Biiblã ra pĩnd n wilgame tɩ dũniyã yaoolem wakate, bã-longds na n zĩndame. (Luk 21:11) La pa Wẽnnaam n wat ne bã-longdsã n na n sɩbg nebã ye. Ne a Rĩungã maasem, a pʋd n na n kɩtame tɩ bã-longdsã, la bãag buudã fãa sa ka la bilfu.

•  Biiblã ra pĩnd n wilgame tɩ bã-longds n na n wa zĩnd bɩ?

•  Wẽnnaam zoe n tũnuga ne bãas n sɩbg neb bɩ?

•  Yaa Wẽnnaam n wa ne bã-longds nins sẽn be rũndã-rũndã wã, n na n sɩbg nebã bɩ?

•  Daar n wat tɩ bã-kãensã na n sa bɩ?

•  Biiblã vɛrse-rãmb sẽn gomd bãas yelle

Biiblã pʋgẽ, b pa pĩnd n gom bã-longdem takɩ yelle, wala makre, koronavirisã, SIDA wã, la girip ɛspayõllã ye. La Biiblã ra pĩnd n wilgame tɩ wakat n wat tɩ “bã-longds” la ‘bã-toos’ sẽn kʋʋd na n zĩndi. (Luk 21:11; Vẽnegre 6:8) Yel-kãensã naaga bãnd ning sẽn wilgd tɩ lebga dũniyã “yaoolem wakatã,” b sẽn boond me tɩ ‘dũniyã saab wakatã.’—2 Tɩmote 3:1; Matiye 24:3.

Biiblã pʋgẽ, b gomda Wẽnnaam sẽn tũnug ne bãas n sɩbg neba, la pa yɩ naoor wʋsg ye. Wala makre, Wẽnnaam kɩtame tɩ wãood yõk neb pĩnd wẽndẽ. (Sõdbo 12:1-16; 2 Rĩm-dãmbã 5:20-27; 2 Kibayã 26:16-21) La ra pa bũmb sẽn wae ye. Rẽ me, a pa kɩtd tɩ bãagã varg baa neb sẽn pa tar taal ye. Pʋd n yaa neb sẽn wilg vẽeneg tɩ b yaa wẽn-kɩɩsdb la Wẽnnaam sɩbg ne bãase, n na n wilg t’a kaoo b bʋʋdo.

Ayo! Neb n yet tɩ yaa Wẽnnaam n wa ne bã-longds nins sẽn be rũndã-rũndã wã, la bãas a taaba, n na n sɩbg nebã. La goam a woto pa tik Biiblã zug ye. Bõe n wilgd rẽ?

Ad bũmb a ye sẽn wilgd rẽ: Bãasã yõkda wẽn-sakdb me. Yɩɩ woto pĩnd wẽndẽ, rũndã-rũndã me yaa woto. Wala makre, a Tɩmote yɩɩ wẽn-sakda, la a ra ‘wae n lʋɩta bãase.’ (1 Tɩmote 5:23) Biiblã yaool n pa wilg tɩ rẽ yaa kaset tɩ Wẽnnaam sũur da pa noom ne-a ye. Rũndã-rũndã me, neb sẽn yaa wẽn-sakdb la bã-longdem la bãas a taab yõkda. Naoor wʋsgo, mikdame tɩ yaa yel-lingdem bal n paam nin-kãensã, wa sẽn paamd neb a taabã.—Koɛɛg soaba 9:11.

Sẽn paas me, Biiblã wilgdame tɩ wakat ning Wẽnnaam sẽn yãk n na n sɩbg nin-wẽnsã nan pa ta ye. Biiblã yetame tɩ masã pʋd n yaa “fãagr daare,” rat n yeel tɩ yaa wakat Wẽnnaam sẽn yet ned buud fãa t’a modg n bao yẽ zoodo, n wa paam fãagre. (2 Korẽnt rãmbã 6:2) Wãn to la a yet nebã rẽ? Wala makre, Wẽnnaam kɩtame tɩ neb moond koe-noog dũniyã gill zugu. Biiblã pʋgẽ, b boonda koe-kãng tɩ Wẽnnaam ‘Rĩungã koe-noogo.’—Matiye 24:14.

N-ye! Biiblã wilgame tɩ ka la bilf bala, bãag pa na n le yõk ned ye. Wẽnnaam Rĩungã naabã sã n wa rɩt naam tẽngã zugu, bãasã fãa na n saame. (Ezayi 33:24; 35:5, 6) A na n kɩtame tɩ namsgo, toogo, la kũum sa fasɩ. (Vẽnegre 21:4) A na n kɩtame me tɩ sẽn ki-bã vʋʋge, n paam n vɩɩmd tẽng zug ka ne laafɩ, tɩ bũmb fãa yaa sõma zãnga.—Yɩɩn-sõamyã 37:29; Tʋʋma 24:15.

Vẽnegre 6:8: ‘Mam yãa wed-mo-kẽeg-kẽega, la sẽn da zao-a a zugã yʋʋr boondame tɩ Kũum. La Yaoogã ra pʋgd-a-la pẽdem-pẽdem. B kõ-b-la tõog tɩ b tall bã-toaag n kʋ nebã.’

Wilgda tõnd bõe? Vẽnegr sebrã bãngr-gomd ning sẽn gomd wed-rʋʋdb a naasã yellã wilgda tõnd tɩ bã-longds n na n zĩnd rũndã-rũndã.