1 Corintios 2:1-16
2 Yejua ika nokniuan, keman namechitato, ika namechnojnotsak tein Dios amo kitematiltijtoya,* sayoj ke amo nitajtoj kemej nanechmojkaitaskiaj oso kemej niknextiskia ke semi nitamatkej.
2 Porin keman nietoya namouan, nikixtalij sayoj ika namechnojnotsas Jesucristo, uan ke kikoujpampilojkej.
3 Keman namechitato nikuetauia, nimouia uan semi niuiuiyokaya.
4 Uan keman namechnojnotsak uan namechmachtij, amo nitajtoj kemej tajtouaj tamatinij para tetaneltoktiskej, ta tein nikijtoj kinextij tein Dios ueli kichiua ika ichikaualis
5 para xitakuaujtamatikan itech ichikaualis Dios uan amo itech tamatilis tein onkak nikan taltikpak.
6 Tejuan ika titajtouaj tamatilis iniuan akin semi takuaujtamatij. Sayoj ke amo ika titajtouaj inintamatilis akin nemij itech nejin tonalmej,* nion ika inintamatilis taixyekananij, tein ixpoliuiti.
7 Tejuan ika titajtouaj tein Dios amo kitematiltijtoya,* nejin yejua itamatilis tein amo nochin kiixmatij. Dios kiixtalij nejin achto ke nikan taltikpak peuaskia mochiuaskia tein amo kuali, para maj techueyitalikan.
8 Yejua nejin tamatilis tein amo kiixmatik nion se taixyekankej akin nemi itech nejin tonalmej;* porin komo kiixmatiskiaj, amo kimiktiskiaj* toueyi Tekotsin.
9 Ijkon kemej ijkuiliujtok: “Amo akin kiitani, amo akin kikakini uan nion akin kinemiliani tein Dios kinmakati akin kitasojtaj”.
10 Dios ika ichikaualis techmatiltij nochi nejin, porin ichikaualis Dios kiyeknextia nochi, hasta itanemililuan Dios tein amo ueli se kitamiajsikamati.
11 Porin amo ueli se kimati tein okse kinemilijtok. Sayoj yejua kimati tein kipia itech iyolo. No ijkon, amo akin kiixmati itanemililuan Dios, ta sayoj ichikaualis Dios.
12 Tejuan amo timoyekanaj ika tein kinemiliaj oksekin, ta timoyekanaj ika ichikaualis Dios, para maj tikixmatikan tein Dios techmakani ika nochi iyolo.
13 Tejuan no ika titajtouaj nejin, sayoj ke amo tikuij tajtolmej tein techmachtij se tamatkej, ta tein Dios techmachtij ika ichikaualis. Yejua ika, tikmelauaj itanemililuan Dios keman tikteixmatiltiaj tein Dios techmachtij ika ichikaualis.
14 Sayoj ke akin moyekana ika tein kinejneki inakayo amo kiselia tein Dios kiteixmatiltia ika ichikaualis, porin yejua kiita ke amo tapaleuia, uan amo no ueli kiajsikamati porin moneki kipias ichikaualis Dios para kiyektemos.
15 Sayoj ke akin moyekana ika ichikaualis Dios kiyektemoua nochi, sayoj ke amo akin ueli kiixejekoua ox tein kichiua kuali yetok oso amo.
16 Porin “¿akoni ueli kiixmati itanemililuan Jehová?* ¿Akoni uelis kimachtis Dios?”. Sayoj ke tejuan kemaj titanemiliaj kemej Cristo.
Tajtolmelaualismej
^ Xikonita tein Dios amo kitematiltijtoya.
^ Xikonita tonalmej; tein mochiujtok.
^ Xikonita tein Dios amo kitematiltijtoya.
^ Xikonita tonalmej; tein mochiujtok.
^ Oso “amo kimiktiskiaj itech kouit”.
