Mochampoyouaj uan mouampoyouaj
Sekij maseualmej tlauel ouij kimatij kuali mouikasej ininuaya sekinok. Ma tikitakaj kenijkatsa se keski tlamantli tlen Biblia tetlajtolmaka techpaleuia kuali ma timouikakaj ininuaya sekinok.
AMO SAN IPAN TA XIMOSENTLALI
TLEN BIBLIA TETLAJTOLMAKA: “Amo san ximoiljuikaj tlen tlamantli tlen inmechpaleuis. Nojkia ximoiljuikaj tlen kinpaleuis sekinok” (Filipenses 2:4).
¿TLAKE KIIJTOSNEKI? Tlaj tijneki kuali timouikas ininuaya sekinok, moneki timoiljuis tlake kinpaleuis, tijnekis titemakas se tlenijki uan amo san tijnekis tijselis. Kema se akajya san ipan ya moiljuia, ayokmo kuali mouika ininuaya sekinok. Tlaj se katli mosenkajtok san ipan ya moiljuia, teipa uelis kiixpanos isiua o iueue. Uan se akajya katli nochipa kiijtojtinemi tlen kipia o tlen kimati, iuampoyouaj kitlauelkauasej. Nopa amochtli El camino del carácter kiijtoua se akajya katli san ipan ya moiljuia, kipanos tlen amo kuali.
¿TLAKE UELIS TIJCHIUAS?
Xikinpaleui sekinok. Se akajya kuali mouampojchiuas mouaya tlaj kiitas tijneki tijpaleuis uan tieli titemachtli. Ixtlamatinij kiijtouaj kema maseualmej tepaleuiaj, kinpaleuia ma mopatiitakaj uan amo tlauel ma mokuesokaj.
Xijyolmati tlen sekinok kiyolmatij. Tijyolmatis tlen sekinok kiyolmatij kiijtosneki timoiljuis kejuak ta mitspano tlen seyok kipano uan tijkuamachilis kenijkatsa tlauel moyolkokoua. Tlaj ta kiampa tijchiuas, uajka amo tijpinajtis yon tijyolkokos ika tlen tikiljuis se akajya katli mokuesojtok.
Tlaj tijyolmatis tlen sekinok kiyolmatij, nojkia mitspaleuis tijpias moyolo, kiampa amo tikinchikoitas sekinok uan timouampojchiuas ika maseualmej katli kampa ueli euaj maske amo elij sanse kej ta.
Xiitsto ininuaya sekinok. Tlaj tijneki tikinixmatis sekinok, moneki tiitstos ininuaya. Uan tlaj tijneki tikinpias mouampoyouaj, moneki tikamanaltis ininuaya tlen inijuantij kinpano o kipaktia. Yeka, kuali xikintlakakili mouampoyouaj uan xijnexti mitstekipachoua tlen kinpano. Ixtlamatinij kiitstokej “maseualmej katli kiijtouaj nochi tlen kinpano, tlauel yolpakij”.
KUALI XIKINTLAPEJPENI MOUAMPOYOUAJ
TLEN BIBLIA TETLAJTOLMAKA: “Intla se kuali tlakatl nemi ika fiero tlakamej, kiijtlakosej nopa kuali tlen kinekiyaya kichiuas” (1 Corintios 15:33).
¿TLAKE KIIJTOSNEKI? Mouampoyouaj uelis mitsyololinisej xijchiua tlen kuali o tlen amo kuali. Katli momachtiaj kenijkatsa monejnemiltiaj maseualmej nojkia kiitstokej nopa. Kiijtouaj se akajya uelis peuas tlachichinas o kikauas isiua o iueue tlaj mouampojchiua ininuaya katli kiampa kichijtokej.
¿TLAKE UELIS TIJCHIUAS? Ximouampojchiua ika maseualmej katli kinextiaj kuajkuali tlamantli tlen ta tijpatiita uan tlen nojkia tijneki tijnextis. Uelis ika maseualmej katli kuali tlalnamikij, katli tlatlepanitaj, katli kinpaktia temakasej tlen kipiaj uan katli kuali teseliaj.
TLEN NOJKIA MITSPALEUIS
Xikita videos kampa nesi tlen Biblia tetlajtolmaka, tlen kinpaleuis konemej, telpokamej uan katli mosenkajtokej.
AMO MA TITEYOLKOKOKAJ
“Itstokej sekij tlakamej tlen tekokouaj ika inintlajtol keja eliskia se machete tlen tlateki” (PROVERBIOS 12:18).
XITEMAKA TLEN TIJPIA
“Se tlakatl tlen ueyi iyolo uan tlen kinmaka sekinok miak tlamantli tlen kipia, teipa achi más moricojchiuas” (PROVERBIOS 11:25).
XIKINCHIUILI SEKINOK TLEN MITSPAKTISKIA MA MITSCHIUILIKAJ
“Uajka xikinchiuilikaj sekinok [sanse] keja inkinekij sekinok ma inmechchiuilikaj” (MATEO 7:12).
