Maseualmej katli moyakanaj ika kuajkuali tlamantli kimatij tlake tlamantli kuali uan tlake amo kuali. Maske mopatla se keski tlamantli ipan ininnemilis, amo kipatlaj kej monejnemiltiaj pampa miak kuajkuali tlamantli kiyakana tlen kichiuaj maske amo aka kinita.

Ipan ni tonali konemej kinkajkayauaj ika uikatl, películas, televisión uan ika tlen moiljuiaj katli ininuaya momachtiaj, yeka ayokmo kimatij tlake tlamantli kuali uan tlake amo. Nopa uelis kichiuas ayokmo ma kinekikaj moyakanasej ika kuajkuali tlamantli.

Nopa pano kema konemej elij piltelpokatsitsij. Amochtli Beyond the Big Talk (Después de “la charla padre e hijo”) kiijtoua piltelpokatsitsij “moneki kuali mokualchijchiuasej pampa katli ininuaya momachtiaj, tlen kiitaj, tlen kipouaj uan tlen kikakij kichiuas tlauel ma kinekikaj pankisasej. Moneki momatisej moyakanasej ika kuajkuali tlamantli maske ininuampoyouaj amo kiampa kichiuaj”. Yeka, tetajmej moneki kinmachtisej ni tlamantli kema ayamo mochiuaj piltelpokatsitsij.

Xikinmachti tlake kuali uan tlake amo kuali

TLEN BIBLIA TETLAJTOLMAKA: “Tlakamej tlen ya moskaltijtokej [...] kitekiuijtokej inintlalnamikilis para kiixmatisej tlen kuali uan tlen axkuali para kichiuasej” (Hebreos 5:14).

• Xikiniljui tlen kinpaleuis. Xijtekiui tlamantli tlen pano mojmostla uan xikiljui mokone kenke se tlamantli amo eli sanse. Ueliskia tikiljuis: “Kej ni amo titlakajkayauas. Kej ni titlakajkayauas”, “Kej ni tijnextis amo titetlauelkaua. Kej ni tijnextis titetlauelkaua”, “Kej ni tijnextis titlatlepanita. Kej ni tijnextis amo titlatlepanita”. Teipa, mokone kinextis kuajkuali tlamantli ipan inemilis.

• Xikiniljui kenke moneki moyakanasej ika kuajkuali tlamantli. Xijmachti mokone kuali ma moyakana. Xijtlajtlani: “¿Kenke amo moneki titlakajkayauas?”, “¿Kenke tlaj tiistlakatis ayokmo kuali timouikas ininuaya sekinok?” o “¿Kenke amo kuali titlachtekis?”.

• Xikiniljui kenijkatsa kinpaleuis nopa kuajkuali tlamantli. Xikiljui: “Tlaj amo titlakajkayauas, maseualmej motemachisej ipan ta” o “Tlaj titlatlepanitas sekinok kinekisej itstosej mouaya”.

 Xikinpaleui mochampoyouaj ma moyakanakaj ika kuajkuali tlamantli

TLEN BIBLIA TETLAJTOLMAKA: “Ximoyejyekokaj intla inkichiuaj tlamantli tlen kinextia para nelia inkineltokaj toueyiTeko o axtle” (2 Corintios 13:5).

• Nochi mochampoyouaj moneki moyakanasej ika kuajkuali tlamantli, kiampa uelis tikijtos:

  • “Tojuantij amo tiistlakatij”.

  • “Ipan tochaj, amo timoteuiaj yon timotsajtsiliaj”.

  • “Tojuantij amo timotlaijiljuiaj”.

Kiampa mokone kiitas nopa kuajkuali tlamantli tlen ika inmoyakanaj amo eli san tlanauatili pampa kiitas nochi mochampoyouaj kichiuaj ipan ininnemilis.

• Xijtekiui tlamantli tlen mojmostla pano kema tikamanaltis iuaya mokone ika nopa kuajkuali tlamantli tlen ika inmoyakanaj. Xikiljui amo inmonejnemiltiaj kej katli ininuaya momachtia o tlen nesi ipan televisión o Internet. Xijtlajtlani: “¿Ta tlake tijchijtoskia?” o “¿Tlake kichijtoskiaj tochampoyouaj?”.

Xikinpaleui ma mosentlalikaj kichiuasej tlen kuali

TLEN BIBLIA TETLAJTOLMAKA: “Xijpiakaj kuali inmotlalnamikilis” (1 Pedro 3:16, TNM).

• Xikiniljui kuali tlen kichijkej. Kema mokone moyakanas ika kuajkuali tlamantli, xikiljui kenke kuali tlen kichijki. Ueliskia tikiljuis: “Niyolpaki ika tlen tijchijki pampa amo titlakajkayajki”. Tlaj mokone mitsiljuis kichijki se tlamantli tlen amo kuali, achtoui xijtlaskamatili pampa mitsiljuik tlen nelia panok uan teipa xijtlalnamikti.

• Xikintlalnamikti kema amo kuali monejnemiltiaj. Xijkaua mokone ma kiixnamiki kuesoli kema kichiua tlen amo kuali. Konemej moneki kimatisej tlake tlamantli amo kuali kichijkej uan kenke ipan ininchaj amo kichiuaj. Maske sekij tetajmej amo kinekij kinyolkokosej ininkoneuaj, tlaj kamanaltisej ininuaya ika tlen panok kinpaleuis ma kimachtikaj inintlalnamikilis uan kimatisej tlake kuali uan tlake amo.