Yãmb tẽra y sũur sẽn yɩ noog to-to y biigã rogem daarã bɩ? Sãmbg sẽn ka be, y ra yãgdame n dat n deeg-a y nugẽ. La ne roagdb kẽere, wala sẽn yɩ to-to ne a Carlo la a Mia wã, sũ-noogã pa zãag ye. Logtoɛɛmbã sẽn wilg-b tɩ b biigã roga ne bã-kɛgengã, lebga yɩɩre.

Yãmb tara biig sẽn bẽed bã-kɛgeng bɩ? Sã n yaa rẽ, tõe tɩ y sokda y meng y sã n na n tõog n maoa ne y zu-loɛɛgã. La ra n koms-y raood ye. Roagdb n tõog n mao ne zu-loees a woto buudu. D na n goma zu-loees a tãab yelle. Yaa zu-loees kamb a woto roagdbã sẽn tõe n sege. D na n wilga Biiblã sagls sẽn tõe n sõng-b to-to wã me.

Roagdb wʋsg sẽn wa n wʋm tɩ b biigã yaa bãadã, komsa b raood wʋsgo. Ad a Juliana sẽn yit Megsikã sẽn yeele: “Logtoɛɛmbã sẽn wa n yeel tɩ tõnd bi-ribl  a Santiago bẽeda bãag sẽn komsd nedã, yɩɩ toog tɩ m sak n deege. M sũurã sãama wʋsgo.” Kẽer manesem yɩɩ wa a Villana sẽn yaa Itali pagã. A yeela woto: “Baa mam sẽn da mi tɩ m yʋʋmã sẽn vẽsgã, m sã n dɩk pʋga, biigã tõe n doga ne zu-loeesã, m yãka yam n dɩk pʋga. Masã, m sẽn dog biigã n mik t’a yaa koamsã, m ningda m meng taale.”

Y biigã ka laafɩ wã sã n sãamda y sũur wall kɩtame tɩ y ningd y meng taale, y bee bʋʋm. Wẽnnaam pa naan ninsaal t’a lʋɩ bãag ye. (Sɩngre 1:27, 28) A pa naan roagdbã tɩ b tõe n sak n deeg nana-nana tɩ b biig roga ne bã-kɛgeng ye. Rẽnd b sã n yeel-y tɩ y biig bẽeda bã-kɛgeng tɩ y sũur sãam wʋsgo, pa wẽng ye. Bãng-y tɩ na n kaoosame tɩ y sũ-sãangã yaool n booge. Yɩl tɩ y wa bãng y sẽn tõe n vɩɩmd ne y zu-loɛɛgã to-to wã me na n dɩka sẽka.

La y sã n tagsdẽ tɩ y biigã bãag yaa yãmb yell yẽ? Sã n yaa rẽ bɩ y tẽeg tɩ ned baa a ye pa mi sẽn sɩngd to-to tɩ roagd wa long a biig bãagã ye. Yɛl a taab me n tõe n kɩt tɩ biig rog ne bãaga, la ned kae n tõe n wʋm rẽ fãa võor ye. La nina tõe n dat n ninga a pagã bɩ a sɩdã taale. Da n tol-y n maan-y woto ye. Y sẽn sõngd taab n ges biigã yell n são.—Koɛɛg Soaba 4:9, 10.

Y SẼN TÕE N MAANE: Bao-y n bãng-y y biigã bãag sõma. Biiblã yeela woto: “Minim n lʋɩt taoore, tɩ yir tõog n me. Yɩlẽ t’a pʋgẽ sak zĩndigu, bee ne yam vẽenem dãmba.”—Yelbũna 24:3, Sebr Sõngo.

Y tõe n tɩ sõsa ne logtoɛɛmba, la y karem sɛb sẽn gomd y biigã bãag yelle. Y tõe n maka y sẽn baood n na n bãng y biigã bãagã ne buud-gomd zãmsgo. Sɩngrẽ wã, na n yɩɩ toogo, la y tõe n bãngame.

A Carlo ne a Mia tɩ sõsa ne b logtorã. B baoa siglg sõngr me. Yaa siglg sẽn get kamb nins sẽn bẽed bãmb biigã bãagã yelle. Ad b sẽn yeele: “Rẽ sõnga tõnd tɩ d bãng bãagã sẽn tõe n wa ne zu-loees ninsã, la ned sẽn bẽed bã-kãngã sẽn tõe n maan bũmb ninsã me. Tõnd bãngame tɩ bũmb wʋsg n be d biigã sẽn tõe n maane. Woto kenga d raood wʋsgo.”

Y tõe n getame tɩ y biigã yell gesg yamsd-y-la wʋsgo. A Jenney sẽn yaa Nuvɛll Zelãnd pagã yeela woto: “Yʋʋm a wãn mam bi-riblã sẽn lʋɩ bã-kɛgengã poore, mam sẽn yi n na n maan bũmb ning fãa, tao-tao tɩ m yaame, n sɩng yãbre.”

A Ben bi-riblã bẽeda bã-kɛgeng sẽn komsd neda. A yeela woto: “Nebã fãa la bal pa tol n tõe n wʋm tõnd sẽn vɩ to-to wã võor ye.” Y tõe n data ned n togs y sũur koɛɛga, la y zo-rãmbã fãa la bal kamb sẽn tar laafɩ wã, y tõe n maanda sãmb-sãmb ne tɩ sõs ne-ba.

Y SẼN TÕE N MAANE: Kos-y sõngre. Ned sã n dat n sõng-y me bɩ y sake. A Juliana yeela woto: “Wakat ninga, maam ne m sɩdã wae n zoeta yãnd ne d tɩ kos sõngre.” La a paasa woto: “Tõnd bãngame tɩ d pa tõe n teeg d mens bal ye. B sã n sõngd tõndo, d neeme tɩ neb n mi tɩ d zu-loɛɛgã namsd-d lame.” Y zo-rãmb bɩ y roagdb sã n dat tɩ y biigã zĩnd ne-b reem sasa wall tigsg sasa bɩ y sake. Biiblã yel-bũnd n yet woto: “Ned tũud-n-ta-sõng nong-a-la wakat fãa, la a yaa ba-biig sẽn dog toog wakat yĩnga.”—Yelbũna 17:17, MN.

Ges-y yãmb meng laafɩ wã yelle. Wa ãmbilãns sẽn segd n ningd esãens sẽn na yɩl n tõogd n dɩkd bãad-rãmb n kẽngd logtor-yirã, yɩl n paam keelem n ges y biigã yelle, yãmb me segd n dɩta sõma, n wɩsgd y yĩis la y vʋʋsd sõma. A Javier sẽn tar bi-ribl sẽn yaa põorã yeela woto: “Mam biigã pa tõe n kẽn ye. Rẽ n so tɩ mam tagsdame tɩ m segd n dɩta sõma, bala, maam la a nao. Maam n tusda n gilgdẽ.”

La wãn to la y tõe n paam weer n ges y meng yell woto? Roagdb kẽer geta b kambã yell n deesd taaba. Rẽ kɩtame tɩ b nin-yɛng sã n wa get b biigã yell bɩ a to wã tõe n paam n vʋʋs wall a maan bũmb a to. Tõe n yɩɩ toog tɩ y bãng y tʋʋm nins yõod sẽn pa waoogã n base, n tõog n paam sẽk n ges y mengã yelle, la yaa tɩlae tɩ y maan woto. A Mayuri sẽn yaa Ẽnd pagã yeela woto: “Bilf-bilfu, wat n lebga nana.”

Bao-y y zoa n wilg-a y zu-loeesã. Baa y zo-rãmb nins sẽn pa tar kamb sẽn bẽedã tõe n bels-y  lame. Y tõe n pʋʋsa a Zeova n kos sõngr me. Rẽ yĩnga pʋʋsgã sɩd tõe n sõng-y lame bɩ? A Yazmin sẽn tar kamb a yiib sẽn bẽed bã-kɛgemsã yeela woto: “Wakat ninga, m zu-loeesã mi n sãag-m lame, tɩ m pa le mi m sẽn maandg ye. La mam pʋʋsda a Zeova n kos t’a bels-m la a keng m pɛlga. Rẽ poore, m le paamda raoodo.”—Yɩɩl Sõamyã 145:18.

Y biig sã n tar bã-kɛgenga, tõe n kɩtame tɩ y zakã rãmb toeem rɩbd nins b sẽn dɩtã la zĩis nins b sẽn mi n kẽndã. Tõe n kɩtame me tɩ roagdbã pa le tõe n paam sẽk n be ne biig fãa wa pĩndã ye. Woto tõe n kɩtame tɩ kamb a taabã wa tagsdẽ tɩ b pa nand-b ye. Sẽn paase, roagdbã sẽn get bãadã yell wʋsgã tõe n kɩtame tɩ b wa pa le get b mensã yell sõma ye. A Lionel sẽn yaa Liberia raoã yeela woto: “Wakat ninga, mam pagã yetame tɩ mam bas-a-la a yembr ne biigã n pa sõngd-a ye. A sã n yeel woto, mam tagsdame t’a paoog-m lame, n mi n leok ne sũ-toogo.”

Y SẼN TÕE N MAANE: Mi n bao-y bũmb sẽn noom y kambã tɩ y naag taab n maane. Rẽ na n sõngame tɩ b bãng tɩ b yell pak-y lame. A Jenney yeela woto: “Tõnd mi n maana bũmb d bi-kãsengã yĩnga, n mi n tũ taab meng n kẽng zĩig ning a sẽn nong n yɩɩd n tɩ rɩ.”

Sẽn na yɩl tɩ yãmb ne y pagã wall y sɩdã moor ket n noomẽ, sõsd-y ne taab la y naagd taab n pʋʋsdẽ. A Aseem sẽn yit Ẽndã tara bi-ribl sẽn bẽed kĩsinkĩir sẽn namsd-a wʋsgo. A yeela woto: “Baa maam ne m pagã sẽn mi n ya tɩ d sũy me sãamã, d wae n baooda weer n sõsda, la d naagd taab n pʋʋsdẽ. Yibeoog fãa, d rengda d kambã n yiki, n naag taab n karem Biiblã la d sõs rẽ zugu.” Rap kẽer ne b pagb sõsda ne taab nand tɩ b gũsi. Zu-loees sasa, y sã n pelgd y pʋs n sõsd ne taab la y pʋʋsd ne y sũyã fãa, paasda y kãadmã pãnga. (Yelbũna 15:22) Rao a ye ne a pag yeelame tɩ yaa zu-loees sasa la bãmb sɩd ne tɩ b nonga taab n yɩɩda.

Biiblã wilgame tɩ ka la bilfu, Wẽnnaam na n menesa bãas nins sẽn namsd kom-bɩɩsã la kãsembã fãa wã. (Wilgri 21:3, 4) Rẽ poore, “ned ba a ye ka na n le yeel t’a ka laafɩ ye.” *—Ezai 33:24.

La nand tɩ wakat kãng ta, baa y biig sã n bẽeda bã-kɛgenga, y tõe n paama sũ-noogo. A Carlo ne a Mia yeela woto: “Baa sã n wa wõnd yɛlã fãa pa lebd be bɩ y ra koms raood ye. Ges-y y biigã sẽn tõe n maan bũmb ninsã, bala bũmb wʋsg n be a sẽn tõe n maane.”