“စပါး​ရိတ်​စ​ရာ အများကြီး​ရှိတယ်။ လုပ်သားတွေ​က​တော့ နည်း​နေတယ်။ ဒါကြောင့် လုပ်သားတွေ စေလွှတ်​ပေးဖို့ စပါးရှင်​ဆီ ဆုတောင်းကြပါ။” (လု. ၁၀:၂) လွန်ခဲ့တဲ့ နှစ်ပေါင်း ၂,၀၀၀ လောက်က ယေရှု​ပြောခဲ့တဲ့ ဒီ​စကားတွေဟာ မြန်မာ​ပြည်​ရဲ့ အခြေအနေကို ကောင်းစွာ​ဖော်ပြတယ်။ လူဦးရေ ၅၅ သန်း​ရှိတဲ့ မြန်မာ​ပြည်မှာ သတင်းကောင်း ဟောပြောသူ ၄,၂၀၀ ပဲ​ရှိတယ်။

ဒါပေမဲ့ “စပါးရှင်” ယေဟောဝါရဲ့ လှုံ့ဆော်မှု​ကြောင့် တိုင်းတစ်ပါး ညီအစ်ကို/မ​တွေဟာ အရှေ့တောင်​အာရှ​ထဲ​က ဒီ​နိုင်ငံရဲ့ ရိတ်သိမ်းခြင်း​မှာ လာ​ကူညီပေး​နေကြတယ်။ ကိုယ့်​နေရင်း​ဒေသ​ကို သူတို့ ဘာကြောင့် ထားရစ်​ခဲ့ကြသလဲ။ မြန်မာ​ပြည်​ကို ပြောင်းရွှေ့​ဖို့ ဘာက လှုံ့ဆော်​ပေးခဲ့သလဲ။ ဘာ​ကောင်းချီးတွေ ခံစား​နေရသလဲ။ ကြည့်ကြစို့။

လွန်ခဲ့တဲ့ နှစ်​အနည်းငယ်​က ဂျပန်​နိုင်ငံက ရှေ့ဆောင် ကာဇူဟီရို​ဟာ အတက်​ရောဂါ​ကြောင့် သတိလစ်​ပြီး ဆေးရုံ​ရောက်​သွားတယ်။ နှစ်နှစ် ကား​မမောင်း​ဖို့ ဆရာဝန်​ပြောတယ်။ ‘ရှေ့ဆောင် ဘယ်လို ဆက်လုပ်​ရမလဲ’ လို့ သူ​တွေးမိတယ်။ ရှေ့ဆောင် ဆက်လုပ်​နိုင်အောင် လမ်းဖွင့်​ပေးပါလို့ ယေဟောဝါ​ဆီ ထက်ထက်သန်သန် ဆုတောင်းခဲ့တယ်။

ကာ​ဇူ​ဟီ​ရို ပြောပြတယ်– “တစ်လ​ကြာပြီးနောက် မြန်မာ​ပြည်မှာ အမှုဆောင်​နေတဲ့ သူငယ်ချင်း​က ကျွန်တော့်​အကြောင်း ကြား​ပြီး ဆက်သွယ်​လာတယ်။ ‘မြန်မာ​ပြည်မှာ ဘတ်စကား​ကိုပဲ အဓိကသုံးလို့ ကိုယ်ပိုင်​ကား မလို​ဘဲ အမှုဆောင်​နိုင်တယ်’ တဲ့။ ဒါနဲ့ မြန်မာ​ပြည် သွား​လို့​ရ​မ​ရ ဆရာဝန်​ကို မေးကြည့်​တော့ ‘မြန်မာ​ပြည်​က ဦးနှောက်​အထူးကု ဆရာဝန်​တစ်ယောက် အခု ဂျပန်ကို ရောက်နေတယ်။ မိတ်ဆက်​ပေးမယ်။ ဟို​မှာ ရောဂါ​ပြန်ဖြစ်​ရင် သူ​ကုပေး​နိုင်တယ်’ လို့ ပြောတဲ့​အတွက် အံ့သြ​သွားတယ်။ ဒါ​ ယေဟောဝါ​ဆီက အဖြေ​ပဲ​လို့ ယူမှတ်​လိုက်တယ်။”

ဒါနဲ့ ရှေ့ဆောင်​အဖြစ် လာ​အမှုဆောင်​ချင်​ကြောင်း မြန်မာ​နိုင်ငံ ဌာနခွဲ​ဆီ ချက်ချင်း အီးမေးလ် ပို့​လိုက်တယ်။ ငါး​ရက်​ကြာပြီးနောက် “လာ​ပါ၊ ရှေ့ဆောင်​တွေ လို​နေတယ်” လို့ ပြန်စာ ရတယ်။ ကာ​ဇူ​ဟီ​ရို​နဲ့ ဇနီး မာရိလည်း ကား​တွေ ရော​င်း၊ ဗီဇာ​ယူပြီး လေယာဉ်​လက်မှတ် ဝယ်​လိုက်တယ်။ အခု မန္တလေး လက်သင်္ကေတပြ အုပ်စု​မှာ ပျော်ရွှင်စွာ အမှုဆောင်​နေပြီ။ “‘မင်းတို့​ရဲ့​လမ်းစဉ်​ကို ယေဟောဝါ​ဆီ ပုံအပ်​လိုက်ပါ။ ဘုရားကို အားကိုး​ပါ။ မင်း​တို့ရဲ့​အကျိုး​အတွက် လုပ်ဆောင်ပေး​လိမ့်မယ်’ ဆိုတဲ့ ဆာလံ ၃၇:၅ ပါ ဘုရား​ကတိ​ကို ပို​ယုံကြည်​လာတယ်” လို့ ကာဇူဟီရို ပြောတယ်။

၂၀၁၄ ခုနှစ်​တုန်း​က မြန်မာ​နိုင်ငံမှာ ယေဟောဝါသက်သေတွေ အထူး​အစည်းအဝေး ကျင်းပခွင့်​ရခဲ့တယ်။ တိုင်းတစ်ပါး​က ကိုယ်စားလှယ် အတော်များများ လာကြတယ်။ တစ်ယောက်က​တော့ အမေရိကန်​နိုင်ငံက အသက် ၃၄ နှစ်အရွယ် မို​နစ် ဖြစ်တယ်။ “အစည်းအဝေးကြီး​က​နေ ပြန်လာပြီး​နောက် ဘာဆက်​လုပ်ရမလဲ​ဆိုတာ ယေဟောဝါ​ဆီ ဆု​တောင်းတယ်။ မိဘတွေ​နဲ့လည်း တိုင်ပင်​တ​ယ်။ မြန်မာ​ပြည်​ကို ပြန်သွားဖို့ အားလုံး သဘောတူ​ပေ​မဲ့ ပန်းတိုင် ရောက်​ဖို့ တော်​တော်​ဆုတောင်းပြီး အချိန်​ယူ​ခဲ့​ရတယ်” လို့ သူပြောတယ်။ ဘာကြောင့်လဲ။

“‘ကုန်ကျစရိတ်​ကို တွက်ချက်’ ဖို့ နောက်လိုက်တွေ​ကို ယေရှု အားပေးခဲ့တယ်။ ဒါကြောင့် ‘ငါ​ပြောင်းရွှေ့​နိုင်မလား။ လောက​အလုပ် သိပ်​မလုပ်ဘဲ ကိုယ့်ကိုယ်ကိုယ် ထောက်ပံ့​နိုင်မလား’ လို့ မေးခဲ့တယ်။ ပြောင်းရွှေ့​ဖို့ ငွေ​အလုံအလောက် မရှိမှန်း သိလိုက်​ရတယ်။” ဒါဆို ဘယ်လိုလုပ် ပြောင်းရွှေ့​နိုင်​ခဲ့သလဲ။—လု. ၁၄:၂၈။

“တစ်နေ့၊ အလုပ်ရှင် ခေါ်တွေ့​တော့ အလုပ်​ဖြုတ်​ခံရ​မလားလို့ စိုးရိမ်​သွားတယ်။ ဒါပေမဲ့ အလုပ်​ကြိုး​စားလို့ ကျေးဇူးတင်ကြောင်း​ပြောဖို့ ခေါ်​တာ။ ဆု​ကြေး​ငွေ​လ​ည်း ပေးမယ်​တဲ့။ အဲဒါ ကျွန်မ​လို​နေတဲ့​ငွေ အတိအကျ​ပဲ” လို့ မို​နစ် ပြောတယ်။

မို​နစ်​ဟာ ၂၀၁၄၊ ဒီဇင်ဘာ​လ​ကတည်းက မြန်မာ​ပြည်မှာ အမှုဆောင်​နေတယ်။ ပိုလိုအပ်တဲ့ နေရာမှာ အမှုဆောင်​နေတာ​နဲ့ပတ်သက်ပြီး ဘယ်လို ခံစားရသလဲ။ “ဒီမှာ အမှုဆောင်​ရတာ သိပ်ပျော်​တ​ယ်။ ကျမ်းစာသင်အံမှု သုံးခု​ရှိတယ်။ တစ်ယောက်က အသက် ၆၇ နှစ်။ သူက အမြဲ​ပြုံးပြုံးလေး​နဲ့ ဖက်လဲတကင်း နှုတ်ဆက်​တ​ယ်။ ဘုရားနာမည် ယေဟောဝါ​ဖြစ်မှန်း​သိတော့ မျက်ရည်ကျ​ပြီး ‘ဘုရားနာမည် ယေဟောဝါ​ဖြစ်မှန်း ဦးဆုံးအကြိမ် သိရတာ။ အန်​တီ့​ထက် အသက်​တစ်ဝက်​လောက် ငယ်​ပေ​မဲ့ အရေးကြီးဆုံး​အရာကို သင်ပေး​လိုက်တာပဲ’ လို့ ပြောတယ်။ ကျွန်မ​လ​ည်း မျက်ရည်ကျ​တော့​တာ​ပေါ့။ ပိုလိုအပ်တဲ့ ဒေသမှာ အမှုဆောင်​ရတာဟာ ကျေနပ်စရာ အကောင်းဆုံး​ဖြစ်မှန်း ဒီ​အတွေ့အကြုံ​တွေ​က​နေ သိလာတယ်။” မကြာသေးခင်က မို​နစ်​ဟာ သတင်းကောင်း ဟောပြောသူများ​အတွက် သင်တန်း တက်ခွင့်​ရခဲ့တယ်။

၂၀၁၃ နှစ်ချုပ်​စာအုပ် ကြောင့် မြန်မာ​ပြည်​ကို ရောက်လာတဲ့​သူတချို့​လ​ည်း ရှိတယ်။ အရှေ့တောင်​အာရှ မှာ​နေတဲ့ အသက် ၃၀ ဝန်းကျင် ညီအစ်မ​လီ​ဟာ အချိန်ပြည့်​အလုပ် လုပ်တယ်။ နှစ်ချုပ်​စာအုပ် မှာပါတဲ့ မှတ်တမ်းတွေက မြန်မာ​ပြည်​ကို လာဖို့ လှုံ့ဆော်​ပေးခဲ့တယ်။ “၂၀၁၄ ရန်ကုန် အထူး​အစည်းအဝေး​မှာ မြန်မာ​ပြည်​ရဲ့ တရုတ်​လယ်ကွင်း​မှာ အမှုဆောင်​နေတဲ့ မောင်နှံ​တစ်စုံ​နဲ့ တွေ့တယ်။ ကျွန်မ​လ​ည်း တရုတ်​စကား​တတ်​တော့ ဒီတရုတ်​အုပ်စု​ကို ပြောင်း​ဖို့ ဆုံးဖြတ်​ခဲ့​တ​ယ်။ မို​နစ်​နဲ့ အဖော်​ရသွား​ပြီး မန္တလေး​ကို ပြောင်း​လာတယ်။ ယေဟောဝါရဲ့ အကူအညီ​နဲ့ တစ်ကျောင်း​တည်း​မှာ အချိန်ပိုင်း ဆရာမ​အလုပ် ရပြီး အဲဒီ​နား​မှာ တိုက်ခန်း​တစ်ခု ရှာ​တွေ့ခဲ့တယ်။ ရာသီဥတု​ပူ​ပြီး အဆင်မပြေ​တာ​လေး​တွေ ရှိပေမဲ့ သိပ်ပျော်​တ​ယ်။ မြန်မာ​လူမျိုး​တွေ​က ရိုးရိုးရှင်းရှင်း နေကြတယ်။ ယဉ်ကျေး​ပြီး သတင်းကောင်းကို နားထောင်ချင်​ကြတယ်။ ဒီ​လုပ်ငန်းကို ယေဟောဝါ ဘယ်လို အရှိန်မြှင့်​နေမှန်း တွေ့ရတာ စိတ်လှုပ်ရှားစရာ​ပါ​ပဲ။ မန္တလေး​မှာ အမှုဆောင်ဖို့ ယေဟောဝါ အလိုရှိတာ သေချာ​တ​ယ်။”

ပိုလိုအပ်တဲ့ ဒေသမှာ အမှုဆောင်တဲ့​သူ အတော်များများဟာ ဆုတောင်းခြင်း​ရဲ့ အစွမ်း​ကို ကိုယ်တွေ့ ကြုံခဲ့​ကြတယ်။ အသက် ၃၅ နှစ်​ဝန်းကျင် ဂျွန်​ပေ​နဲ့ ဇနီး နာ​အို​တို့ဟာ ဂျပန်​နိုင်ငံ လက်သင်္ကေတပြ အသင်းတော်မှာ အမှုဆောင်ခဲ့ကြတယ်။ ဘာကြောင့် မြန်မာ​ပြည်​ကို ပြောင်းရွှေ့​လာတာ​လဲ။ “ကျွန်တော်တို့ရဲ့ ပန်းတိုင်​က ပိုလိုအပ်တဲ့ တိုင်းတစ်ပါးမှာ အမှုဆောင်ဖို့​ ပဲ။ ကျွန်တော်တို့ရဲ့ အသင်းတော်​က ညီအစ်ကို​တစ်ယောက် မြန်မာ​ပြည်​ကို ပြောင်း​သွားတယ်။ ကျွန်တော်တို့လည်း စုထား​တဲ့ ငွေ​နည်းနည်း​ပဲ ရှိပေမဲ့ ၂၀၁၀၊ မေ​လ​မှာ မြန်မာ​ပြည်​ကို ပြောင်းလာ​ခဲ့ကြတယ်။ ညီအစ်ကို/မတွေ လှိုက်​လှိုက်လှဲ​လှဲ ကြိုဆိုကြတယ်” လို့ ပြောတယ်။ မြန်မာ​ပြည် လက်သင်္ကေတပြ လယ်ကွင်း​က​ကော။ “စိတ်ဝင်စား​တဲ့​သူ များတယ်။ နားမကြား အိမ်ရှင်​တွေ​ကို လက်သင်္ကေတပြ ဗီဒီယို​တွေ ဖွင့်ပြတဲ့​အခါ တအား​အံ့ဩ​ကြတယ်။ ဒီ​ကိုလာ​ပြီး အမှုဆောင်ဖို့ ဆုံးဖြတ်​ခဲ့​တာ သိပ်​ဝမ်းသာတယ်။”

သူတို့ရဲ့ ငွေကြေး အခြေအနေ​ကော။ “သုံးနှစ်​ကြာပြီးနောက် စုထား​တဲ့​ငွေ ကုန်​သွား​လို့ နောက်​နှစ်​အတွက် အိမ်ငှားခ မရှိတော့ဘူး။ ဒါနဲ့ အကြီးအကျယ် ဆုတောင်းခဲ့တယ်။ အဲဒီအချိန်မှာ​ပဲ ဌာနခွဲရုံး​က​နေ ယာယီ​အထူး​ရှေ့ဆောင်​အဖြစ် ဖိတ်ခေါ်​တဲ့​စာ​ကို မမျှော်လင့်​ဘဲ ရ​လိုက်တယ်။ ယေဟောဝါဟာ မိမိကို ယုံကြည်​ကိုးစား​တဲ့​သူ​ကို ပစ်မထား​မှန်း ကိုယ်တွေ့ ကြုံခဲ့​ရတယ်။ ကျွန်တော်တို့ကို နည်းအမျိုးမျိုးနဲ့ ဂရုစိုက်​ပေးတယ်။” မကြာသေး​ခင်​တုန်း​က သတင်းကောင်း ဟောပြောသူများ​အတွက် သင်တန်းကို သူတို့ တက်ခွင့်​ရခဲ့တယ်။

အီတလီ​နိုင်ငံက အသက် ၄၃ နှစ်အရွယ် ဆိုင်​မွန်​နဲ့ နယူးဇီလန်​နိုင်ငံသူ အသက် ၃၇ နှစ်အရွယ် ဇနီး​အန်​နာ​တို့ကို မြန်မာ​ပြည်​ကို ပြောင်းရွှေ့​ဖို့ ဘာက လှုံ့ဆော်​ပေးခဲ့သလဲ။ “မြန်မာ​ပြည်​အကြောင်း ရေးထားတဲ့ ၂၀၁၃ နှစ်ချုပ်​စာအုပ် ပါ” လို့ အန်နာ ဖြေတယ်။ “မြန်မာ​ပြည်မှာ အမှုဆောင်​ရတာ အခွင့်ထူး​ကြီး​ပါ​ပဲ။ ဒီမှာ ဘဝက ရိုးရှင်းတဲ့​အတွက် ယေဟောဝါရဲ့ အမှုတော်မှာ အချိန်ပို​ပေးနိုင်တယ်။ ယေဟောဝါရဲ့ စောင့်ရှောက်မှုကို ခံစားရလို့ စိတ်လှုပ်ရှား​မိတယ်” လို့ ဆိုင်​မွန်​ပြောတယ်။ (ဆာ. ၁၂၁:၅) “ကျွန်မ သိပ်ပျော်တာပဲ။ ဘဝက ရိုးရှင်း​တော့ လင်မယား​နှစ်ယောက် အချိန်ပို​ပေးနိုင်​လို့ ပိုပြီး​ရင်းနှီး​လာတယ်။ မိတ်ဆွေ​သစ်​တွေ ရလာတယ်။ သက်သေခံ​တွေ​အပေါ် လူတွေ အမြင်​မ​စောင်း​ဘဲ ကောင်းကောင်း တုံ့ပြန်​ကြတယ်” လို့ အန်​နာ ပြောတယ်။

အန်​နာ​က သူ့​အတွေ့အကြုံ​ကို ဒီလို​ပြောပြတယ်– “တစ်နေ့၊ ဈေး​မှာ တက္ကသိုလ်​ကျောင်းသူ​တစ်ယောက်ကို သက်သေခံ​ပြီး ပြန်တွေ့​ဖို့ ချိန်း​လိုက်တယ်။ နောက်​တစ်ကြိမ်​တွေ့​တော့ သူငယ်ချင်း​တစ်ယောက်ကို ခေါ်​လာတယ်။ နောက်​တစ်ခေါက်​ကျတော့ တချို့ကို ထပ်​ခေါ်​လာတယ်။ နောက်​တစ်ခေါက်​ကျတော့ ပိုများတယ်။ အခု သူတို့​ထဲ​က ငါးယောက်​နဲ့ ကျမ်းစာ​လေ့လာ​နေတယ်။” “လူတွေက ဖော်ရွေ​ပြီး စပ်စု​ကြတယ်။ စိတ်ဝင်စား​သူတွေ များ​လွန်း​လို့ အချိန် မလောက်​နိုင်​ဘူး” လို့ ဆိုင်​မွန်​ပြောတယ်။

မြန်မာ​ပြည်​ကို ပြောင်းလာဖို့ ဘာတွေ လက်တွေ့ကျကျ လုပ်ခဲ့​ရသလဲ။ ဂျပန်​နိုင်ငံက မီဇူ​ဟို ပြောပြတယ်– “ကျွန်မ​အမျိုးသား ဆာ​ချီ​အို​က ပိုလိုအပ်တဲ့​နေရာမှာ အမှုဆောင်​ချင်တယ်။ ဘယ်​သွားကြမလဲ။ ၂၀၁၃ နှစ်ချုပ်​စာအုပ် မှာပါတဲ့ အားရှိစရာ တွေ့ကြုံမှု​တွေ ဖတ်ပြီး​နောက် မြန်မာ​ပြည်မှာ အမှုဆောင်ဖို့  စစဉ်းစား​လာတယ်။” “ရန်ကုန်​မြို့တော်​ကို တစ်ပတ် သွားလည်​ပြီး အခြေအနေ ကြည့်ဖို့ ဆုံးဖြတ်​လိုက်တယ်။ ဒီ​ခရီးတို​ကြောင့် ပြောင်း​ဖို့ ပို​သေချာ​သွားတယ်” လို့ ဆာ​ချီ​အို ဆက်ပြောတယ်။

ဩစတြေးလျ​နိုင်ငံက အသက် ၅၀ ဝန်းကျင် ရော့ဒ်​နီ​နဲ့ ဇနီး​ဂျိန်း​ဟာ သား​ဂျော်ဒန်၊ သမီး​ဒန်​နီ​ကာ​နဲ့အတူ ၂၀၁၀ ကတည်းက မြန်မာ​ပြည်မှာ အမှုဆောင်​နေတယ်။ “လူတွေ ဘုရား​အကြောင်း သိချင်စိတ် ပြင်း​ပြတာ​ကို​တွေ့ရလို့ စိတ်ထိမိ​သွားတယ်။ မြန်မာ​ပြည်မှာ လာ​အမှုဆောင်ဖို့ တခြား​သူတွေကို အားပေး​ပါတယ်။ ဘာကြောင့်လဲ။ ကျွန်တော်တို့​မိသားစု ယေဟောဝါနဲ့ ပို​ရင်းနှီး​လာတယ်။ လူငယ်​များစွာဟာ ဖုန်း၊ ကား၊ အလုပ် စ​တာတွေ​နဲ့ အလုပ်​များနေ​ကြ​ပေ​မဲ့ ကျွန်တော်တို့ရဲ့ သားနဲ့ သမီး​က​တော့ အမှုဆောင်လုပ်ငန်းမှာ သုံးမယ့် စကားလုံး​အသစ်​တွေ သင်ယူဖို့ အလုပ်များ​နေကြတယ်။ ကျမ်းစာ​အကြောင်း သိပ်​မသိ​သူတွေနဲ့ ဘယ်လို ကျိုးကြောင်းဆင်ခြင်​နိုင်မလဲ၊ အစည်းအဝေးတွေမှာ ဘယ်လို မှတ်ချက်​ပေး​ရမလဲ​ဆိုတာ သင်ယူ​ပြီး ဘုရားရေးရာ အလုပ်တွေ​မှာ အာရုံ​နှစ်​ထား​ကြတယ်” လို့ ရော့ဒ်​နီ ပြောတယ်။

အမေရိကန်​နိုင်ငံက အသက် ၃၇ နှစ်အရွယ် အို​လီ​ဗာ​က ပိုလိုအပ်တဲ့​နေရာမှာ အမှုဆောင်ဖို့ အားပေး​ရတဲ့ အကြောင်းရင်းကို ရှင်းပြတယ်– “အဆင်ပြေ​တဲ့ ဝန်းကျင်​က​နေ ထွက်ပြီး ယေဟောဝါ​အတွက် အမှုဆောင်​လို့ အကျိုး​များစွာ ရတယ်။ အိမ်နဲ့ ဝေး​နေလို့ ဘယ်​အခြေအနေ​မှာ​မဆို ယေဟောဝါကို ပို​ယုံကြည်​ကိုးစား​တတ်လာတယ်။ ကိုယ်​နဲ့ တစ်ခါ​မှ မသိပေမဲ့ ယုံကြည်ခြင်း တူတဲ့​သူတွေနဲ့ တွဲ​အမှုဆောင်​တာ​က ဘုရား​နိုင်ငံတော်​ထက် ပို​အရေးကြီး​တာ ဘာမှ​မရှိမှန်း နားလည်စေတယ်။” အခု၊ အိုလီဗာ​နဲ့ ဇနီး​အန်​နာ​ဟာ တရုတ်​လယ်ကွင်း​မှာ ထက်သန်​စွာ အမှုဆောင်​နေကြတယ်။

ဩစတြေးလျ​နိုင်ငံက အသက် ၅၂ နှစ်အရွယ် ထ​ရေ​ဇာဟာ မြန်မာ​ပြည်မှာ ၂၀၀​၄ ကတည်းက အမှုဆောင်​နေတယ်။ “အခြေအနေ​ပေးမယ်​ဆိုရင် ပိုလိုအပ်တဲ့ နေရာမှာ အမှုဆောင်ဖို့ အားပေး​ပါတယ်။ အမှုဆောင်​လို​စိတ်​သာ ရှိမယ်ဆိုရင် ယေဟောဝါ ကောင်းချီး​ပေးမယ်ဆိုတာ ကိုယ်တွေ့ခံစား​ရတယ်။ ဒီလို​ဘဝမျိုး​ကို တစ်ခါ​မှ စိတ်​မ​ကူး​ဖူး​ဘူး။ အကျိုး​အရှိဆုံး၊ ကျေနပ်စရာ​အကောင်းဆုံး ဘဝ​ပါ​ပဲ” လို့​ပြောတယ်။

မြန်မာ​ပြည်မှာ အမှုဆောင်​နေ​သူတွေရဲ့ အထက်ပါ​စကားတွေက တစ်ခါ​မှ မ​ဟော​ရသေးတဲ့ ဒေသမှာရှိတဲ့ စိတ်​ရိုး​ဖြောင့်​သူတွေကို ကူညီ​ပေးဖို့ သင့်ကို လှုံ့ဆော်​ပေးပါစေ။ ‘မြန်မာ​ပြည်​ကို ကူး​လာပြီး ကျွန်တော်တို့ကို ကူညီ​ပါ’ လို့ သူတို့ ဖိတ်ခေါ်​နေပါတယ်။