Twilidt fil-​belt żgħira taʼ Texcoco. Dak iż-​żmien, il-​biċċa l-​kbira mit-​toroq kienu mħarbtin u mimlijin trab. Fil-​belt, kienet ħaġa komuni li tara n-​nies ġejjin minn irħula fil-​viċin bil-​ħmir tagħhom mgħobbijin b’affarijiet għall-​bejgħ. Konna familja fqira ferm b’disat itfal li minnhom kont is-​sebaʼ wieħed. Missieri kien isewwi s-​sandlijiet biex imantni lill-​familja. Imma miet meta kien għad kelli sebaʼ snin. Minn dakinhar ’il quddiem, ommi ħadmet iebes biex tipprovdi l-​ikel għall-​familja.

Nannuwi kien idoqq il-​vjolin u kien surmast taʼ orkestra li kienet tispeċjalizza f’mużika reliġjuża taʼ stil klassiku. Kważi l-​membri kollha tal-​familja tiegħi kienu jdoqqu xi strument. Ommi kienet tkanta fil-​kor tal-​knisja, u zijuwi kien kantant tal-​opri u jdoqq il-​pjanu. Konna Kattoliċi devoti—jien kont abbati, u kienet il-​ħolma tiegħi li nsir missjunarju Kattoliku. Fl-​istess waqt, il-​films tal-​karatè kont inħobbhom ħafna. Iktar ma rajt minn dawn il-​films, iktar sirt vjolenti.

Fil-​belt taʼ Puebla, dħalt fi skola reliġjuża li kienet isservi bħala seminarju. Il-​mira tiegħi kienet li nsir qassis Kattoliku. Imma fl-​aħħar sena tal-​istudji tiegħi ddiżappuntajt ruħi bil-​Knisja Kattolika. Soru żagħżugħa ttantatni sesswalment. It-​tentazzjoni ma waqajtx għaliha, imma s-​sitwazzjoni qanqlet ġo fija x-​xewqa li niżżewweġ. Iktar minn hekk, innotajt li diversi qassisin kienu qed juru wiċċ b’ieħor. Eventwalment, marritli l-​ħajra li nidħol qassis.

 Iddeċidejt li nistudja l-​mużika fl-​Iskola Nazzjonali tal-​Mużika f’Mexico City. Meta ggradwajt, iżżewwiġt, u jien u marti ma domniex ma kellna erbat itfal. Kont nipprovdi għall-​familja tiegħi billi nkanta waqt il-​quddiesa fil-​Knisja Kattolika.

Mill-​bidu nett, fiż-​żwieġ tagħna kellna l-​inkwiet. Jien u marti konna vjolenti bejnietna, fil-​parti l-​kbira għax konna ngħiru għal xulxin. Għall-​ewwel, konna nattakkaw lil xulxin bi kliemna, imbagħad bis-​swat. Fl-​aħħar nett, wara 13-​il sena ddeċidejna li nisseparaw u iktar tard niddivorzjaw.

L-​ewwel kuntatt li kelli max-​Xhieda taʼ Ġeħova kien qabel ma sseparajt minn maʼ marti. Żewġ Xhieda ħabbtulna fuq il-​bieb u offrewlna li niddiskutu l-​Bibbja. Kont naħseb li naf ħafna dwar ir-​reliġjon, u għalhekk ipprovajt nurihom li huma żbaljati. Staqsejthom mistoqsijiet diffiċli li ħsibt li ħadd ma kien jaf iwiġibhom. Imma kont nibqaʼ skantat għax dejjem tawni tweġibiet tajbin ibbażati fuq il-​Bibbja. Bdejt nara kemm tassew kont naf ftit. Madankollu, marti xejn ma kienet tittrattahom sew lix-​Xhieda, u jien kien ikolli ħafna x’nagħmel, u b’hekk ma baqgħux iżuruna.

Ħames snin wara kont qed ngħix maʼ mara oħra, Elvira, meta għal darb’oħra ġejt f’kuntatt max-​Xhieda taʼ Ġeħova. Elvira ma kinitx topponihom lix-​Xhieda, u għalhekk kien iktar faċli għalija li nistudja l-​Bibbja regolarment. Xorta waħda, domt diversi snin biex inbiddel ħajti.

Intbaħt li biex inqim b’qalbi kollha lil Ġeħova kelli bżonn nagħmel xi bidliet kbar. L-​ewwel kelli nieqaf milli nkanta waqt il-​quddiesa fil-​Knisja Kattolika. Dan kien ifisser li kelli nsib mezz ieħor kif naqlaʼ l-​għajxien. (Rivelazzjoni 18:4) Kelli bżonn ukoll li nillegalizza ż-​żwieġ tiegħi maʼ Elvira.

Iżda waħda mill-​iktar bidliet ibsin kienet li nitgħallem nikkontrolla t-​tempra kiefra. Żewġ versi Bibliċi li għenuni b’mod speċjali kienu Salm 11:5, li juri li Ġeħova jobgħod il-​vjolenza, u l-​1 Pietru 3:7, li għallimni li jekk irrid li Ġeħova jismaʼ talbi għandi nonora lil marti. Hekk kif immeditajt fuq dawn il-​versi u tlabt lil Ġeħova għall-​għajnuna, bil-​mod il-​mod stajt nikkontrolla t-​tempra.

Issa ngawdi ħajja hienja tal-​familja. Qed nistinka sabiex nirranġa r-​relazzjoni tiegħi maʼ wliedi subien li kelli mill-​ewwel żwieġ u biex ngħin lil Elvira u lit-​tfal tagħna jibqgħu b’saħħithom fil-​fidi.

Meta kont żgħir, kienet il-​ħolma tiegħi li nsir qassis u ngħin lin-​nies. Issa mmantni lill-​familja tiegħi billi ngħallem il-​mużika. Inħoss li ħajti għandha skop veru. Kemm jien grat li Ġeħova kien paċenzjuż miegħi, u tani l-​opportunità li ninbidel u nsir persuna aħjar!