Touampoyouaj kichiuaj ma tiyolpakikaj uan kuali ma tijtlapejpenikaj tlen tijchiuasej ipan tonemilis. Katli kuali touampoyouaj techpaleuiaj ma tijnextikaj kuajkuali tlamantli uan ma tikitakaj tlen tiuelij tijchiuaj (Proverbios 27:17).

 Biblia kiijtoua tlauel moneki kuali tikintlapejpenisej touampoyouaj uan nojkia kiijtoua tlake uelis techpanos tlaj amo kuali tikintlapejpenisej (Proverbios 13:20; 1 Corintios 15:33). Touampoyouaj uelis kichiuasej amo kuali ma tijtlapejpenikaj tlen tijchiuasej o ayokmo ma tijnextikaj kuajkuali tlamantli.

Ipan ni tlamachtili tikitasej:

•  ¿Ajkia eli se kuali touampo?

•  ¿Ajkia inijuantij kiijtoua Biblia kuali mouampojchijkej?

•  ¿Uelis timouampojchiuasej iuaya toTeotsij?

•  Textos tlen techpaleuis kuali ma tikintlapejpenikaj touampoyouaj

 Biblia kiijtoua se kuali touampo amo san moneki kipaktis tlen tojuantij techpaktia o kichiuas tlen tijchiuaj. Se neskayotl, Salmo 119:63 kiijtoua: “Na nikinita keja nouampoyouaj nochi tlen a mitsimakasij uan mitstlepanitaj, uan nochi tlen kichiuaj tlen kiijtoua motlanauatiljuaj”. Katli kiijkuilok ni texto kiijtok ya kintlapejpenik iuampoyouaj katli kinekiyayaj kiyolpakiltisej toTeotsij uan kichiuasej tlen tlanauatia.

 Biblia kiijtoua tlake kuajkuali tlamantli moneki kinextis se kuali touampo. Ma tikitakaj:

•   “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:17).

•   “Se tlakatl tlen kineki kinpias iuampoyouaj, moneki kinpaleuis sekinok keja mochiuaj tlakamej tlen mouampochijtokej. Pero itstokej touampoyouaj tlen más techikneliaj kej toikniuaj” (Proverbios 18:24).

 Ni textos techmachtia se kuali touampo moneki amo tetlauelkauas, teiknelis, kuali tenojnotsas uan kipaktis temakas tlen kipia. Se kuali touampo amo kema techtlauelkauas maske tijpiasej tlaouijkayotl. Nojkia, amo majmauis techiljuis kema kiitas tijchiuaj tlen amo kuali o kema kiitas tijtlapejpenisej se tlamantli tlen amo techpaleuis ipan tonemilis (Proverbios 27:6, 9).

 Biblia kiijtoua inintoka se keskij katli kuali mouampojchijkej maske amo eliyayaj sanse, kampa ueli euayayaj, amo sanse ininxiui kipixtoyaj uan amo sanse kampa tekitiyayaj. Ma tikitakaj eyi neskayotl:

•   Rut uan Noemí. Noemí eliyaya iyexna Rut, yeka amo kipiayayaj sanse ininxiui uan amo sanse kampa euayayaj. Maske amo eliyayaj sanse, inijuantij kuali mouampojchijkej uan tlauel moiknelijkej (Rut 1:16).

•   David uan Jonatán. Maske Jonatán kitlaniyaya David ika 30 xiuitl, Biblia kiijtoua Jonatán “mochijki ineluampo” David (1 Samuel 18:1).

•   Jesús uan iapóstoles. Jesús kipiayaya tlanauatili ika iapóstoles pampa eliyaya “[inin]tlamachtijka uan [inin]Teko” (Juan 13:13). Maske kiampa eliyaya, kinitayaya kej iuampoyouaj. Nojkia, Jesús kuali mouikayaya ika katli kuali kitlakakiliyayaj. Ya kiijtok: “Niinmechnotsas innouampoyouaj, pampa nochi tlen noTata nechiljuijtok nojkia niinmechiljuijtok” (Juan 15:14, 15).

 Kena, maseualmej uelis mouampojchiuasej iuaya toTeotsij. Biblia kiijtoua ya “kiniknelia tlen itstokej xitlauakej iixpa” (Proverbios 3:32). ToTeotsij kintlapejpenia kej iuampoyouaj katli kichiuaj kampeka kuali monejnemiltisej, amo tekajkayauasej uan kichiuasej tlen kiijtoua itlanauatiljuaj. Se neskayotl, Biblia kiijtoua Abraham, elki toTeotsij iuampo pampa amo kema kitlauelkajki (2 Crónicas 20:7; Isaías 41:8; Santiago 2:23).