Eli se kuali tlamantli tlen mitspaleuis:

• timochias uan teipa tijchiuas tlen tijneki

• amo tijchiuas tlen mitsyoltilana

• tijtlamichiuas se tlamantli maske amo mitspaktia

• timoiljuis ipan tlen sekinok kinpano

Konemej katli kuali monauatiaj amo kichiuaj se tlamantli maske tlauel kinyoltilana. Uan konemej katli amo kuali monauatiaj uelis peuas:

• mosisinisej

• mokuesosej miak tonali

• tlachichinasej, kitekiuisej drogas uan tlaisej

• kikuasej tlakualistli tlen amo kinpaleuis

Ixtlamatinij kiijtouaj konemej katli kuali monauatiaj, kuali kitekiuiaj inintomij kema ya uejueyij, kintlepanitaj tlanauatianij uan amo tlauel mokokouaj. Tlen kiijtojkej nopa ixtlamatinij kichijki nopa tlamachtijketl tlen Universidad de Pensilvania, Angela Duckworth, ma kiijto: “Amo aka tlauel kuali monauatia”.

Ximosentlali tijchiuas tlen tikijtojtok

TLEN BIBLIA TETLAJTOLMAKA: “Xikijtokaj xitlauak ‘kena, nijchiuas’ o ‘axnijchiuas’” (Mateo 5:37).

Kemantika konemej tlauel tsajtsij ininixpa sekinok maseualmej pampa kinekij inintatauaj ma kinmakakaj tlen inijuantij kinekij uan kema kiampa kichiuaj, tetajmej moneki kuali moiljuisej tlake kichiuasej. Tlaj tetajmej kichiuaj tlen ininkone kineki, kiyekos tlaj tsajtsis uelis itata kiijtos kena maske achtouia kiijtojtoya amo.

Uan tlaj tetajmej amo kichiuaj tlen ininkone kineki maske tsajtsis, kipaleuis ma kiyeko se tlamantli tlen tlauel ipati: amo nochipa mochiuas tlen ya kineki. Tepajtijketl David Walsh, kiijtok: “Maseualmej katli kiyekouaj ni tlamantli kena yolpakij maske timoiljuiskiaj amo”. Nojkia kiijtok amo tikinpaleuiaj “tokoneuaj tlaj tikiniljuiaj nochipa kipiasej tlen kinekisej”. *

 Tlaj nama tikiljuis mokone amo ma kichiua se keski tlamantli, kipaleuis teipa amo ma kitekiui drogas, amo ma moteka iuaya katli amo mosenkajtok uan amo ma kichiua sekinok tlamantli tlen amo kuali.

Xikiniljui tlen kitlapejpenisej uelis kuali kisas o amo

TLEN BIBLIA TETLAJTOLMAKA: “Tlen inkitokasej, ya nopa inkipixkasej” (Gálatas 6:7).

Mokone moneki kiyekos tlen kitlapejpenis uelis kuali kisas o amo, yeka tlaj amo kuali monauatis uelis kipanos tlen amo kuali. Ximoiljui ni: tlaj mokone nimantsi kualani kema amo kipaktia se tlamantli, kimatis ouij kinpias iuampoyouaj. Uan tlaj kuali kintlakakilia katli kamanaltij o amo nima kualani, sekinok kinekisej itstosej iuaya. Yeka, xijpaleui ma kiita teipa kuali itstos tlaj kuali monauatis.

Xikinmachti tlake tlamantli eli tlauel ipati

TLEN BIBLIA TETLAJTOLMAKA: “Xijmatikaj kejatsa inkitlapejpenisej tlen nelia kuali” (Filipenses 1:10).

Kuali timonauatisej amo san kiijtosneki amo tijchiuasej tlamantli tlen amo kuali, nojkia kiijtosneki tijchiuasej tlen kinamiki maske amo tlauel techpaktis. Mokone moneki kiyekos achtoui kichiuas tlamantli tlen tlauel ipati, uelis achtoui kichiuas tlen kinauatiaj ipan escuela uan teipa mauiltis.

Xikinmaka se kuali neskayotl

TLEN BIBLIA TETLAJTOLMAKA: “Pampa niinmechnextilijtok para inkichiuasej keja na niinmechchiuilijtok” (Juan 13:15).

Konemej kiitaj tlake kichiuaj inintatauaj kema se tlamantli amo kinpaktia. Yeka, xikinpaleui ma kiitakaj kema kuali timonauatia kuali kisa tlen tijchiua. Ximotlajtlani: “¿Tlake nijchiua kema nokone kichiua se tlamantli tlen amo nechpaktia? ¿Nimantsi nikualani o amo?”.