Hebreos 10:1-39
-
Tapialmej tein kimaktiliaj Dios amo tapaleuiaj (1-4)
-
ITanauatil Moisés kiixnextia tatiochiualismej tein onkas satepan (1)
-
-
Jesucristo sayoj sepa motemaktij uan nejon tapaleuia nochipaya (5-18)
-
“Yankuik ojti tein yoltok tein yejua techtapouilij” (19-25)
-
“Maj amo tiksenkauakan tonechikoluan” (24, 25)
-
-
Akin kiixtaliaj tajtakolchiujtoskej (26-31)
-
Moneki titakuaujtamatiskej para titaxikoskej (32-39)
10 Porin iTanauatil Moisés sayoj kiixnextia tatiochiualismej tein onkas satepan, sayoj ke amo yejua tein yekmelauj onkas. Yejua ika, Tanauatil* uan tein motemaktiaya xijxiujtika amo uelis kinpaleuis akin motokiaj iuan Dios maj amo kipiakanok tajtakol.
2 Komo tein kimaktiliayaj Dios kiixpoloskia tajtakol, ¿kisentokaskiaj kimaktiliskiaj? Amo, porin akin kiueyichiuaj Dios akin chipaujkejya amo kiitaskiajok ke tajtakolejkej.
3 Sayoj ke tein motemaktiaya xijxiujtika techelnamiktia ke titajtakolejkej,
4 porin ininesyo kuakuejmej uan chivos amo ueli kiixpoloua tajtakol.
5 Yejua ika, keman Cristo ualaj nikan taltikpak, kiluij Dios: “‘Amo tiknekik maj mitsinmiktilikan tapialmej nion maj mitsmaktilikan okseki taman, sayoj ke tinechchijchiuilij nonakayo.
6 Amo mitsyolpaktij maj mitschichinouilikan tapialmej nion maj mitsmaktilikan tein kinpaleuis xikintapojpolui akin motajtakolmakakej’.
7 Uan no nikijtoj: ‘NoDios, xikita, niualaj nikchiuako tein tikneki. Itech amatajkuilol* noka tajkuiliujtok’”.
8 Achto kijtoua: “Amo tiknekik nion mitsyolpaktij maj mitsmaktilikan nion teyi, maj mitschichinouilikan tapialmej, nion maj mitsmaktilikan tein kinpaleuis xikintapojpolui akin motajtakolmakakej”, ijkon kemej ixyetok itech iTanauatil Moisés.
9 Uan no kijtoua: “Xikita, niualaj nikchiuako tein tikneki”. Yejua kiixpoloua tein achto ixyetoya para kiixtalis okse taman.
10 Porin Dios ijkon kinekik, techxeloj itechkopa inakayo Jesucristo, akin motemaktij sayoj sepa uan nejon tapaleuia nochipaya.
11 Uan no, nochin tiopixkamej mojmostaj youij kampa ixyetok kichiuaskej tekit tein ika kiueyichiuaskej Dios uan para miakpa kitemaktiskej tein ipa kitemakaj, tein amo keman uelis senkis kiixpolos tajtakol.
12 Sayoj ke Cristo kitemaktij sayoj se taman, tein tapaleuia nochipaya para kiixpolos tajtakol uan motalij iyekmakopa Dios,
13 uan desde ijkuak, kichixtok* maj kintalikan akin kitauelitaj kemej imetstapech.
14 Porin ika sayoj se taman tein kitemaktij yejua kichiuak maj amo keman kipiakanok tajtakol akin Dios kinxelojtok.
15 Uan Dios ika ichikaualis no techyekmatiltia nejon, porin achto kijtoj:
16 “Jehová* kijtoua: ‘Yejua nejin tein nimotenkauas iniuan keman panos nejon tonalmej. Niktalis notanauatiluan itech ininyolo uan nikijkuilos itech inintanemilil’”.
17 Uan no kijtoua: “Uan amo kemanok nikinelnamikilis inintajtakoluan nion tein amo kuali tein kichiujkej”.
18 Keman Dios techtapojpoluia, amo monekiok tikmaktiliskej teisa tein techpaleuis maj techtapojpoluili totajtakoluan.
19 Yejua ika nokniuan, amo timouij tikuiskej ojti tein teuika kampa Okachi Yektik ika iesyo Jesús,
20 se yankuik ojti tein yoltok tein yejua techtapouilij* keman kipanauij ueyi tasal, tein kiixnextia inakayo,
21 uan tikpiaj se ueyi tiopixkat akin kiyekpia ichan Dios.
22 Yejua ika maj timotokikan ika nochi toyolo uan maj semi titakuaujtamatikan, porin toyolo mochipauakya, amo teyi techyolkuejmolouaok uan tonakayo kichipaujkejya ika chipauakat.
23 Maj tiksentokakan tikteixmatiltikan tein tikchiaj uan maj amo tiomeyolouakan, porin akin motenkauak nochipa kichiua tein kijtoua.
24 Maj inintech titanemilikan* oksekin uan ijkon okachi timotasojtaskej se iuan okse uan tikchiuaskej tein kuali,
25 uan maj amo tiksenkauakan tonechikoluan, kemej sekin momattokej. Okachi kuali, maj timoyolchikauakan se iuan okse, okachiok porin tikitaj ke motokia nejon tonal.
26 Porin komo tikixtaliaj titajtakolchiujtoskej satepan ke kuali tikixmatkej tamachtilis tein melauak, amo uelisok motemaktis okse taman tein techpaleuis maj Dios techtapojpoluili totajtakoluan.
27 Sayoj tikmojkachiaskej maj techtatsakuiltikan uan tikchiaskej iueyi kualanyo Dios tein xotatok kemej tit,* tein kintamis akin kiixnamikij.
28 Akin amo kitakamatia iTanauatil Moisés uan onkayaj omen oso eyin akin kiitakaj, kimiktiayaj uan amo kiikneliayaj.
29 ¿Toni nankinemiliaj? Komo aksa* kiixtopeua* iKoneuj Dios, amo kipatiuita esti tein ika moixtalij tein Dios motenkauak uan tein ika kixelojkej, uan kiuijuikaltia ichikaualis Dios tein kitemaka tatiochiualis tein amo technamiki, ¿amo nankinemiliaj ke kinamiki maj okachi kitatsakuiltikan?
30 Porin tikixmatij akin kijtoj: “Nejua nimomakepas; nejua nikinmakas tein kinnamiki”. Uan no: “Jehová* kintatsakuiltis akin pouij itech ixolal”.
31 Semi fiero temoujtij maj tetatsakuilti Dios akin nochipa yoltok.
32 Sayoj ke, nochipa xikelnamiktokan ke satepan ke Dios namechtauilij, nankixikojkej miak taman maski semi nantajyouijkej.
33 Iksa senteixtenoj* namechuijuikaltijkej* uan namechtajyouiltijkej, uan iksa nantajyouijkej iniuan* akin ijkon tajyouijtoyaj.
34 Porin namejuan nankiniknelijkej akin tsaktoyaj uan nankisentokakej nanyolpakkej maski namechkuilijkej tein namoaxka, porin nankimatij ke nankipiaj okachi kuali tatiochiualismej tein amo keman tamiskej.
35 Yejua ika, xiksentokakan xiyolchikaujkej,* porin nankiseliskej se ueyi taxtauil.
36 Porin namejuan moneki nantaxikoskej para nankiseliskej tein Dios motenkauak, sayoj ke achto moneki nankichiuaskej tein Dios kineki.
37 Porin “semi amo uejkaua”, “ejkos akin ualati, uan amo motajkajtilis”.
38 “Sayoj ke akin yolmelauak nemis porin takuaujtamati”, uan, “komo motsinkixtia, yejua amo nechyolpaktis”.
39 Sayoj ke tejuan amo tipouij iniuan akin motsinkixtiaj uan kinixpolouaj, ta tipouij iniuan akin takuaujtamatij uan momakixtiaj.
Tajtolmelaualismej
^ Oso xa “takamej”.
^ Itech griego, “amatatetekuinol”. Xikonita amatatetekuinol.
^ Oso “kichatok”.
^ Itech griego, “kichalij”.
^ Oso “Maj ininka timotekipachokan”.
^ Oso “tekol”.
^ Oso “akin”, “akaj”.
^ Itech griego, “ipan tajtaksa (kitejteliksa, kitsoniksa)”.
^ Itech griego, “kemej kampa semi miakej moixpetaniaj”.
^ Oso “namechtejtelchiujkej”.
^ Oso “iniuan nanyetoyaj”.
^ Oso “amo ximouikan nantajtoskej”.
