TLAMACHTILI TLEN IKA PEUA: ¿TECHPALEUIA KEMA TIMOMAIJTOUAJ?
¿Kenke kineki toTeotsij ma timomaijtokaj?
ToTeotsij kineki mouampojchiuas touaya
Katli nochipa monojnotsaj, kuali mouampojchiuaj. Tlaj nojkia tijnojnotsasej toTeotsij nojkia timouampojchiuasej iuaya. Yeka techiljuia: “Inmojuantij inualasej inmomaijtosej ika na, uan na niinmechtlakakilis” (Jer. 29:12). Kiampa, tijnechkauisej uan ya ‘technechkauis’ (Sant. 4:8). Yeka Biblia kiijtoua: “ToTeko itstok ininnechka nochi tlen kinotsaj” (Sal. 145:18). Tlaj nochipa timomaijtosej, tlauel kuali timouikasej iuaya.
“ToTeko itstok ininnechka nochi tlen kinotsaj” (Sal. 145:18).
ToTeotsij kineki techpaleuis
Jesús kiijtok: “Intla inmokone inmechtlajtlanis se pantsi [...], axinkimakasej se tetl. Uan intla inmokone inmechtlajtlanis se michij [...], axinkimakaskiaj se kouatl, pampa yonke intlajtlakolchiuanij inkimatij inkinmakasej inmokoneuaj tlen kuali. Uajka achi más toTeko [...] kimati kinmakas tlen kuali tlen kitlajtlanisej” (Mat. 7:9-11). ToTeotsij kineki ma timomaijtokaj pampa kitekipachoua tlen techpano uan kineki techpaleuis (1 Ped. 5:7). Kiijtoua ma tijnojnotsakaj kema tijpiasej kuesoli. Biblia kiijtoua: “Ayok ximotekipachokaj ika niyon se tlamantli. Más kuali ximomaijtokaj [...]. Xijtlajtlanikaj ma inmechmaka nochi tlen moneki uan xijtlaskamatikaj” (Filip. 4:6).
Moneki ma techpaleui toTeotsij
Ixtlamatinij kiitstokej miakej kiyolmatij moneki momaijtosej. Katli kiijtouaj amo itstok toTeotsij uan katli kiijtouaj amo kema uelis kiixmatisej pampa amo kimatij tlaj nelia itstok, nojkia momaijtouaj. * Ni kinextia toTeotsij kichijki ma tijnekikaj tijnechkauisej. Uan Jesús kiijtok: “Pakij katli kimatij moneki momachtisej toTeotsij iTlajtol” (Mat. 5:3, TNM). Ni uelis tijchiuasej tlaj nochipa timomaijtosej.
¿Kenijkatsa uelis techpaleuis tlaj nochipa tijnojnotsasej toTeotsij?
^ párr. 8 Katli tekitij ipan Centro de Investigación Pew, ipan xiuitl 2012 kiijtojkej se 11% katli euaj Estados Unidos uan kiijtouaj amo itstok toTeotsij uan katli kiijtouaj amo kema uelis kiixmatisej pampa amo kimatij tlaj nelia itstok, momaijtouaj sempatsi ipan se mestli.
