Apocalipsis 1:1-20

  • Tein Dios kinextij itechkopa Jesucristo (1-3)

  • Juan kintajpaloua chikome nechikolmej (4-8)

    • “Nejua nipeua uan nejua nitami” (8)

  • Dios ika ichikaualis kiajxitia Juan hasta itonal toTekotsin (9-11)

  • Juan kiita Jesús keman Dios ipa kiueyitalijkaya (12-20)

1  Nejin yejua tein Dios kinextilij* Jesucristo, para maj kinnextili itakeualuan tein amo uejkaua moneki mochiuas. Uan Jesucristo nechualtitanilij iángel nejua Juan, niitakeual Dios,* maj nechiluiki tein kiixnextia nejon tein amo uejkaua mochiuas.  Nejua nikteixmatiltij tein Dios kijtoj uan tein Jesucristo kiteixmatiltij, kemaj, nochi tein nikitak.  Yolpaki akin chikauak kiixtajtoltis* tajtolmej tein kinextia tein mochiuas satepan uan yolpakij akin kikakiskej uan kitakamatiskej tein ompa ijkuiliujtok, porin ejkotokya tonal tein ixyetok.  Nejua Juan, nikintajkuilouilia tokniuan akin pouij itech chikome nechikolmej tein yetokej itech tal tein poui Asia: Dios “akin axkan nemi, akin achto ipa nemia uan akin ualas”, uan chikome chikaualismej tein yetokej iixpan iueyi silla maj namechmakakan tatiochiualis tein amo technamiki uan maj namechpaleuikan kuali ximouikakan iuan Dios.  Uan Jesucristo, taixpantijkej akin takuaujtamach, akin achto oksepa nemik uan akin kinixyekana akin tekiuajtij nikan taltikpak, maj no namechmaka tatiochiualis tein amo technamiki uan maj namechpaleui kuali ximouikakan iuan Dios. Akin techtasojta uan ika iesyo techkixtilij totajtakoluan,  uan akin kichiuak maj titaixyekanakan kemej tekiuanij uan tiopixkamej iixpan iDios uan iTajtsin, yejua kinamiki maj kiueyitalikan uan maj kipia chikaualis nochipaya. Maj ijkon mochiua.*  ¡Xikitakan! Ualas ika mixti uan nochin kiitaskej, hasta akin kikoyonijkej; uan yejua ika nochin akin nemij nikan taltikpak semi tayokoyaskej.* Kemaj, maj ijkon mochiua.*  Jehová* Dios kijtoua: “Nejua nipeua uan nejua nitami,* akin axkan nemi, akin achto ipa nemia uan akin ualas, akin kipia nochi chikaualis”.  Nejua Juan, namokniuj uan no nitaxikojtok, no nitajyouijtok uan namouan nitaixyekanas kemej tekiuaj porin nipoui iuan Jesús. Nietoya itech tal tein youaliujtok ika ueyiat tein monotsa Patmos porin ika nitajtoua Dios uan nikteixmatiltia Jesús. 10  Dios ika ichikaualis nechajxitij hasta itonal toTekotsin, uan nikakik noikampa ke aksa* chikauak tajtouaya, mokakia kemej se trompeta, 11  uan nechiluij: “Xikijkuilo itech se amatajkuilol* tein tikita uan xikintitanili tokniuan akin pouij itech chikome nechikolmej: Éfeso, Esmirna, Pérgamo, Tiatira, Sardis, Filadelfia uan Laodicea”. 12  Nimoixkepak para nikitas akoni nouan tajtouaya, uan keman nimoixkepak, nikitak chikome tauilketsalonimej tein chijchiujtokej ika oro. 13  Tatajko nikitak se akin tamatia kemej se akin yolik kemej takat,* takentoya ika se tasal tein ajsia hasta imetsko, uan yolixilpitoya* ika se tasal* tachijchiuj ika oro. 14  Uan no, kuapochintoya kemej ipantojmiyo ichkat* tein istak, kemej sekti, uan iixtololouan moitayaj kemej tit.* 15  Imetsuan katkaj kemej tel kuali cobre keman milini tikoijtik, uan keman tajtouaya kakistia kemej ijkuak miak at ijkoyoka. 16  Iyekmakopa kipiaya chikome sitalimej; uan itenoj kisaya se ueyak machete* tein ojkan semi tenej, uan iixko katka kemej tonaltsin keman chikauak tona. 17  Keman nikitak, niixtayouak uan niuetsito iixpan. Uan yejua notech kitalij iyekmay uan nechiluij: “Amo ximoui. Nejua akin peuak uan akin tamik, 18  uan akin yoltok. Nimomikilijka, sayoj ke axkan niyoltok uan amo keman nimikisok, uan nikpia llaves para nikintatapouilis akin momikilijkejya uan akin yetokej itech Miketekoch.* 19  Yejua ika xikijkuilo nochi tein tikitak, tein axkan mochiujtok uan tein mochiuas satepan. 20  Dios amo kitematiltijtoya tein kijtosneki chikome sitalimej tein tikitak noyekmakopa uan chikome tauilketsalonimej tein chijchiujtokej ika oro. Sayoj ke yejua nejin tein kijtosneki: chikome sitalimej kiixnextiaj ángeles tein yetokej itech chikome nechikolmej uan chikome tauilketsalonimej kiixnextiaj chikome nechikolmej.

Tajtolmelaualismej

Tajtol griego, apokálypsis. Nejin tajtol kijtosneki ‘se kiixtapoua’.
Oso xa “Jesús”.
Oso “kileros”.
Oso “Amén”.
Oso “moyolixkojkomoniskej porin tayokoyaskej”.
Oso “amén”.
Xikonita Jehová.
Oso “niAlfa uan niOmega”. Itech tajtol griego, alfa yejua letra tein ika peua abecedario uan omega tein ika tami.
Oso “akin”, “akaj”.
Itech griego, “amatatetekuinol”. Xikonita amatatetekuinol.
Oso “yolixtsikaujtoya”, “ielpan ilpitoya”.
Oso “paxa (tajkotsikaujka)”.
Oso “borrego”.
Oso “tekol”.
Oso “espada”.
Oso “Hades”, kampa moseuijtokej mikemej. Xikonita miketekoch.