LEZZJONI 01
Kif Tistaʼ Tgħinek il-Bibbja?
Kważi kulħadd isaqsi dwar għala neżistu, inbatu, immutu u kif se tkun il-ħajja fil-futur. Għandna bżonn l-għajnuna wkoll biex insolvu problemi bħal li naqilgħu biżżejjed flus u kif ikollna familja ferħana. Ħafna nies isibu li l-Bibbja hi t’għajnuna. Mhux biss għax tgħinhom iwieġbu mistoqsijiet importanti fil-ħajja, imma anki għax tagħtihom pariri tajbin għall-ħajja ta’ kuljum. Taħseb li l-Bibbja tista’ tgħin lin-nies?
1. X’inhuma xi mistoqsijiet li twieġeb il-Bibbja?
Il-Bibbja twieġeb dawn il-mistoqsijiet importanti: Kif bdiet il-ħajja? X’inhu l-iskop tal-ħajja? In-nies għala jbatu? X’jiġri meta jmut xi ħadd? Jekk kulħadd irid il-paċi, għala hawn ħafna gwerer? X’se jiġri minnha d-dinja? Il-Bibbja tinkuraġġina biex insaqsu l-mistoqsijiet. Fil-fatt miljuni ta’ nies huma sodisfatti bit-tweġibiet li tagħti.
2. Il-Bibbja kif tista’ tgħinna ngawdu l-ħajja ta’ kuljum?
Il-Bibbja ttina pariri tajbin. Pereżempju, tgħin lill-familji jkunu vera ferħanin. Tgħidilna xi rridu nagħmlu meta nkunu stressjati u kif nistgħu nieħdu pjaċir bix-xogħol tagħna. Int se tkun taf x’tgħallem il-Bibbja dwar dawn is-suġġetti u ħafna oħrajn hekk kif tiddiskuti dan il-ktieb. Se tara wkoll kif ‘l-Iskrittura kollha [kulma fiha l-Bibbja] . . . se tgħinek.’—2 Timotju 3:16.
Din il-pubblikazzjoni ma tiħux post il-Bibbja. Minflok, tgħinek biex tara x’tgħid il-Bibbja. Għalhekk, ninkuraġġuk biex taqra l-iskritturi fil-lezzjonijiet u tqabbilhom ma’ dak li qed titgħallem.
TGĦALLEM IŻJED
Ara kif il-Bibbja għenet lin-nies, kif tista’ tieħu pjaċir taqraha, u għala hu tajjeb li jkollok għajnuna biex tifhimha.
3. Il-Bibbja tista’ tiggwidana
Il-Bibbja hija bħal torċ. Tista’ tgħinna biex nieħdu deċiżjonijiet tajbin u tgħidilna x’se jiġri fil-futur.
Aqra Salm 119:105, u mbagħad iddiskuti:
-
Kif kien iħares lejn il-Bibbja min kiteb dan is-salm?
-
Inti kif tħares lejha l-Bibbja?
4. Il-Bibbja tista’ twieġeb il-mistoqsijiet tagħna
Mara sabet li l-Bibbja wieġbet il-mistoqsijiet li inkwetawha għal ħafna snin. Ara l-VIDJOW, u mbagħad iddiskuti l-mistoqsijiet li ġejjin.
-
Fil-vidjow, il-mara x’tip ta’ mistoqsijiet kellha?
-
Li tistudja l-Bibbja kif għenha?
Il-Bibbja tinkuraġġina biex insaqsu l-mistoqsijiet. Aqra Mattew 7:7, u mbagħad iddiskuti:
-
X’mistoqsijiet għandek li l-Bibbja tista’ twieġeb?
5. Tista’ tieħu pjaċir taqra l-Bibbja
Ħafna nies jieħdu pjaċir jaqraw il-Bibbja u jibbenefikaw minnha. Ara l-VIDJOW, u mbagħad iddiskuti l-mistoqsijiet li ġejjin.
-
Fil-vidjow, iż-żgħażagħ kif ħassewhom dwar li jaqraw?
-
Għalkemm jiddejqu jaqraw, għala jieħdu pjaċir jaqraw il-Bibbja?
Il-Bibbja ttina pariri li bihom inħossuna aħjar u li jagħtuna tama. Aqra Rumani 15:4, u mbagħad iddiskuti:
-
Tixtieq tkun taf iżjed dwar din il-wegħda?
6. Oħrajn jistgħu jgħinuna nifhmu l-Bibbja
Ħafna sabu li apparti li jaqraw il-Bibbja waħedhom, jgħinhom ukoll li jiddiskutuha m’oħrajn. Aqra Atti 8:26-31, u mbagħad iddiskuti:
-
Kif nistgħu nifhmu l-Bibbja?—Ara l-versi 30 u 31.
Ir-raġel Etjopjan kellu bżonn l-għajnuna biex jifhem x’kien qed jaqra. Ħafna nies illum isibuha t’għajnuna li jiddiskutu l-Bibbja m’oħrajn
ĦAFNA JGĦIDU: “Li tistudja l-Bibbja hu ħela ta’ ħin.”
-
Int kif twieġeb? Għala taħseb hekk?
XI DDISKUTEJNA?
Il-Bibbja tagħti pariri għall-ħajja ta’ kuljum, twieġeb mistoqsijiet importanti, tgħin lin-nies iħossuhom aħjar, u ttihom tama għall-futur.
X’Tgħallimt
-
X’tip ta’ pariri tista’ ssib fil-Bibbja?
-
X’inhuma xi mistoqsijiet li twieġeb il-Bibbja?
-
X’tixtieq titgħallem mill-Bibbja?
ARA IŻJED
Sir af kif il-pariri tal-Bibbja huma tajbin għalina llum.
“It-tagħlim tal-Bibbja —Għerf li jibqa’ jgħodd” (It-Torri tal-Għassa Nru. 1 2018)
Ara kif il-Bibbja għenet lil raġel li kien ibati minn kif kien iħossu minn mindu kien żgħir.
Ara l-pariri tajbin tal-Bibbja għall-familja.
“12-il sigriet ta’ familji li jirnexxu” (Stenbaħ! Nru. 2 2018)
Tgħallem kif il-Bibbja tikkoreġi l-idea żbaljata li ħafna għandhom dwar min imexxi d-dinja.