ကလေးတွေဟာ ဘုရားရှိပြီး သူတို့ကိုချစ်တယ်ဆိုတဲ့ အထောက်အထားတွေကို သိမှသာ ဘုရားကိုချစ်လာကြမှာ ဖြစ်တယ်။ ဘုရားကို ကလေးတွေ ချစ်လာဖို့ဆိုရင် ကိုယ်တော့်အကြောင်း သိဖို့လိုတယ်။ (၁ ယောဟန် ၄:၈) ဥပမာ၊ လူတွေကို ဖန်ဆင်းရတဲ့ ဘုရားရဲ့ ရည်ရွယ်ချက်က ဘာလဲ။ ဆင်းရဲဒုက္ခတွေကို ဘုရား ဘာကြောင့် ခွင့်ပြုထားတာလဲ။ လူသားတွေအတွက် အနာဂတ်မှာ ဘုရား ဘာလုပ်ဆောင်ပေးမလဲ စတဲ့မေးခွန်းတွေကို ကလေးတွေ သိဖို့လိုတယ်။—ဖိလိပ္ပိ ၁:၉ ကိုဖတ်ပါ။

ကလေးတွေ ဘုရားကိုချစ်တတ်လာဖို့ မိဘတွေကိုယ်တိုင် ဘုရားကိုချစ်ကြောင်း ပြရမယ်။ ဒါကို သူတို့ သိမြင်လာတဲ့အခါ မိဘတွေရဲ့ စံနမူနာကို လိုက်လျှောက်ချင်လာမှာဖြစ်တယ်။—တရားဟောရာ ၆:၅–၇; သုတ္တံ ၂၂:၆ တို့ကို ဖတ်ပါ။

ဘုရားရဲ့စကားတော်ဖြစ်တဲ့ ကျမ်းစာဟာ တန်ခိုးရှိပါတယ်။ (ဟေဗြဲ ၄:၁၂) ဒါကြောင့် ကလေးတွေကို ကျမ်းစာအခြေခံသွန်သင်ချက်တွေ သင်ပေးပါ။ ယေရှုက လူတွေရဲ့နှလုံးကို ထိမိစေဖို့ မေးခွန်းတွေ မေးတယ်၊ နားထောင်ပေးတယ်၊ ဒါ့အပြင် ကျမ်းချက်တွေရဲ့ သက်ဆိုင်ပုံကိုလည်း ရှင်းပြပေးတယ်။ ကလေးတွေရဲ့ နှလုံး ထိမိဖို့ သင်ပေးတဲ့အခါ ယေရှုရဲ့ သွန်သင်နည်းတွေကို တုပနိုင်ပါတယ်။—လုကာ ၂၄:၁၅–၁၉၊ ၂၇၊ ၃၂ ကိုဖတ်ပါ။

ဒါ့အပြင် ဘုရားက လူတွေနဲ့ ဘယ်လိုပြောဆိုဆက်ဆံသလဲဆိုတဲ့ ကျမ်းစာဇာတ်လမ်းတွေကို ပြောပြမယ်ဆိုရင် ကလေးတွေ ဘုရားအကြောင်း သိလာပြီး ချစ်လာကြမှာဖြစ်တယ်။ အဲဒီရည်ရွယ်ချက်နဲ့ ထုတ်ဝေထားတဲ့ ကျမ်းစာအခြေပြုစာပေတွေကို www.pr418.com/mya ကနေ ကူးယူရရှိနိုင်ပါတယ်။—၂ တိမောသေ ၃:၁၆ ကိုဖတ်ပါ။