IL-BIBBJA TBIDDEL IL-ĦAJJIET
“Il-Martial Arts Kien l-Iktar Ħaġa Importanti f’Ħajti”
Sena tat-Twelid: 1962
Post tat-Twelid: L-Istati Uniti
Passat: Kont inħobb ħafna l-martial arts
IL-PASSAT TIEGĦI
Darba waħda, waqt it-training, tajt daqqa lil sieħbi u weġġajtu. Bi żball ilqattu fi mnieħru. Vera ddispjaċieni. Dan l-iżball ġegħelni naħseb għandix inkompli nittrennja l-martial arts, xi ħaġa li jien kont inħobb u kont ilni nipprattikaha għal ħafna snin. Imma l-ewwel ħalli ngħidilkom kif bdejt dan l-isport.
Trabbejt f’post qrib Buffalo, New York, ġo familja magħquda u reliġjuża ħafna. Kont immur skola tal-Knisja u kont abbati. Il-ġenituri xtaqu li jien u oħti nirnexxu fil-ħajja, għalhekk, wara l-iskola kienu jħalluni nitgħallem l-isports jew naħdem part-time. Imma riduni wkoll nitfaʼ moħħi hemm fl-iskola, biex inġib marki tajbin. Dan għenni biex minn taʼ età żgħira nkun iddixxiplinat.
Meta kelli 17-il sena, bdejt nitgħallem il-martial arts. Għamilt snin nittrennja tliet sigħat kuljum, sitt ijiem fil-ġimgħa. Ukoll, kull ġimgħa kont inqattaʼ sigħat twal naħseb dwar tattiki u mossi, u kont nara ħafna vidjows biex nimpruvja. Kienet l-hena tiegħi nipprattika b’għajnejja mgħottijin, anke meta kont nittrennja bl-armi. Kont tgħallimt inkisser l-injam u l-brikks b’idejja. Kont wieħed mill-aħjar f’dan l-isport u rbaħt ħafna trophies fil-kompetizzjonijiet. Il-martial arts kien l-iktar ħaġa importanti f’ħajti.
Kont inħossni rnexxejt fil-ħajja. Iggradwajt mill-università u ġibt riżultati tajbin ħafna. Bdejt naħdem maʼ kumpanija kbira bħala computer systems engineer. Maʼ din il-kumpanija kelli ħafna benefiċċji. Dak iż-żmien, kelli d-dar tiegħi, u kelli tfajla wkoll. Għalkemm għan-nies kien jidher li ma jonqosni xejn u kelli nkun ferħan, jien ma kontx kuntent. Kelli ħafna mistoqsijiet importanti li ma kontx naf it-tweġiba għalihom.
KIF IL-BIBBJA BIDDLITLI ĦAJTI
Minħabba li ridt insib it-tweġibiet għall-mistoqsijiet li kelli, bdejt immur il-knisja darbtejn fil-ġimgħa u nitlob lil Alla. Imbagħad, darba waħda kont qed nitkellem maʼ sieħbi u din il-konversazzjoni biddlitli ħajti. Jien staqsejtu: “Ġieli ħsibt x’inhu l-iskop tal-ħajja?” Imbagħad għedtlu: “Daqs kemm hawn problemi u inġustizzji!” Hu qalli li ġieli staqsa dawn il-mistoqsijiet u mill-Bibbja kien sab it-tweġibiet li kienu jagħmlu sens. Imbagħad tani ktieb jismu Int Tista’ Tgħix Għal Dejjem Fil-Ġenna Fuq L-Art. a Hu qalli li kien qed jistudja l-Bibbja max-Xhieda taʼ Ġeħova. Għall-ewwel, ma kontx ċert naċċettax il-ktieb, għax ma kontx naf jekk għandix naqra kotba li mhumiex tar-reliġjon tiegħi. Imma x-xewqa li nsib it-tweġibiet għall-mistoqsijiet tiegħi ħajritni nara jekk dak li kienu qed jgħallmu x-Xhieda taʼ Ġeħova kienx jagħmel sens.
Vera kont qed nitgħallem affarijiet tal-għaġeb mill-Bibbja. Jien tgħallimt li l-iskop t’Alla hu li l-bnedmin jgħixu għal dejjem f’ġenna tal-art u l-iskop tiegħu ma nbidilx. (Ġenesi 1:28) Bqajt mistagħġeb meta sibt l-isem t’Alla, Ġeħova, fil-Bibbja tiegħi, il-King James version. Tgħallimt ukoll li dan kien l-isem li jien kont nitlob dwaru fit-Talba tal-Missierna. (Salm 83:18; Mattew 6:9) Ukoll, fl-aħħar sirt naf għala għalissa, Alla jippermetti t-tbatija. Dak li kont qed nitgħallem mill-Bibbja vera kien jagħmel sens!
Qatt mhu se ninsa l-ewwel darba li mort laqgħa tax-Xhieda taʼ Ġeħova. Kulħadd kien dħuli u kulħadd ried ikun jaf x’jisimni. Fl-ewwel laqgħa li mort, kien hemm taħdita speċjali li kienet titkellem dwar it-talb li jismaʼ u jwieġeb Alla. Is-suġġett vera kien interessani għax jien kont nitlob lil Alla biex jgħinni. Imbagħad, attendejt it-Tifkira tal-mewt taʼ Ġesù. L-iktar ħaġa li kienet timpressjonani kienet li anke t-tfal kienu jsegwu hekk kif jaqraw mill-Bibbja. Għall-ewwel, ma kontx naf kif insib l-iskritturi, imma x-Xhieda taʼ Ġeħova għenuni ħafna u għallmuni kif nuża l-Bibbja.
Iktar ma bdejt nattendi l-laqgħat, iktar bdejt napprezza l-mod kif ix-Xhieda taʼ Ġeħova kienu jgħallmu. F’kull laqgħa, kont nitgħallem ħafna u wara dejjem kont inħossni inkuraġġit. Imbagħad qaluli jekk xtaqtx nistudja l-Bibbja b’mod personali.
Jien stajt nara d-differenza li kien hemm bejn ix-Xhieda taʼ Ġeħova u n-nies fir-reliġjon tiegħi. Indunajt li x-Xhieda kienu nies sinċiera u magħqudin, li vera jippruvaw jogħġbu lil Alla. Maż-żmien, sirt iktar konvint li huma kienu l-Kristjani veri minħabba l-imħabba li rajt bejniethom.—Ġwanni 13:35.
Iktar ma kont qed nitgħallem x’tgħid il-Bibbja, iktar bdejt nagħmel bidliet f’ħajti biex ngħix kif jixtieq Alla. Però, ħassejt li qatt ma stajt nieqaf mill-martial arts. Kont nieħu pjaċir ħafna nittrennja u nieħu sehem fil-kompetizzjonijiet. Meta darba staqsejt lir-raġel li kont nistudja l-Bibbja miegħu dwar dan, hu b’qalb tajba qalli, ”Ibqaʼ studja, jien naf li se tieħu l-aħjar deċiżjoni.” Dan il-kliem vera għenni. Iktar ma studjajt, iktar ridt nogħġob lil Alla Ġeħova.
Mument li biddilli ħajti kien l-aċċident li semmejt fil-bidu, meta bi żball ilqatt lil sieħbi fi mnieħru. Dak li ġara ġegħelni naħseb bis-serjetà jekk stajtx inkun Kristjan li jħobb il-paċi u fl-istess ħin inkompli nittrennja l-martial arts. Minn Isaija 2:3, 4 kont tgħallimt li dawk li jridu jobdu lil Alla ma setgħux ‘jitħarrġu iktar għall-gwerra.’ U Ġesù kien jgħallem lin-nies biex ma jkunux vjolenti anke meta jiġu trattati ħażin. (Mattew 26:52) Għalhekk, ma bqajtx nittrennja dan l-isport li tant kont inħobb.
Wara dan, ħadt bis-serjetà l-parir tal-Bibbja billi għamiltha mira biex nittrennja lili nnifsi kif nogħġob lil Alla. (1 Timotju 4:7) Il-ħin li kont inqattaʼ u l-isforz li kont nagħmel fil-martial arts issa kont qed nużahom biex insaħħaħ il-ħbiberija tiegħi m’Alla u naqdih. It-tfajla ma bdietx taqbel ma dak li kont qed nitgħallem mill-Bibbja. Fil-fatt, maʼ bqajniex flimkien. Jien tgħammidt bħala wieħed mix-Xhieda taʼ Ġeħova fl-24 taʼ Jannar 1987. Ftit wara, l-ippritkar sar ix-xogħol tiegħi. Ridt nuża l-ħin tiegħi biex ngħallem lil oħrajn dak li tgħallem il-Bibbja. Sal-lum, għadni nagħmel dan ix-xogħol. Għal xi żmien, ħdimt ukoll fil-kwartieri ġenerali tax-Xhieda taʼ Ġeħova, fi New York, l-Istati Uniti.
KIF IBBENEFIKAJT
Issa li tgħallimt il-verità dwar Alla, sibt dak li kelli nieqes fil-ħajja tiegħi. M’għadnix inħoss dak il-vojt ġewwa fija. Minflok, issa għandi skop fil-ħajja tiegħi, tama vera għall-futur, u vera nħossni kuntent. Xorta għadni nieħu pjaċir nittrennja, imma m’għadux l-iktar ħaġa importanti għalija. L-iktar ħaġa importanti fil-ħajja tiegħi hi li naqdi lil Ġeħova.
Meta kont nittrennja l-martial arts, kont inkun moħħni fin-nies taʼ madwari għax dejjem kont naħseb kif se niddefendi ruħi jekk xi ħadd jagħmel għalija. Illum, ukoll inkun moħħni f’dawk taʼ madwari, imma għal raġuni differenti—biex ngħinhom. Il-Bibbja għenitni nsir persuna ġeneruża u raġel aħjar għall-mara tiegħi, Brenda.
Il-martial arts kien l-iktar ħaġa importanti f’ħajti. Imma issa għandi xi ħaġa ħafna aħjar. Dak li tgħid il-Bibbja vera jagħmel sens: “It-taħriġ tal-ġisem hu taʼ benefiċċju għal ftit; imma d-devozzjoni lejn Alla hi taʼ benefiċċju għal kollox, għax toffri l-wegħda tal-ħajja t’issa u taʼ dik li ġejja.”—1 Timotju 4:8.
a Ippubblikat mix-Xhieda taʼ Ġeħova imma issa m’għadux jiġi stampat.