Rũndã-rũndã, y tõe n paama kibay nana-nana n yɩɩd pĩndã. Kibay kẽer tõe n sõng-y lame tɩ y kogl y mense, wall y gil bãase. La y sã n wa baood kibaya, y segd n maana gũusg ne kibay kẽere, wala makre:

•   Kibay b sẽn kõt sẽn na yɩl n kẽes nebã moogo

•   Kibay sẽn yaa ziri

•    Kibay sẽn pa tar tikri

 Koronavirisã bã-loangdgã sasa, Nasiõzĩni wã sekertɛɛr zenerallã keooga nebã, n yeel tɩ b gũus tɩ kibay nins sẽn pa sɩdã piuuga zĩig zãng wa bã-loangdga. Ad a sẽn yeelã: “Laafɩ wã wɛɛngẽ sagl-yoodã la tɩ-yoodã sõor paasda wʋsgo. D wʋmda zirẽ-be-goam wʋsg televiziyõ wã la radio wã pʋgẽ. Ẽntɛrnetã pida ne kibay sẽn pa tar tikri. Nebã kisa buud kẽer la sul kẽer neba, n wae n gomd rẽ yelle, tɩ noom neb wʋsgo.”

 Sɩd-sɩda, kibay sẽn pa sɩd yelgr pa sɩng rũndã ye. La Biiblã pʋgẽ, b pĩnd n togsame tɩ tõnd wakatã, “nin-wẽnsã ne bɛlgdbã na n lebgda wẽns n paasdẽ. B na n belga nebã, la neb a taab me na n belg-b lame.” (2 Tɩmote 3:1, 13) Sẽn paase, ne ẽntɛrnetã maasem, kibay sẽn yaa ziri tõe n taa tõnd nana-nana la tao-tao n yɩɩd pĩndã, tɩ d mi n tõe n kɩt tɩ b piuug n pa bãng meng ye. Woto kɩtame tɩ tõnd boat imellã, rezo-sosiyo rãmbã, la koees nins b sẽn toond tõnd d telefon-dãmbã pʋgẽ wã tõe n wa pid ne kibay b sẽn naane, wall sẽn pa sɩd zãng ye.

 Wãn to la y tõe n gil kibay nins sẽn pa sɩdã, la b rãmb nins sẽn pa tar tikrã. D ges Biiblã goam kẽer sẽn tõe n sõng-yã.

•   Ra tẽ-y bũmb ning fãa y sẽn yã wall y sẽn wʋm ye

   Biiblã sẽn yete: “Zɩt tẽeda bũmb ning fãa a sẽn wʋme, la yam soab maanda gũusg ne a yel-manesmã fãa.”—Yel-bũnã 14:15.

   D sã n pa maand gũusgu, b tõe n tudg-d-la nana-nana. Wala makre, fot-rãmb sẽn naag ne gʋlsem la video-koees mi n piuuga ẽnternetẽ wã, sẽn yɩɩd fãa rezo-sosiyo rãmbẽ wã. Naoor wʋsgo, bõn-kãensã yaa sẽn na n maan laad bala. La ned tõe n toeema bũmb fot-kãens la video-kãens pʋsẽ nana-nana, wall a rɩk-b n tɩ loe ne bũmb a to. Neb n be n tõe n maan video sẽn wilgd ned sẽn maand bũmb wall a gomd goama, t’a soabã yaool n zɩ n maan bõn-kãng bɩ n gom gom-kãens ye.

   “Bãngdb nins sẽn vaeesd kibay nins sẽn pa sɩdã fãa la bal yãa fot-rãmb wall video-rãmb neb sẽn dɩk n tɩ loe ne bũmb a to rezososiyo rãmbã pʋsẽ.”—Axios Media.

   Sok-y y menga: ‘B sẽn gomd bũmb ning yellã yaa kibay sɩd-sɩd bɩ?’

•   Tags-y kibarã sẽn yit zĩig ningã, la a sẽn gomd bũmb ning yellã zug neere

   Biiblã sẽn yete: “Mak-y bũmb fãa n gese.”—1 Tesalonik rãmbã 5:21.

   Nand tɩ y tẽ kibar wall y rɩk-a n tool neda, reng-y n bao-y n bãng-y a sã n yaa sɩda, baa sã n yaa kibar neb wʋsg sẽn gomd a yelle, wall b sẽn togs radio wall televiziõ pʋgẽ. Bõe yĩnga?

   Bao-y n bãng-y y sã n tõe n kɩsa kibarã sẽn yit ned ning nengẽ wall zĩig ningã sɩda. Kiba-kɩtb tʋʋm-noor wall siglg ning tõe n togsa kibar sẽn pa sɩd zãng sẽn na yɩl n kẽes bãmb mensã yõodo, pa rẽ bɩ n na n teel b tagsa politikã wɛɛngẽ. Mak-y yãmb sẽn yã bũmb ningã ne b sẽn wilgd bũmb ning zĩis a taabã. Wakat ninga, y zo-rãmb tõe n tũnuga ne imell wall rezo-sosiyall n tool-y kibar sẽn pa sɩd n pa bãng ye. Woto wã, ra kɩs-y sɩd ne kibare, n pa reng n bao n bãng a sẽn yit zĩig ningã ye.

   Bao-y n bãng-y kibarã sẽn gomd bũmb ning yellã sã n pa yɛl sẽn looge, la b sã n zemsa kɛpɩ. Bao-y n bãng-y sẽn yɩ daar ningã, la y bao kaset sẽn wilgd vẽneg tɩ b sẽn gomd bũmb ning yellã yaa sɩda. Sã n yaa bũmb võor wʋmb sẽn yaa toog wʋsg la b togs tɩ wõnd a võorã wʋmb lebga nana wʋsgo, y segd n maana gũusg n yɩɩda. Sã n mik tɩ b sẽn togsd kibarã to-to wã yaa sẽn na yɩl tɩ y maan bũmb me, y segd n gũusa wʋsgo.

   “Rũndã-rũnda, wõnda bao n bãng kibar sã n yaa sɩdã lebga bũmb sẽn tar yõod wʋsg wa nusã pegbã.”—A Sridhar Dharmapuri, Nasiõzĩni wã tʋʋm-noor a ye taoor soaba.

   Sok-y y menga: ‘Kiba-kãngã togsda neb kẽer sẽn get yɛlã to-to wã, n yaool n maandẽ tɩ wõnd yaa rẽ la sɩdã bɩ? Pa togs-yɛng kõta a meng bʋʋm sɩda?’

•   Ges-y yɛlã sẽn sɩd yɩ to-to wã, pa nebã sẽn nongã ye

   Biiblã sẽn yete: “Yaa yalem n teegd a meng tagsgo.”—Yel-bũnã 28:26, Wẽnnaam Sebre, 1983.

   Tõnd wae n tẽeda kibay nins sẽn teend tõnd sẽn dat n tẽ wã nana-nana. Ẽntɛrnetã tʋʋm-noy yaool n wae n geta tõnd sẽn nong bũmb ninsã la d sẽn gẽes bũmb nins ẽntɛrnetẽ wã, n bãngd n yãkd kibay nins b sẽn toond tõndã. La pa wakat fãa la bũmb nins d sẽn dat n wʋmã n yaa bũmb nins d sẽn segd n wʋmã ye.

   “Ninsaal tõe n tagsa sõma la vẽenega. La tõnd sẽn dat bũmb ninsã, d sẽn saagd tɩ bũmb nins na maanã, d sẽn yɛɛsd bũmb ninsã la sẽn be d sũurẽ wã mi n kɩtame tɩ d sak n deeg tɩ bũmb yaa sɩda, a sã n teend tõnd sẽn dat n tẽ wã.”—A Peter Ditto, nin-buiidã yel-manesem bãngda.

   Sok-y y menga: ‘Mam kɩsa sɩd ne kiba-kãnga, a sẽn gomd bũmb ning yellã sẽn zems ne mam sẽn dat n tẽ wã yĩng bal bɩ?’

•   Ra naag-y n yelg-y kibay sẽn pa sɩd ye

   Biiblã sẽn yete: “Da rɩk zĩrẽ koɛɛg n saag ye.”—Yikri 23:1.

   Tẽeg-y tɩ kibay nins yãmb sẽn toond neb a taabã tõe n toeema b tagsa wã la b tʋʋm-tʋmdɩ wã. Baa yãmb sã n tool ned kibar sẽn pa sɩd n pa bãnge, tõe n waa ne yel-beedo.

   “Bũmb sẽn tar yõod wʋsg y sẽn segd n maan nand tɩ y tool ned kibar y sẽn paam yaa reng n sok y meng yaa: ‘Mam kɩsa sɩd ne bũmb ning mam sẽn dat n toolã tɩ sek bɩ?’ Nebã fãa sã n da maand woto, zirẽ-be-kibayã sẽn be ẽntɛrnetã pʋgẽ wã sõor da na n booga wʋsgo.”—A Peter Adams, tʋʋm-noor a ye sẽn zãmsd nebã kibayã taasg taoor soaba.

   Sok-y y menga: ‘Mam toonda kiba-kãnga, mam sẽn mi vẽeneg t’a yaa sɩd yĩng bɩ?’