“ကောင်းသော ရှမာရိလူ” ဆိုတဲ့ စကားလုံးက လိုအပ်နေသူကို ကူညီဖို့ တစ်ခုခု လုပ်ပေးတဲ့သူတွေကို ရည်ညွှန်းရာမှာ သုံးလေ့ရှိတယ်။ အိမ်နီးချင်းကောင်း ပီသသူ၊ လူလူချင်း ချစ်တဲ့ မေတ္တာပြသူဟာ လူမျိုး၊ နောက်ခံ မခွဲခြားဘဲ ကရုဏာထား ကူညီပေးတယ်ဆိုတာ သိစေဖို့ ယေရှု ပြောခဲ့တဲ့ ပုံဥပမာကနေ ဒီစကားလုံး ပေါ်လာတာ ဖြစ်တယ်။ a

ဒီဆောင်းပါးမှာ

•  “ကောင်းသော ရှမာရိလူ” ပုံဥပမာက ဘာလဲ

•  ဒီပုံဥပမာကို ယေရှု ဘာကြောင့် ပြောခဲ့သလဲ

•  ဒီပုံဥပမာရဲ့ သင်ခန်းစာက ဘာလဲ

•  ရှမာရိလူတွေဟာ ဘယ်သူတွေလဲ

•  “ကောင်းသော ရှမာရိလူ” ဇာတ်လမ်းက တကယ့် ဖြစ်ရပ်လား

ယေရှု ပြောတဲ့ ဇာတ်လမ်းအကျဉ်းချုပ်က ဒီလိုပါ။ ဂျူးတစ်ယောက် ဂျေရုဆလင်ကနေ ယေရိခေါကို ခရီးသွားချိန် လမ်းမှာ ဓားပြတိုက်ခံရတယ်။ အရိုက်ခံရပြီး သေလုမြောပါး ဖြစ်တော့မှ ပစ်ထားခဲ့ကြတယ်။

ဂျူးပုရောဟိတ် တစ်ယောက်၊ အဲဒီနောက် ဂျူးဘာသာရေး ခေါင်းဆောင် တစ်ယောက် ဒဏ်ရာရထားသူရဲ့ ဘေးကနေ ဒီအတိုင်း ဖြတ်သွားတယ်။ လူမျိုး တူပေမဲ့ မကူညီပေးကြဘူး။

နောက်ဆုံး၊ လူမျိုး မတူသူ တစ်ယောက် ဖြတ်လာတယ်။ သူဟာ ရှမာရိလူပါ။ (လုကာ ၁၀:၃၃။ ၁၇:၁၆-၁၈) ဒဏ်ရာရနေသူကို သနားလွန်းလို့ ဒဏ်ရာတွေကို ပြုစုပေးတယ်။ ပြီးတော့ ဧည့်ရိပ်သာ ခေါ်သွားပြီး တစ်ညလုံး ပြုစုပေးတယ်။ နောက်တစ်နေ့မှာ ဧည့်ရိပ်သာ ပိုင်ရှင်ကို ငွေထုတ်ပေးပြီး အဲဒီလူကို ပြုစုထားပေးပါ၊ နောက်ထပ် ကုန်ကျသမျှကိုလည်း ပေးမယ်လို့ ပြောတယ်။—လုကာ ၁၀:၃၀-၃၅။

လူမျိုးတူ ဘာသာတူသူတွေကိုပဲ မေတ္တာပြရမယ်လို့ ယူဆသူကို အရေးကြီး သင်ခန်းစာ သင်ပေးချင်လို့ ဒီပုံဥပမာကို ယေရှု ပြောပြနေခြင်း ဖြစ်တယ်။ လူမျိုးတူ ဂျူးတွေကိုပဲ မေတ္တာပြရမှာ မဟုတ်မှန်း သူ့ကို သိစေချင်တယ်။ (လုကာ ၁၀:၃၆၊ ၃၇) ဘုရားရဲ့ နှစ်သက်မှု ရချင်တဲ့သူတိုင်း အကျိုးရနိုင်ဖို့ ဒီမှတ်တမ်းကို ကျမ်းစာမှာ ဖော်ပြထားတယ်။—၂ တိမောသေ ၃:၁၆၊ ၁၇။

ဒီပုံဥပမာက လူလူချင်း ချစ်တဲ့သူဟာ သနားစိတ်ကို လက်တွေ့လုပ်ရပ်နဲ့ ပြတယ်ဆိုတာ သင်ပေးတယ်။ နောက်ခံ၊ လူမျိုး၊ နိုင်ငံသား မတူရင်တောင် ဒုက္ခရောက်နေသူကို လိုအပ်သလို ကူညီတယ်။ လူလူချင်း ချစ်တဲ့ မေတ္တာပြသူဟာ ကိုယ့်ကို ပြုမူဆက်ဆံစေချင်တဲ့အတိုင်း သူတစ်ပါးကို ပြုမူဆက်ဆံတယ်။—မဿဲ ၇:၁၂။

ရှမာရိလူတွေဟာ ယုဒမြောက်ပိုင်းဒေသမှာ နေထိုင်တယ်။ ဂျူးနဲ့ ဂျူးမဟုတ်သူ အိမ်ထောင်ကျပြီး မွေးလာတဲ့ မျိုးဆက်တွေ ပါဝင်တယ်။

ပထမရာစုရောက်တော့ ရှမာရိလူတွေဟာ ကိုယ်ပိုင်ဝတ်ပြုရေး တည်ထောင်ကြတယ်။ ဟီဘရူး ကျမ်းစောင်တွေထဲက ပထမကျမ်းစောင် ငါးစောင်ကိုပဲ လက်ခံပြီး ကျန်တာကို လက်မခံဘူး။

ယေရှုခေတ်က ဂျူးများစွာဟာ ရှမာရိတွေကို အထင်သေးတယ်၊ အဆက်အဆံ မလုပ်ကြဘူး။ (ယောဟန် ၄:၉) တချို့က နှိမ်တဲ့အနေနဲ့ “ရှမာရိလူ” ဆိုတဲ့ အသုံးအနှုန်းကို သုံးကြတယ်။—ယောဟန် ၈:၄၈။

တကယ့် ဖြစ်ရပ်မှန် ဟုတ်မဟုတ် ကျမ်းစာမှာ မဖော်ပြထားဘူး။ ဒါပေမဲ့ ယေရှုက သွန်သင်ချက်တွေမှာ လူသိများတဲ့ ထုံးစံနဲ့ ဒေသတွေကို ထည့်ပြောလေ့ရှိတယ်။ ဒါကြောင့် နားထောင်သူတွေက ဆိုလိုရင်းကို တန်းသဘောပေါက်နိုင်ကြတယ်။

ပုံဥပမာမှာ ပါတဲ့ အသေးစိတ်အချက်တွေဟာ သမိုင်းအရလည်း တိကျမှန်ကန်တယ်။

• ဂျေရုဆလင်ကနေ ယေရိခေါကို သွားတဲ့ လမ်းဟာ ၂၀ ကီလိုမီတာ (၁၂ မိုင်) ကျော် ရှည်ပြီး ၁ ကီလိုမီတာ (၀.၆ မိုင်) လောက် နိမ့်ဆင်းသွားတယ်။ ခရီးသွားတွေ “ယေရိခေါမြို့ကို ဆင်းသွားတဲ့အခါ” ဆိုပြီး မှတ်တမ်းက တိကျမှန်ကန်စွာ ဖော်ပြတယ်။—လုကာ ၁၀:၃၀။

• ယေရိခေါမှာ နေတဲ့ ပုရောဟိတ်နဲ့ လေဝိလူတွေဟာ ဒီလမ်းကနေ ဂျေရုဆလင်ကို ပုံမှန် သွားလာလေ့ရှိတယ်။

• ဓားပြတွေဟာ လူသွားလူလာနည်းတဲ့ ဒီလမ်းတစ်လျှောက်၊ အထူးသဖြင့် တစ်ယောက်တည်း ခရီးသွားသူကို လုယက်ဖို့ ပုန်းနေလေ့ရှိတယ်။