9ǁÎ ǃÂB
Jehovaba ǀgoreǀî re sa omaris ǀkha
“ǀGoreǀî ǁnāb ǀhommi tsî ǃhūbaib tsîna ge dība.”—ǂHaiǂhais 14:7
Nē ǂkhanib ǃnâts go ǁkhāǁkhāsen khamis ge Elobmîsa ǂgui tsoatsoade ǃkhōǂgā hâ sats tsî sa omaris tsîna a hui ǁkhāde. Jehovab ge ra ǂhâba its ǂkhîba ūhâ. ǁÎb ge ra mîmâi ǁîb di ǀgoreǀîsats ga ǂgurose mâi o, “o du ge nēn hoana nî ǁguiribahe.” (Mateub 6:33) ǁÎb ge amabes ǃnâ ra ǂhâba its ǁîb di ǀhō kai. Sîsenū re mâ ǃēs hoasa Elob ǀkha ǀhōgu sa. Nēb ge kai aiǂhanuba khoe-i a ūhâ ǁkhāba.—Mateub 22:37, 38.
1 ǀGAIǀGAI RE SA ǃGAEǁAESA JEHOVAB ǀKHA
ELOBMÎS TA MÎS: “‘O ta ge nî tita sadu Î, o du ge nî sado ti ôa,’ tib ta ǃKhūba mî.” (2 Korinteǁîn 6:18) Elob ge ra ǂhâba its ǁîb di ǀgū ǀhōsa kai. ǀGores ge ǀgui ǀgau ǁnāsa dīsa. Jehovab ge ra ǁkhau tsi “ǀûs ose ǀgore” sa. (1 Tesalonikaǁîn 5:17) ǁÎb ge a turaxa sa ǃgam ǂâidi tsî ǂhansendi tsîna ǃgâ sa. (Filipeǁîn 4:6) Sa omaris ǀkhats ga ǀgore o, on ge nî mû matikōseb Eloba satsa a amaba ǃkhaisa.
Elob ǀkhats ta ǃhoa ǁkhās khami i ge a ǂhâbasa ǁîbats nî ǃgâ ǃkhaisa. Sats ge nēsa a dī ǁkhā Elobmîs tsî ǁîs ai ǃgaoǃgaosa ǂkhaninats ga ǁkhāǁkhāsen o. (Psalmdi 1:1, 2) ǂÂiǃgâ re ǁkhāǁkhāsents ta xūna. (Psalmdi 77:11, 12) Eloba ǃgâs ge ra ǂgaoǀkhā its hoaǁae Xristeǁî ǀhaodi tawa hâ.—Psalmdi 122:1-4.
Nau hâ khoen ǀkha Jehovab xa ǃhoas ge a ǂhâǂhâsa, sa ǃgaeǁaesa ǁîb ǀkha ǀgaiǀgais ǃaroma. Nēsats ga hoaǁae dī o, ots ge nî hōǃâ ǁÎb tawats ta ǀgūsa.—Mateub 28:19, 20.
SATS A DĪ ǁKHĀ I:
-
ǁAeba ǁamaǂui re tsēs hoasa Elobmîsa khomais tsî ǀgores ǃaroma
-
Omarise gāgāsi xūna ǂgurose mâi re, ǁkhoaxasib tsî sâsasib ǂamai
2 ǃGÂIAǂGAO RE SA OMARIS ǃOABAS ǃNÂ
ELOBMÎS TA MÎS: “Eloba ǀgū, ob ge sado nî ǀgū.” (Jakobub 4:8) Sats ge ǀapeǁguiba ǂhâba hâ hoaǁaets nî saoba, sa omaris ǃoabas ǃaroma. (Genesis 18:19) Xawe ǃnāsan ge ǂhâbasa. Elob ge ǃâ-e nî ūhâ, sa tsēkorobe ûib ǃnâ. ǀGaiǀgai re sa omaris di ǃgaeǁaesa Elob ǀkha, ǁîb xa ǃhoa re “omi ǃnâts ga ǂnû o tsî daob aits ga ǃgû o, ǁgoe tsîts ga khâi o.” (Deuteronomium 6:6, 7) ǁGūbasen re Joshuab khami īsa, mî ge ba: “Xawe tita tsî ti ommi dida xasa, sida ge ǃKhūba nî ǃoaba.”—Josuab 24:15.
SATS A DĪ ǁKHĀ I:
-
ǁAposa ǁkhāǁkhāsens ǀapeǁguiba ūhâ re sa omaris ǃnâ hâ khoe-i hoa-i di ǂhâbats nî kēǃgâse