Ayo. Biiblã pa wilgd tɩ tẽngã yaa paklg ye. a Biiblã pa siãns sebr ye. La a goamã pa kɩɩsd siãnsã bãngdbã sẽn vaees n yã wã ye. Bũmb nins Biiblã sẽn yetã “yasa kãenkãe n ka tol n vigsdẽ ye.”​—Yɩɩn-sõamyã 111:8.

•  Biiblã sẽn gomd “dũniyã ween-vɩɩs a naasã” yellã võor yaa bõe?

•  A Sʋɩtãan sẽn tall a Zeezi n kẽng zĩig ningã wilgdame tɩ tẽngã yaa paklg bɩ?

 Biiblã sẽn gomd “dũniyã ween-vɩɩs a naasã” yellã la “dũniyã kɩremsã fãa” yellã pa zĩig sɩd-sɩd yell la a gomda, tɩ yaa wa dũniyã tara kogs a naas bɩ t’a tara tɛk ye. (Ezayi 11:12; Zoob 37:3) La yaa sẽn na yɩl n gom dũniyã tõr yell bala. Biiblã leb n gomda dũniyã yaanga, a taoore, a rɩtg la a goabg me yelle, sẽn na yɩl n bilg dũniyã tõre.​—Luk 13:29.

 Wõnda Ebre wã gom-biis nins b sẽn lebg tɩ “ween-vɩɩse,” bɩ “kɩremsã,” yaa makr sẽn tik gom-bil ning sẽn yaa “pɩgsã” zugu. Sebr a yembr (The International Standard Bible Encyclopedia) yeelame tɩ “yaa liuul sẽn mi n yɛdg a pɩgs n lud a kambã fãa wã yĩng la b sẽn tũnug ne [Ebre wã gom-bi-kãngã,] n na n bilg bũmb sẽn yalem kɩremse.” Sebrã paasame tɩ Zoob 37:3 la Ezayi 11:12 wã pʋgẽ, “gom-bilã bilgda kʋɩlg kogse, todse, bɩ dũniyã tẽn-nabdrã kɩremse.” b

 Sʋɩtãanã sẽn na n mak a Zeezi wã, a tall-a lame ‘n kẽng tãn-lug-lug zugu, n wilg-a dũniyã soolem toay-toay fãa ne b ziirã.’ (Matye 4:8) Neb kẽer sẽn tagsd tɩ dũniyã yaa paklgã yĩnga, b yeelame tɩ Biiblã kiba-kãngã wilgdame tɩ zĩig n be tɩ f sã n yals be, bɩ f tõe n yã dũniyã gilli. La wõnda b sẽn yeel tɩ “tãn-lug-lugã” yaa makre, la pa zĩig sɩd-sɩd ye. Ad bũmb kẽer sẽn kɩt tɩ d yet woto.

•   Tãng sɩd-sɩd pa be tɩ ned tõe n yals be n yã dũniyã soolem toɛy-toɛyã fãa ye.

•   Sʋɩtãanã pa wilg a Zeezi dũniyã soolem toɛy-toɛyã fãa bal ye. A wilg-a-la “b ziirã” me. Ned pa tõe n yals zĩ-zãrgẽ n yã dũniyã ziirã fãa ye. Dẽnd wõnda a Sʋɩtãan tũnuga ne vẽnegr buud n wilg a Zeezi bõn-kãense. Yaa wa ned sẽn na n tũnug ne prozɛktɛɛr n wilg tõnd tẽngã zĩis toɛy-toɛy fot-rãmba.

•   Luk 4:5 wã pʋgẽ, b yeelame t’a Sʋɩtãan wilga a Zeezi “dũniyã soolem dãmbã nif kamsg pʋgẽ.” Ninsaal yaool n pa tõe n yã bõn-kãensã fãa nif kamsg pʋgẽ ye. Woto wilgdame t’a Sʋɩtãan sẽn na n mak a Zeezi wã, a tũnuga ne vẽnegre.