N-ye. Ned sã n pelg a pʋg n kos Wẽnnaam bũmb sẽn zems ne a raabã, a sõngda a soabã. Baa yãmb sã n zɩ n pʋʋs Wẽnnaam, Biiblã kibay nins sẽn gomd neb sẽn pʋʋs Wẽnnaam n kos sõngr yellã tõe n kenga y raoodo. Wala makre:

•   “Sẽn-Ka-Saab sẽn yaa mam Wẽnnaam, sõng-y-ma! Yãmb nonglmã yĩng bɩ y n fãag-ma.”—Yɩɩn-sõamyã 109:26, Wẽnnaam Sebre 2014.

•   “Mam yaa naong soaba, la nimbãan-neda. La Zu-soaba, yãmb yaa mam sõangda, la m fãagda.”—Yɩɩn-sõamyã 40:18, Wẽnnaam Sebre 2014.

 Yaa vẽeneg tɩ ned ning sẽn gʋls gom-kãensa wã ra tẽeda Wẽnnaam ne a sũur fãa. Dẽnd Wẽnnaam kelgda neb nins fãa sẽn pʋʋsd-a ne yam-sõngã. Wala makre, a kelgda “sũ-sãang rãmbã,” bɩ “sũ-pa-noaang rãmbã.”—Yɩɩn-sõamyã 34:19, Wẽnnaam Sebre 2014.

 Y pa segd n tags tɩ Wẽnnaam zãra wʋsg ne yãmb hal t’a toog kae ne y zu-loeesã ye. Biiblã yetame: “Sẽn-Ka-Saab bee hal yĩngri, la b nee sik-m-mens rãmbã. Bãmb bee yɩɩga, la b mii wuk-m-mens rãmbã n bake.” (Yɩɩn-sõamyã 138:6, Wẽnnaam Sebre 2014) Sɩd me, daar a ye, a Zeezi yeela a karen-biisã yaa: “Baa yãmb zugã zoobd fãa sõdame.” (Matye 10:30) Wẽnnaam mii bũmb kẽer yãmb zug tɩ yãmb pa miẽ meng ye. Woto wã, y sã n pʋʋs-a n kos t’a sõng-y ne y zu-loeesã, a kõn kelg-y sɩda?—1 Pɩyɛɛr 5:7.