Gálatas 2:1-21
2 Keman panok 14 xiujmej, oksepa nipankisak Jerusalén iuan Bernabé, uan no nikuikak Tito.
2 Nipankisak porin toTekotsin nechnextilij ke monekia nias. Ompa nikinmelauilij tokniuan kuali tanauatilmej* tein nikinixmatiltijtok akin amo judíos. Sayoj nimosentilij iniuan tokniuan akin taixyekanayaj itech nechikol, porin niknekia nikmatis ox amo nenkaj katka tekit tein nikchiujtoya oso tein nikchiujka.
3 Sayoj ke nion Tito, akin nouan yetoya, kiluijkej ke monekia motekis,* maski katka griego.
4 Nejon kuejmol peuak keman ichtakakalakkej akin amo yekmelauj tokniuan para techpijpiaskej. Tejuan amo timoajsijok temako porin tipouij iuan Cristo Jesús uan yejuan kichiuasnekiaj maj oksepa tiktakamatikan* tanauatil.
5 Sayoj ke tejuan nion tepitsin* tikintajtolkakkej porin amo tiknekij xikauakan tein melauak tein moajsi itech kuali tanauatilmej.
6 Sayoj ke tokniuan akin kinitaj ke ueyichiuanimej uan semi kintakachiuaj* amo nechiluijkej nion teyi tein yankuik. Amo notekiuj toni chiuanimej, porin Dios amo kiita ox aksa* ueyichiujkej oso amo.
7 Yejuan kiitakej ke nechkauilijkaj maj nikinixmatilti kuali tanauatilmej akin amo judíos,* ijkon kemej Pedro kikauilijkaj maj kinixmatilti judíos,*
8 porin akin kimakak tanauatil Pedro para maj kichiua tekit kemej tatitanil iniuan akin judíos,* no nechmakak tanauatil maj nikchiua tekit kemej tatitanil iniuan akin amo judíos.
9 Uan yejuan kiitakej tatiochiualis tein amo technamiki tein nikselijka. Santiago, Cefas* uan Juan, akin kinitayaj ke okachi tayekantoyaj,* techmatajpalojkej Bernabé uan nejua ika ininyekmay, uan ijkon kinextijkej ke kuali kiitayaj maj tejuan tikinnojnotsatij akin amo judíos uan yejuan maj kinnojnotsatij judíos.*
10 Sayoj ke techiluijkej maj amo tikinelkauakan pobres, uan yejua nejon tein nimochikauani nikchiuas ika nochi noyolo.
11 Sayoj ke, keman Cefas ualaj Antioquía, nikixiluij ke amo kuali tein kichiujtoya.
12 Porin achto ke ejkoskiaj seki tokniuan akin Santiago kinualtitanka, yejua takuaya iniuan akin amo judíos, sayoj ke keman yejuan ejkokej amo takuayaok iniuan uan amo iniuan mosentiliayaok porin kinmouiliaya judíos.*
13 Okseki judíos no peujkej taixkajkayauaj ijkon kemej yejua, uan hasta Bernabé no peuak ijkon taixkajkayaua.
14 Yejua ika, keman nikitak ke amo kichiujtoyaj tein melauak tein moajsi itech kuali tanauatilmej, nikiluij Cefas ininixpan nochin: “Komo tejua ke tijudío tinemi kemej akin kayomej itech okseki altepemej, uan amo kemej judíos, ¿keyej tikneki tikchiuas maj akin kayomej itech okseki altepemej nemikan kemej judíos?”.
15 Tejuan ke tijudíos, uan amo titajtakolchiuanij kemej akin kayomej itech okseki altepemej,
16 tikmatij ke Dios amo kiita ke aksa yolmelauak porin kichiua tein kijtoua tanauatil, ta sayoj porin takuaujtamati iuan Jesucristo. Yejua ika titakuaujtamatij iuan Cristo Jesús: para maj Dios techita ke tiyolmelaujkej porin titakuaujtamatij iuan Cristo, uan amo porin tikchiuaj tein kijtoua tanauatil. Porin Dios amo akin kiitas ke yolmelauak porin kichiua tein kijtoua tanauatil.
17 Komo tejuan timochikaujtokej maj Dios techita ke tiyolmelaujkej itechkopa Cristo uan maski ijkon techitaj ke titajtakolchiuanij, ¿kijtosneki nejon ke Cristo kichiua maj titajtakokan? ¡Amo!
18 Komo axkan nikyekchijchiujtok tein achto nikxitinij, niknextia ke amo niktakamati tanauatil.
19 Yejua ika, itechkopa tanauatil kemej yeskia nimomikilij iixpan tanauatil, uan ijkon uelis ninemis para niktekitilis Dios.
20 Nipilkatok itech kouit iuan Cristo. Amo nikchiuaok tein nejua nikneki,* porin Cristo nemi notech. Tein melauj, axkan ninemi porin nitakuaujtamati iuan iKoneuj Dios, akin nechtasojtak uan noka motemakak.
21 Nejua amo nikixtopeua itatiochiualis Dios tein amo technamiki, porin komo Dios kiita ke aksa yolmelauak porin kitakamati tanauatil, Cristo nenkaj momikilij.
Tajtolmelaualismej
^ Oso “tajtolmej”.
^ Oso “mochiuilis circuncisión”. Xikonita circuncisión.
^ Oso “timoajsikan imako”.
^ Itech griego, “nion se hora”.
^ Oso “kinpoujkaitaj”.
^ Oso “akin”, “akaj”.
^ Oso “akin amo kintekinij”.
^ Oso “akin kintekkejya”.
^ Oso “akin kintekkejya”.
^ No monotsa Pedro.
^ Oso “kemej kalikximej”.
^ Oso “akin kintekkejya”.
^ Oso “akin kintekkejya”.
^ Itech griego, “Amo nejuaok akin niyoltok”.
