Ndi̱ʼi̱ na̱ testigo Jehová chíka̱a̱ndi̱ ndee̱ ña̱ keʼéndi̱ ña̱ sa̱náʼa̱ ta̱ Jesús ta saátu kéʼéndi̱ nda̱a̱ táki̱ʼva ke̱ʼé na̱ apóstol. Nu̱ú artículo yóʼo ka̱ʼa̱nña xa̱ʼa̱ mií ña̱ ndáyáʼvika ña̱ kándíxandi̱.

1.   Ndióxi̱. Ndásakáʼnundi̱ iinlá Ndióxi̱ ta̱ nda̱a̱, ta̱ káʼnuní ta saátu ta̱ i̱xava̱ʼa ndiʼi ña̱ʼa. Ta ki̱vi̱ra kúú Jehová (Salmo 83:18; Apocalipsis 4:11). Ta̱yóʼo kúú Ndióxi̱ ta̱ xi̱ndasakáʼnu ta̱ Abrahán, ta̱ Moisés xíʼin ta̱ Jesús (Éxodo 3:6; 32:11; Juan 20:17).

2.   Biblia. Kándíxandi̱ ña̱ kúúña ña̱ káʼa̱n Ndióxi̱ xíʼin ndiʼi na̱ yiví (Juan 17:17; 2 Timoteo 3:16). Ña̱ kándíxandi̱ va̱xiña nu̱ú 66 libro ña̱ kúúmiíña á ña̱ káʼa̱nna xíʼin Antiguo xíʼin Nuevo Testamento. Ta̱ profesor Jason BeDuhn ni̱ka̱ʼa̱nra xa̱ʼa̱ ña̱yóʼo, tá ka̱ʼyíra ña̱yóʼo xa̱ʼa̱ na̱ testigo Jehová “ndiʼi ña̱ kándíxana xíʼin ndiʼi ña̱ kéʼéna va̱xiña nu̱ú Biblia, ta va̱ása násamana ña̱ káʼa̱n ña̱yóʼo”. a

    Ni kándíxavandi̱ ndiʼi ña̱ káʼa̱n Biblia, su̱ví ndiʼivíña xíniñúʼu kuuña nda̱a̱ táki̱ʼva ni̱ka̱ʼyi̱ña. Saáchi sava ña̱ káʼa̱n Biblia xa̱ʼa̱ ña̱ ndána̱ʼa̱ kuití kúúña ña̱kán kivi kachiyó ña̱ su̱ví ndiʼi ña̱ ni̱ka̱ʼyi̱ nu̱úña xíniñúʼu kooña nda̱a̱ táki̱ʼva ni̱ka̱ʼyi̱ña (Apocalipsis 1:1).

3.   Ta̱ Jesús. Ndíku̱nndi̱ ña̱ sa̱náʼa̱ra ta saátu ña̱ ke̱ʼéra, ta íxato̱ʼóndi̱ra chi sa̱kǎkura ndi̱ʼi̱ ta kúútura se̱ʼe Ndióxi̱ (Mateo 20:28; Hechos 5:31). Ña̱yóʼo náʼa̱ña ña̱ kúúndi̱ cristiano (Hechos 11:26). Biblia va̱ása sánáʼa̱ña ña̱ kúúra Ndióxi̱ ta̱ kúúmií ndiʼi ndee̱ ta ni va̱ása sánáʼa̱ña xa̱ʼa̱ ña̱ Trinidad (Juan 14:28).

4.   Reino Ndióxi̱. Kúúña iin ña̱ chíñu ña̱ íyo chí ndiví; ta su̱ví iin ña̱ ndíka̱a̱ níma̱ na̱ cristiano kúúña. Sandíʼi-xa̱ʼa̱ña na̱ chíñu ñuyǐví yóʼo ta saxínuña ña̱ kúni̱ Ndióxi̱ ná koo nu̱ú ñuʼú yóʼo (Daniel 2:44; Mateo 6:9, 10). Si̱lóʼo kúma̱ní ta xi̱nu ña̱yóʼo, saáchi profecía ña̱ káʼa̱n Biblia náʼa̱ña ña̱ xa̱a̱ ndóoyó “ki̱vi̱ nu̱ú ndíʼi” (2 Timoteo 3:1-5; Mateo 24:3-14).

    Ta̱ Jesús kúú rey ti̱xin Reino Ndióxi̱ ña̱ íyo chí ndiví. Ki̱xáʼa xáʼndachíñura tá ku̱i̱ya̱ 1914 (Apocalipsis 11:15).

5.   Ña̱ ka̱kuyó. Tíxa̱ʼvi ña̱ ni̱xi̱ʼi̱ ta̱ Jesús, na̱ yiví kivi ka̱kuna nu̱ú ku̱a̱chi ta saátu nu̱ú ña̱ xíʼi̱yó (Mateo 20:28; Hechos 4:12). Ña̱ va̱ʼa ndakiʼinna ña̱ va̱ʼa xa̱ʼa̱ ña̱ ke̱ʼéra, xíniñúʼu kandíxana ta̱ Jesús, nasamana ki̱ʼva ña̱ tákuna ta ndakuchina (Mateo 28:19, 20; Juan 3:16; Hechos 3:19, 20). Xíʼin ña̱ kéʼé na̱ yiví náʼa̱na á ndixa kándíxana Ndióxi̱ (Santiago 2:24, 26). Soo, ña̱ ka̱kuna su̱ví iin ña̱ xíniñúʼu ndakiʼinna kúúña; saáchi ndakiʼinna ña̱yóʼo xa̱ʼa̱ ña̱ náʼa̱ Ndióxi̱ ña̱ va̱ʼa-inira (Gálatas 2:16, 21).

6.   Ndiví. Jehová xíʼin ta̱ Jesucristo ta saátu na̱ ángel na̱ nda̱kú-ini íyona chí ndiví (Salmo 103:19-21; Hechos 7:55). b Ta saátu iin tiʼvi na̱ yiví, na̱yóʼo kúú na̱ 144.000 na̱ ndataku chí ndiví ta kaʼndachíñuna xíʼin ta̱ Jesús ti̱xin Reino Ndióxi̱ (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Ñuʼú. Ndióxi̱ i̱xava̱ʼara ñuʼú ña̱ koo na̱ yiví nu̱úña ndiʼi tiempo (Salmo 104:5; 115:16; Eclesiastés 1:4). Taxira ña̱ va̱ʼa ndaʼa̱ na̱ yiví na̱ kándíxa miíra, ta kúú ña̱ va̱ása kiʼinka kue̱ʼe̱ miína, ta saátu taxira koona ndiʼi tiempo nu̱ú ñuʼú livi (Salmo 37:11, 34).

8.   Ña̱ va̱ása va̱ʼa xíʼin ña̱ xóʼvi̱yó. Biblia káchiña iin ángel va̱ása níkandíxakara Ndióxi̱. Tasaá ki̱xáʼa íyo ña̱ va̱ása va̱ʼa ta saátu ña̱ xóʼvi̱yó (Juan 8:44). Ta̱ ángel yóʼo, tá va̱ása níkandíxakara Ndióxi̱ ndu̱ura ta̱ Ndi̱va̱ʼa, sa̱xínu̱ra-ini ta̱ Adán xíʼin ñá Eva ña̱ nda̱kutáʼanna xíʼinra. Xa̱ʼa̱ ña̱kán, ku̱a̱ʼání tu̱ndóʼo íyo nu̱ú na̱ se̱ʼena (Génesis 3:1-6; Romanos 5:12). Ña̱ va̱ʼa nduvií ña̱ vatá ña̱ ni̱ka̱ʼa̱n ta̱ Ndi̱va̱ʼa, Ndióxi̱ táxira ña̱ loʼo tiempo koo ña̱ va̱ása va̱ʼa xíʼin ña̱ xóʼvi̱yó, soo su̱ví ndiʼi tiempo koo ña̱yóʼo.

9.   Ña̱ xíʼi̱yó. Tá xíʼi̱ iin na̱ yiví, va̱ása tákukana (Salmo 146:4; Eclesiastés 9:5, 10). Na̱ ni̱xi̱ʼi̱ va̱ása xóʼvi̱na xi̱tu̱n á ndayá.

    Ku̱a̱ʼání na̱ yiví na̱ ni̱xi̱ʼi̱ ndikó tukuna kutakuna tá ná kixa̱a̱ ki̱vi̱ ña̱ sandataku Ndióxi̱ na̱yóʼo (Hechos 24:15). Soo, na̱ ndataku ta va̱ása kándíxana ña̱ káʼa̱n Ndióxi̱ ndiʼi-xa̱ʼa̱na ndiʼi tiempo ta va̱ása ndikóna kutakuna (Apocalipsis 20:14, 15).

10.   Na̱ veʼeyó. Nda̱a̱ táki̱ʼva ni̱ka̱ʼa̱n Ndióxi̱ tá xa̱ʼa̱, nu̱ú ndi̱ʼi̱ na̱ testigo Jehová na̱ tíndaʼa̱ kúú iin ta̱a xíʼin iin ñaʼá, ta iinlá xa̱ʼa̱ ña̱ kivi sandákootáʼanna kúú tá iin na̱yóʼo ni̱ki̱si̱na xíʼin iin na̱ va̱ása nítindaʼa̱ xíʼinna (Mateo 19:4-9). Kándíxandi̱ consejo ña̱ va̱xi nu̱ú Biblia va̱ʼaníña ta chíndeétáʼanña xíʼin na̱ xa̱a̱ ti̱ndaʼa̱ ña̱ si̱í koona xíʼin na̱ veʼena (Efesios 5:22–6:1).

11.   Ña̱ ndásakáʼnundi̱. Va̱ása ndásakáʼnundi̱ cruz ni imagen (Deuteronomio 4:15-19; 1 Juan 5:21). Sava ña̱ kéʼéndi̱ ña̱ ndásakáʼnundi̱ Ndióxi̱ kúú:

    •   Káʼa̱nndi̱ xíʼin Ndióxi̱ (Filipenses 4:6).

    •   Káʼvindi̱ ta nándukúndi̱ ña̱ va̱xi nu̱ú Biblia (Salmo 1:1-3).

    •   Ndákanixi̱níndi̱ xa̱ʼa̱ ña̱ sákuaʼandi̱ nu̱ú Biblia (Salmo 77:12).

    •   Ndákutáʼanndi̱ ña̱ káʼa̱nndi̱ xíʼin Ndióxi̱, káʼvindi̱ Biblia, inkáchi xítandi̱ yaa, káʼa̱nndi̱ xa̱ʼa̱ ña̱ kándíxandi̱ ta saátu chíka̱a̱ndi̱ ndee̱ xíʼin táʼanndi̱ (Colosenses 3:16; Hebreos 10:23-25).

    •   Nátúʼunndi̱ “tu̱ʼun va̱ʼa xa̱ʼa̱ Reino Ndióxi̱” (Mateo 24:14).

    •   Chíndeétáʼanndi̱ xíʼin na̱ kúma̱ní ña̱ʼa nu̱ú (Santiago 2:14-17).

    •   Íxava̱ʼandi̱ ta ndáandi̱ veʼe nu̱ú ndákutáʼanndi̱ á inkaka veʼe ña̱ xíniñúʼundi̱ ña̱ va̱ʼa keʼéndi̱ chiñundi̱ ña̱ sanáʼa̱ndi̱ na̱ yiví xa̱ʼa̱ Biblia (Salmo 127:1).

    •   Chíndeétáʼanndi̱ xíʼin na̱ yáʼa nu̱ú tu̱ndóʼo (Hechos 11:27-30).

12.   Ndáa ki̱ʼva íyo ña̱ kéʼéndi̱. Ndákutáʼanndi̱ ti̱xin ku̱a̱ʼá congregación. Iin tá iin ña̱yóʼo na̱ kíʼin kuenta xíʼinña kúú iin tiʼvi loʼo na̱ testigo na̱ káʼa̱nna anciano xíʼin, ta su̱ví iinlá na̱yóʼo kúú na̱ sánáʼa̱ inkana ta va̱ása kíʼinna xu̱ʼún xa̱ʼa̱ ña̱ kéʼéna (Mateo 10:8; 23:8). Va̱ása táxindi̱ diezmo ta va̱ása ndúkúndi̱ xu̱ʼún nu̱ú inkana (2 Corintios 9:7). Xu̱ʼún ña̱ xíniñúʼundi̱ kúú donación ña̱ táxi na̱ yiví xíʼin ndiʼi níma̱na ta va̱ása káʼa̱nna nda̱saa taxina.

     Iin tiʼvi loʼo na̱ xa̱a̱ ku̱a̱ʼá ku̱i̱ya̱ ndásakáʼnu Ndióxi̱, na̱ káʼa̱nna xíʼin Cuerpo Gobernante, na̱yóʼo kúú na̱ kíʼin kuenta xíʼin ndiʼi chiñu ña̱ kéʼé na̱ testigo Jehová nu̱ú iníísaá ñuyǐví (Mateo 24:45).

13.   Inkáchi kítáʼanndi̱. Nda̱a̱ ndáaka nu̱ú íyondi̱, inkáchi íyo ña̱ kándíxandi̱ (1 Corintios 1:10). Chíka̱a̱ndi̱ ndee̱ ña̱ inkáchi kítáʼanndi̱ ni kúúmiíndi̱ xu̱ʼún á va̱ása, ni xa̱a̱ síín náʼa̱ndi̱ á xa̱a̱ síín ñuu ke̱endi̱ (Hechos 10:34, 35; Santiago 2:4). Soo ña̱yóʼo va̱ása sásiña nu̱ú iin tá iin na̱ testigo ña̱ ndaka̱xinna ña̱ keʼéna nda̱a̱ táki̱ʼva káʼa̱n ña̱ xínitúni̱na xa̱ʼa̱ ña̱ sákuaʼana nu̱ú Biblia (Romanos 14:1-4; Hebreos 5:14).

14.   Ña̱ kéʼéndi̱. Chíka̱a̱ndi̱ ndee̱ ña̱ náʼa̱ndi̱ ña̱ kúʼvi̱-inindi̱ xínindi̱ inkana xíʼin ndiʼi ña̱ kéʼéndi̱ (Juan 13:34, 35). Chíka̱a̱ndi̱ ndee̱ ña̱ va̱ása keʼéndi̱ ña̱ kǒo kútóo Ndióxi̱. Xa̱ʼa̱ ña̱kán, va̱ása xíniñúʼundi̱ ni̱i̱. Tá kúú, ña̱ va̱ása ndéeña ndi̱ʼi̱ (Hechos 15:28, 29; Gálatas 5:19-21). Va̱ása kúni̱ndi̱ koo ku̱a̱chi ta saátu va̱ása xáʼa̱nndi̱ nu̱ú ku̱a̱chi (Mateo 5:9; Isaías 2:4). Íxato̱ʼóndi̱ na̱ chíñu ta kándíxandi̱ ley tá kítáʼan ña̱yóʼo xíʼin ña̱ káʼa̱n Ndióxi̱ (Mateo 22:21; Hechos 5:29).

15.   Ña̱ kítáʼanndi̱ xíʼin inkana. Ta̱ Jesús ni̱ka̱ʼa̱nra: “Kuʼvi̱-iniún kuniún inka na̱ yiví nda̱a̱ táki̱ʼva kúʼvi̱-iniún xíniún miíún” ta saátu ni̱ka̱ʼa̱nra na̱ ndásakáʼnu Ndióxi̱ “su̱ví kuenta na̱ ñuyǐví kúúna” (Mateo 22:39; Juan 17:16). Xa̱ʼa̱ ña̱kán, chíka̱a̱ndi̱ ndee̱ ña̱ kéʼéndi̱ ña̱ va̱ʼa xíʼin ndiʼina, ta kǒo kíʼvindi̱ xíʼin ña̱ kéʼé na̱ ñuyǐví yóʼo ni ña̱ política ni va̱ása kítáʼanndi̱ xíʼin inka religión (Gálatas 6:10; 2 Corintios 6:14). Soo, íxato̱ʼóndi̱ ña̱ ndáka̱xin inkana keʼéna (Romanos 14:12).

 Tá kúni̱kaún kunda̱a̱-iniún xa̱ʼa̱ ña̱ kándíxa ndi̱ʼi̱ na̱ testigo Jehová, ndani̱ʼíkaún ña̱ káʼa̱n xa̱ʼa̱ ña̱yóʼo nu̱ú sitio ña̱ kúúmiíndi̱ nu̱ú Internet. Ta saátu kivi kaʼyíún iin tutu ku̱ʼu̱n ndaʼa̱ ña̱ Betel ña̱ kúúmiíndi̱, ta saátu kivi ku̱ʼún reunión ti̱xin veʼe nu̱ú ndátakandi̱ ña̱ íyo yatin nu̱ú íyoún, á nda̱ka̱tu̱ʼún iin na̱ testigo Jehová na̱ íyo ñuu nu̱ú íyoún.