TÁʼVI 5
¿Nda̱saa kutáʼan va̱ʼandó xíʼin na̱ veʼendó?
“Va̱ʼa koo inindó xíʼin inkana, vitá koo inindó, ta kǒo sa̱a̱ kamandó.” (Colosenses 3:12)
Ndóʼó na̱ xa̱tindaʼa̱ iinlá ndu̱undó vitin xíʼin ñá síʼíndó á xíʼin yiíndó. Soo va̱ása sandákoondó ña̱ kasato̱ʼóndó xíʼin ña̱ kukuni̱ndó yivándó á siʼíndó, ta vitin na̱ xíniñúʼu kundi̱ʼi̱ka-inindó xa̱ʼa kúú ñá síʼíndó á yiíndó. Sava na̱ veʼendó kǒo kutóona ña̱yóʼo. Consejo ña̱ va̱xi nu̱ú Biblia kivi chindeé ndóʼó ña̱ vií koondó xíʼinna, ta saátu chindeéña ndóʼó na̱ ti̱ndaʼa̱ ña̱ vií kundoondó.
1 SAVANÍ KOONDÓ XÍʼIN NA̱ VEʼENDÓ
ÑA̱ KÁʼA̱N BIBLIA: “Kasato̱ʼó yiváún xíʼin siʼún” (Efesios 6:2). Nda̱saaka ku̱i̱ya̱ ndíka̱ún xíniñúʼu kasato̱ʼúnna. Soo ndakaʼún chi saátu ñá síʼún á yiíún xíniñúʼuna tiempo ña̱ kotona na̱ veʼena. Xa̱ʼa ña̱yóʼo va̱ása ndakanixi̱níún ña̱ kǒo kúni̱ ñá síʼún á yiíún yóʼó tá kíʼinna kuenta xíʼin na̱ veʼena (1 Corintios 13:4; Gálatas 5:26).
ÑA̱ VA̱ʼA KEʼÉNDÓ:
-
Va̱ása ka̱ʼún tu̱ʼun yóʼo: “Na̱ veʼún ndiʼi tiempo káʼa̱n ndaana yi̱ʼi̱”, “nána siʼún ni loʼo kǒo kútóoñá ña̱ kéʼíi̱”
-
Ndakanixi̱níún ña̱ ndóʼo ñá síʼún á yiíún tá káʼún ña̱yóʼo
2 KÁXINÍ KA̱ʼA̱NNDÓ XÍʼINNA
ÑA̱ KÁʼA̱N BIBLIA: “Ta̱a sandákoora yivára xíʼin siʼíra, ta ndakutáʼanra xíʼin ñá síʼíra, ta u̱vi̱ saána iinlá xa̱a̱na nduuna” (Génesis 2:24). Sana tá xa̱tindaʼa̱ndó na̱ veʼendó tuku ta tuku ka̱ʼa̱nna xíʼinndó ndáaña keʼéndó chi ña̱ túvi miína kíʼin tá kíʼinkavana kuenta xíʼinndó.
Soo u̱vi̱ miíndó xíniñúʼu natúʼun xíʼin táʼanndó ndáa ki̱ʼva ka̱ʼa̱nndó xíʼinna tá kǒo kúni̱ndó tuku ta tuku ka̱ʼa̱nna xíʼinndó, soo vií ka̱ʼa̱nndó xíʼinna va̱ása nda̱ʼyi̱ndó nu̱úna (Proverbios 15:1). Vitá koo-inindó, va̱ása kama sa̱a̱ndó chi ña̱yóʼo chindeé ndóʼó ña̱ va̱ʼa kutáʼanndó xíʼinna ta saátu ña̱ va̱ʼa koo káʼnu-inindó xa̱ʼa táʼanndó (Efesios 4:2).
ÑA̱ VA̱ʼA KEʼÉNDÓ:
-
Natúʼun xíʼin ñá síʼún á xíʼin yiíún tá va̱ása kútóún ña̱ tuku ta tuku ka̱ʼa̱n na̱ veʼendó xíʼinndó ndáaña keʼéndó
-
Natúʼun xíʼin táʼanndó xa̱ʼa ña̱yóʼo ndáaña keʼéndó
