Matikōsets ga dītsâ ǂkhîsa ǃgameb tsî omarisa ūhâ sa, xawe i ge ǃnawe tama hâ xūna ra ī, sa ǂkhîba ūhâ sa ra ǃgomǃgom na. (Aoǁnâ-aob 9:11) Elob ge ǀnamxaǃnâse ra huida ǃgomsina da ga ūhâ o. Xoas ǃnâ mâ tsoatsoadets ga sao o, os ge sats tsî sa omaris tsîna mâ ǃgomsi i ǀgui i ga hā xawe nî tani ǁkhā.

ELOBMÎS TA MÎS: “Sadu ǂhansendi hoade ǁîba ǁgui-ai, ǁîb sado ra ǂhansenba xuige.” (1 Petrub 5:7) Hoaǁae ǂâis ǃnâ ūhâ re Elob ge sada ǃgoma ǃaroma tama hâ. (Jakobub 1:13) ǁÎb ǃoats ta ǀgū khamib ge ǃgâi ǀgaub hoab ai nî huitsi. (Jesajab 41:10) “ǁHōǂui re sadu di ǂgaoba ais âb aiǃâ.”—Psalmdi 62:8.

Sats ge ǁkhaeǂgaosa nî hō tsēs hoasats ga Elobmîsa khomai o. Nē ǀgaub aits ge nî hōǃâ matib Jehovaba “mâ ǁgâiǀāb hoab ǃnâ hâna ǁkhaeǂgao ǁkhāse”. (2 Korinteǁîn 1:3, 4; Romeǁîn 15:4) ǁÎb ge ra mîmâi “Elob di ǂkhîb ǁnâuǃāb hoaba ǃnā hâba” nî mā tsi di.—Filipeǁîn 4:6, 7, 13.

SATS A DĪ ǁKHĀ I:

• Jehovab ǃoa ǀgore re i ǃnomsa se hâ tsî ǃgāsase ǂâi

• Kēǃgâ re taen hoanats a dīǁkhāsa tsî ǁhûi re hoan xa a ǃgâi-e

ELOBMÎS TA MÎS: “ǂGaob ǁnâuǃāxab dib ra ǂansa hō, tsî gā-ain di ǂgaes ra ǂansa ôa.” (ǂKhoamîdi 18:15) Hoa amaba hō re. Hōǂui re mâ omaris khoe-i hoa-i tae-e ǂhâ hâ sa. ǁÎn ǀkha ǃhoa re. ǁÎna ǃgâ re.—ǂKhoamîdi 20:5.

Sa ǀnamsa i ga ǁō o? Tā ǃao sa tsâsiba ǁgâiǂuisa. ǂÂis ǃnâ ūhâ re “Jesuba tsîn ge ge ā.” (Johaneb 11:35; Aoǁnâ-aob 3:4) Kai sâba hōs tsî ǁoms tsîn ge kaise a ǂhâǂhâsa. (Aoǁnâ-aob 4:6) Nēs ge nî supusupu nē tsûtsûsa māsib ǃnâ ǃkharu sa.

SATS A DĪ ǁKHĀ I:

• Tsūkēǃgâb nî hās aiǃâ ǁnaeti kaisen re sa omaris khoen ǀkha ǁgamǁaesa. On ge xū-i ga ī o harase sats ǀkha nî ǃhoa ǁkhā

• Nau khoen ǀkha ǃhoa re hîna ge ǁîn tsîna nēti i ǂopa-i ǃnâ hâ-i na

ELOBMÎS TA MÎS: ‘Khoexa khoeb ge mâ ǁaeb hoab ai ǀnam hâ tsî a ǃgâsa ǂōǂōsib ǃnâ.’ (ǂKhoamîdi 17:17) Sa ǀhōn ge tsâbe ra huitsi ǂgao, xawen ge a ǀū tae-en nî dīsa. Tā ǁkhaesen mîba nî sa tae huibats amabes ǃnâ ǂhâba hâsa. (ǂKhoamîdi 12:25) Gāgāsi huib tsîna ôa re Elobmîsa ǃgâise ǁnâuǃā hâ khoena xu. ǁÎn Elobmîsa xu mātsi ǁkhā huib ge kaise nî huitsi.—Jakobub 5:14.

Sats ge amabes ǃnâ ǂhâts hâ ǂkhâǃnâsa a hōǁkhā hoaǁaets ga Elob ǃnâ ǂgom tsî ǁîb di mîmâidi ǃnâ ra ǂgomǃgâ khoen ǀkha ǀhōgu o. Kai ǁkhaeǂgaosats ge a hōǁkhā nau hâ khoenats ga hui tsî ǂhâban hâ ǂkhâǃnâsa mā o. ǀGoragu re sa ǂgoms Jehovab ǃnâ hâsa tsî ǁîb di mîmâide ǁîn ǀkha. ǂHâb ǃnâ hâ khoena huis ǀkha ǀhapeǀhapesen re tsî tā ǀguriǀgurisen re ǁnān satsa a ǀnam tsî satsa ra tsâba na xu, tā ǁîna xu hâbē re.—ǂKhoamîdi 18:1; 1 Korinteǁîn 15:58.

SATS A DĪ ǁKHĀ I:

• Sa ǀgū ǀhōsa i ǀkha ǃhoa re i ǁî-i xa hui-e

• ǂHauǃnâ tsî ǃoa ǃhoa re sa ǂhâb xa