1 Pedro 2:1-25
2 Yejua ika xikauakan nochi tein amo kuali, amo xitakajkayauakan, amo xitaixkajkayauakan, amo xitenexikoluikan,* uan amo xitetakajkayauilikan.
2 Ijkon kemej konemej akin yekin yolkej kitelnekij tayiskej leche, no xiktelnejnekikan itajtol Dios tein chipauak tein namechpaleuis ximoskaltikan para uelis namakisaskej,
3 porin kuali nankimatij ke toTekotsin kualtakat.
4 Yejua kemej se tet tein yoltok tein kiixtopeujkej, sayoj ke Dios kijitak* uan kiita ke semi tapaleuia. Ijkon kemej iuan namotokijtiouij,
5 namejuan, kemej yeskia temej tein yoltokej, Dios namechsajsalojtiuj ika ichikaualis para namochiuaskej kemej yeskia se kali. Ijkon nanyeskij nantiopixkamej akin Dios namechxeloj* uan itechkopa Jesucristo nankimaktiliskej tein kiyolpaktis ijkon kemej ichikaualis Dios namechixyekanas.
6 Porin Tajkuilolamatsin kijtoua: “¡Xikitakan! Ompa Sion niktalia se tet tein nikijitak,* se tet tein okachi tayekantok uan tein semi tapaleuia, uan akin itech takuaujtamatis amo keman mopinaujtis”.
7 Yejua ika, namejuan nankiitaj ke yejua motelneki porin nantaneltokaj. Sayoj ke akin amo taneltokaj, kiitaj ke “tet tein kalchiuanij kiixtopeujkej, yejua tein mochiuako ueyi tet tein kichikaua ome tepamit”,*
8 uan “se tet tein kichiua maj uetsikan, uan se ueyi tet tein kintsakuilia ininojpan”. Yejuan uetsij porin amo kitakamatij itajtol Dios. Akin ijkon kichiuaj no yejua nejon tein kinpanos.
9 Sayoj ke namejuan nanpouij “iniuan akin Dios kinijitak,* nantekiuanij uan nantiopixkamej, nanpouij itech se xolal tein Dios kixeloj, itech se xolal tein iaxka Dios para xikteixmatiltikan noyampa* tein kuali tein kinextia” akin namechuikak itech ikualtsin tanex porin nanyetoyaj kampa tayouayan.
10 Porin achto amo nanpouiaj itech se xolal, sayoj ke axkan nanpouij itech ixolal Dios; achto amo namechikneliayaj, sayoj ke axkan namechikneliajya.
11 Nokniuantsitsin, namejuan kemej yeskia nananaltekos uan nantepalyetonij, yejua ika namechtataujtia xiksentokakan xikixtopeuakan tein kinejneki namonakayo, tein namechixnamiki.
12 Xiksentokakan kuali xinemikan ininixpan akin amo taneltokaj, ijkon keman namechijtouiliskej ke nankichiuaj tein amo kuali, yejuan kiitaskej tein kuali tein nankichiuaj, uan nejon tapaleuis maj kiueyitalikan Dios itech tonal keman tachiakiuj.
13 Kemej nantakuaujtamatij iuan toTekotsin, xikintakamatikan taixyekananij akin kinixtaliaj nikan taltikpak, yeski se tekiuaj akin okachi ueyichiujkej
14 oso taixyekananij, akin tekiuaj kintitani maj kintatsakuiltitij akin kichiuaj tein amo kuali uan maj kinueyitalikan akin kichiuaj tein kuali.
15 Porin Dios kineki xikchiuakan tein kuali, uan ijkon uelis nankintentsakuaskej* akin amo kuatamatij uan sayoj tajtouaj.
16 Xinemikan kemej nemij akin amo moajsijok temako, sayoj ke amo ika ximotenpaleuikan para nankichiuaskej tein amo kuali, ta xiktekitilikan Dios.
17 Xikintakachiuakan* nochin, xikintasojtakan nochin tokniuan, xikmojkatokakan Dios, xiktakachiuakan tekiuaj.
18 Maj takeualmej kintakamatikan inintekouan uan maj semi kintakachiuakan,* amo sayoj akin yolkualmej uan kualtakamej,* ta no akin amo teyi kiuelitaj.
19 Porin Dios semi kiyolpaktia komo aksa* taxikoua keman kipia ouijkayomej* uan kitajyouiltiaj maski amo teyi kichiujtok porin kitakamati Dios.
20 Komo namechmagaj* porin nankichiujkej tein amo kuali uan nantaxikouaj, ¿toni namotaniliaj? Sayoj ke, komo nantaxikouaj keman namechtajyouiltiaj porin nankichiuaj tein kuali, nejon semi kiyolpaktia Dios.
21 Tein melauj, yejua ika Dios namechnotsak, porin Cristo namoka tajyouij uan ijkon namechnextilij keniuj nankichiuaskej kemej yejua.*
22 Yejua amo kichiuak nion se tajtakol, uan amo keman takajkayauak.
23 Keman kiuijuikaltijtoyaj,* yejua amo kinuijuikaltij. Keman tajyouijtoya, amo kiniluij ke momakepaskia, ta kikauak nochi imako juez akin kiixtalia nochi kemej moneki.
24 Yejua kiuikak totajtakoluan itech inakayo keman kikoujpampilojkej, para maj techkixtilikan tajtakol uan maj tinemikan para tikchiuaskej tein kuali yetok. Uan “kemej kikojkokojkej, namejuan nanpajtikej”.
25 Porin namejuan nankatkaj kemej ichkamej* tein poliujtoyaj, sayoj ke axkan namokepkejya iuan namotajpixkauj uan namotaixyekankauj.
Tajtolmelaualismej
^ Oso “amo xiknekikan namoaxkatiliskej tein teaxka”.
^ Oso “kiixpejpenak”.
^ Oso “nanchipaujkej iixpan Dios”.
^ Oso “nikixpejpenak”.
^ Oso “tepanchikaualoni”.
^ Oso “kinixpejpenak”.
^ Oso “nouian”.
^ Oso “nankintamatiliskej”. Itech griego, “nankintenilpiskej”, “nankintentsikoskej”.
^ Oso “Xikinpoujkaitakan”.
^ Oso “kinpoujkaitakan”.
^ Oso “amo yoltakuaujkej”.
^ Oso “akin”, “akaj”.
^ Oso “tajyouilis”.
^ Oso “namechuitekij”.
^ Oso “nankitojtokaskej ika nejmachkayot kampa taksak”.
^ Oso “kitejtelchiujtoyaj”.
^ Oso “borregos”.
