okachi namechtasojta.
3 Nokniuantsitsin, achto yekmelauj niknekia namechtajkuilouilis uan ika namechnojnotsas keniuj Dios techmakixtis. Sayoj ke axkan nikita ke okachi moneki namechtajkuilouilis para namechiluis semi ximochikauakan nankisentokaskej nantakuaujtamatiskej iuan Dios, ijkon kemej sayoj sepa yejua kinmachtij akin moinxelouilij* uan amo oksepaok kinmachtis.
4 Namechtajkuilouilia porin kampa nanyetokej ichtakakalakkej seki takamej akin ne uejkaujya Tajkuilolamatsin kinextij ke kintatsakuiltiskej. Nejon takamej amo yolkualmej, kikuij itatiochiualis Dios tein amo technamiki para ika motenpaleuiskej keman kichiuaj tein tetajyaltia uan amo ixpinauaj.* Yejuan kikaujkejya Jesucristo, akin sayoj se toTekotsin akin techkouak.
5 Maski namejuan kuali nankimatijya, nikneki namechelnamiktis ke Jehová* kinmakixtij miakej akin yetoyaj Egipto, sayoj ke satepan kinixpoloj akin amo takuaujtamatkej.
6 Uan ángeles tein amo mokaujkej kampa Dios kintalijka, ta takaujteujkej kampa kinnamikia nemiskej, kinilpij* ika cadena tein amo keman kotoni uan kintalij senkis tayouayanijtik hasta ueyi tonal keman kiixtalijtok kintatsakuiltis.
7 No ijkon, akin nemiaj Sodoma, Gomorra uan itech uejueyi xolalmej tein ompaka moajsiaj, pitsotik auilnenkej* uan kitemojkej kichiuaskej nochi tein kinejnekia ininnakayo maski Dios amo ijkon kiixtalij. Yejua kintatsakuiltij ika tit* tein teixpoloua nochipaya, uan ijkon technejmachtia.
8 Maski ijkon, nejon takamej akin ichtakakalakkej no kinemilijtinemij tein amo kuali,* kitemouaj motekaskej iniuan oksekin para kinpitsotiliskej, kinixtopeuaj akin taixyekanaj uan eliuis kinijijtouaj akin Dios kinueyitalia.
9 Keman Miguel, akin kinixyekana ángeles motajtolteuij iuan in Amokuali porin kinekia inakayo Moisés, amo moixeuij eliuis kinojnotsas uan kiixtalis tein kinamiki kiselis, ta kiluij: “Maj Jehová* mitstakaualti”.
10 Sayoj ke nejon takamej eliuis kijijtouaj nochi tein amo kiajsikamatij. Uan nochi tein kemaj kimatij yejua tein kichiuaj, ijkon kemej tapialmej tein amo tanemiliaj, uan ika nejon kisentokaj okachi mopitsotiliaj.
11 ¡Semi teikneltijkej! Porin kichiujtokej tein kichiuak Caín; kemej kinekij maj kintaxtauikan, niman kichiuaj tein amo kuali ijkon kemej Balaam. Kinixpoloskej porin kinixnamikij* akin kipiaj tanauatil, kemej kichiuak Coré.
12 Nejin takamej namouan tatakuaj keman naniluichiuaj para nankinextiskej ke nankintasojtaj tokniuan, sayoj ke tamatij kemej uejueyi temej tein yetokej atampa; kemej ichkatajpianij akin sayoj yejuan motamakaj uan amo ixpinauaj; kemej mixti tein amo kipia at tein ejekat eliuis kiuika nikan uan nepa; kemej koujmej tein amo kitemakaj takilot keman monekiskia, tein senkis uakkejya* uan kinuiuitakej;
13 tamatij kemej at tein eliuis moajkotatamota uan kiualkixtia tein pitsotik uan tein tepinaujtij; kemej sitalimej tein amo kimatij kani youij. Dios kintalij nejon takamej kampa okachi tayouayan kampa yetoskej nochipaya.
14 Enoc, akin katka chikometika takat satepan de Adán, no kiteixmatiltij tein Dios kiluij keman kijtoj tein kinpanoskia: “¡Xikitakan! Jehová* ualaj iniuan iangeluan tein amo ueli se kinpoua*
15 para kiixtalis tein kinnamikis kiseliskej nochin uan para kinnextilis akin amo yolkualmej nochi tein amo kuali tein kichiujkej. Dios kichiuas nejin porin yejuan tajtakolchiuanij akin kichiujkej tein amo kuali uan eliuis kijijtojkej”.
16 Nejin takamej amo teyi kinyolpaktia uan amo kiuelitaj tein kipiaj uan sayoj kichiujtinemij tein kinejnekij. Sayoj moueyichiuaj keman tajtouaj uan no kinueyitalijtinemij oksekin para maj kinpaleuikan.
17 Sayoj ke namejuan, nokniuantsitsin, xikelnamikikan tein achto kijtojkej itatitaniluan toTekotsin Jesucristo.
18 Yejuan miakpa namechiluiayaj: “Itech tonalmej keman tatamitiya* onkaskej takejkelouanij akin kichiuaskej nochi tein amo kuali tein kinejnekiskej”.
19 Yejuan akin taxexelouaj; tamatij kemej tapialmej,* akin amo moyekanaj ika* ichikaualis Dios.
20 Sayoj ke namejuan nokniuantsitsin, xiktemojtokan okachi nantakuaujtamatiskej, xikchiuakan netataujtil uan ximokauakan maj namechixyekana ichikaualis Dios
21 para nankisentokaskej nankichiuaskej maj Dios namechtasojta, uan no nankichiaskej maj toTekotsin Jesucristo namechikneli. Nejon namechpaleuis xinemikan nochipaya.
22 Uan no, xikiniknelijtokan sekin akin amo yektaneltokaj;
23 xikinmakixtikan maj amo ixpoliuikan.* No xikiniknelijtokan oksekin, sayoj ke ximoyekpiakan, uan xiktauelitakan hasta inintasal tein kipitsotilijkej ika tein amo kuali tein kichiujkej.
24 Axkan, toueyi Dios uelis namechpaleuis amo xitajtakolchiuakan* uan xiijkatokan, amo xikpiakan tein amo kuali uan semi xiyolpakikan iixpan.
25 Dios akin sayoj se, akin techmakixtij itechkopa toTekotsin Jesucristo, kinamiki maj kiueyitalikan, maj yejua ueyi taixyekankej, maj kipia chikaualis uan tanauatil nochipaya: achto, axkan uan nochipaya. Maj ijkon mochiua.*
Tajtolmelaualismej
^ Oso “chipaujkej iixpan”.
^ Tajtol griego, asélgueia. Xikonita akin kichiuaj tein tetajyaltia.
^ Oso “kintsikoj”.
^ Tajtol griego, pornéia. Xikonita auilnemilis.
^ Oso “tekol”.
^ Oso “no takochitstinemij”.
^ Oso “kinnajnankiliaj”.
^ Oso “mikkejya”.
^ Oso “tel miak miles ángeles”.
^ Oso “itamian tonalmej”.
^ Oso “moyekanaj ika tein kinejneki ininnakayo”.
^ Oso “amo kipiaj”.
^ Itech griego, “den tit (tekol)”.
^ Oso “amo xiuetsikan”.
^ Oso “Amén”.
