2 Corintios 6:1-18
6 Kemej titekitij iuan Dios, tejuan no tamechtataujtiaj amo nenkaj xikselikan itatiochiualis Dios tein amo technamiki.
2 Porin yejua kijtoua: “Nimitskakik itech tonalmej keman nitatiochiujtoya uan nimitspaleuij keman nitemakixtijtoya”. ¡Axkanya nejon tonalmej keman Dios tatiochiujtok! ¡Axkan nejon tonal keman Dios temakixtia!
3 Amo teyi tikchiujtokej tein kichiuas maj oksekin uetsikan,* para maj amo akin kitejteneujto* tekit tein tikchiuaj.
4 Okachi kuali, tiknextiaj ke tiitekitikauan Dios itech nochi tein tikchiuaj: keman tikxikouaj miak taman, keman titajyouiaj, keman amo tikpiaj tein moneki, keman tikpiaj ouijkayomej,
5 keman techmagaj,* keman techtsakuaj, keman timoajsij kampa takuejmolchiuaj, keman chikauak titekitij, keman timokochijsolouaj,* keman amo tikpiaj tein tikuaskej;
6 keman tichipaujkanemij, keman tikixmatij tein melauak, keman amo tiyolijsiuij uan tikualtakamej, keman timokauaj maj techixyekana ichikaualis Dios, keman yekmelauj titetasojtaj uan amo titaixkajkayauaj,
7 keman tikijtouaj tein melauak, keman titakuaujtamatij itech ichikaualis Dios, ijkuak kemej yeskia tikpiaj teposmej toyekmakopa* uan toopochmakopa* tein techpaleuiaj maj tikchiuakan tein kuali yetok,
8 keman techueyitaliaj oso amo techtakachiuaj,* keman kuali toka tajtouaj oso techijijtouaj. Techitaj kemej takajkayauanij maski tikijtouaj tein melauak;
9 kemej akin amo techixmatij maski kuali techixmatij; kemej yeskia timomikilijtokej* maski tiyoltokej; kemej yeskia techtatsakuiltijkej sayoj ke amo techmiktijkej;
10 techitaj kemej yeskia titayokoxtokej maski nochipa tiyolpaktokej; kemej yeskia tipobres maski tikinmakaj miak taman oksekin uan kemej yeskia amo teyi tikpiaskiaj maski tikpiaj nochi.
11 Tokniuan akin nanyetokej Corinto, tamechyeknojnotstokej uan tamechtasojtaj ika nochi toyolo.*
12 Tejuan semi tamechtasojtaj, sayoj ke namejuan amo semi nantechtasojtaj.
13 Yejua ika, no ijkon xikchiuakan touan uan no okachi xitetasojtakan.* Namechnojnotstok kemej yeskia nannokoneuan.
14 Amo ximosentilikan* iniuan akin amo taneltokaj. Porin ¿uelis mouikas tein kuali iuan tein amo kuali?* ¿Uelis mouikas tanex iuan tayouayanilot?
15 Uan no, ¿uelis moyekuikaskej Cristo uan Amokuali?* ¿Toni kinsentilis se akin taneltoka uan se akin amo taneltoka?
16 ¿Uelis yetoskej tatadiosmej* itech itemplo Dios? Porin tejuan kemej yeskia itemplo se Dios akin nochipa yoltok. Ijkon kemej Dios kijtoj: “Nejua ninemis iniuan uan nietos iniuan, uan niyeski ininDios uan yejuan yeskij noxolal”.
17 “Jehová* kijtoua: ‘Yejua ika, xikisakan uan amo iniuan ximonelokanok uan amo xiksentokakan xikmatokakan* tein pitsotik’, ‘uan nejua namechselis’”.
18 “Jehová* akin kipia nochi chikaualis kijtoua: ‘Uan nejua niyeski namopaj uan namejuan nanyeskij nannookichpipiluan uan nannosiuapipiluan’”.
Tajtolmelaualismej
^ Oso “motepotamikan”.
^ Oso “kiixtopeua”.
^ Oso “techuitekij”.
^ Oso “timokochisuiaj”, “amo ueli tikochij”.
^ Xa para titateuiskej.
^ Xa para timopaleuiskej.
^ Oso “amo techpoujkaitaj”.
^ Oso “technamiki maj timikikan”.
^ Itech griego, “tamechtapouilijkej toyolo”.
^ Oso “no xikpatauakan namoyolo”.
^ Nejin kijtosneki kemej keman se kuakouej kisenilpiaj (kisentsikouaj) iuan okse tapial tein amo ikuakuejikniuj.
^ Itech griego, “se kitapanauilis tanauatil”, tein kijtosneki se kiixtopeuas itanauatiluan Dios.
^ Oso “Belial”. Nejin tokayit no ika moixmati Satanás uan ualeua itech se tajtol hebreo tein kijtosneki ‘amo kualtia’.
^ Oso “tiotsitsin”.
^ Oso “xikitskikan”, “xikmachilikan”.
